Концерт но возьматӥзы, спектакль но пуктӥзы

Куд-огъёсаз сыӵе ужрадъёс ортчизы но ини. Кылсярысь, 20 оштолэзе Вуж Кушкет покчиёзо школаын дышетскись пиналъёс анай-атайёссы, песяй-бабайёссы но, огъя вераса, гуртооссы азьын отчёт «лэсьтӥллям» ни — шумпоттӥллям гурт калыкез чебер кырӟанъёсын, шулдыр эктонъёсын но вольыт веранъёсын. Со сяна, 2-тӥ, 3-тӥ но 4-тӥ классъёсын дышетскись пиналъёс асьсэлэсь спектакльын шудыны быгатэмзэс но возьматӥллям. Вераны кулэ, нылпиослэн спектакльзы район масштабен ялэм конкурсэн валче дасямын вал. «Куать ӵошен нылпиос туж усто, тыршыса шудӥзы асьсэ рольёссэс. Калыклы туж кельшиз шуыса малпасько», — вера Светлана Петровна Щербакова, Вуж Кушкет клублэн кивалтӥсез. Нош выступлениосты калыклы кельшымон карыса дасян понна кӧня тыршоно на. Таин валче покчи классъёсын дышетӥсьёслэсь Светлана Михайловна Карабаевалэсь но Светлана Ивановна Щербаковалэсь, удмурт калык лулчеберетэз утёнын но азинтонын мыло-кыдо тыршись Светапайлэсь, Вуж Кушкет клублэн кивалтӥсезлэсь, тыршемзэс пусйытэк уг луы. Соос нылпиосты огъя луыса коллективен ужаны, сцена вылын асьсэды возьыны дышетӥллям, пиналъёслэсь быгатонлыкъёссэс адӟыны-шараяны быгатӥллям.

Огъя вераса, час но ӝынылы кыстӥськем ужрад нокинэ но мылкыдтэм кельтымтэ, трос шумпотон кузьмам.