Дәваланган өчен 20 мең сумга кадәр акчаны кайтарып була

Медицина хезмәтләре өчен мөстәкыйль түләгән татарстанлылар тотылган акчаларның бер өлешен салым тотып калу ярдәмендә кире кайтара ала. Ул дәвалану өчен генә түгел, билгеләнгән дарулар сатып алу өчен дә, шулай ук төрле медицина хезмәтләре, шул исәптән стоматология хезмәтләре өчен дә бирелә. Дәвалану өчен салым тотып калу рәсмиләштерү кагыйдәләре турында – «Татар-информ» материалында.

Әгәр кеше медицина чыгымнарын түләгән булса, түләнгән НДФЛның бер өлешен кире кайтару мөмкин:

• үзе, ата-анасы, тормыш иптәше өчен;
• үз баласы, уллыкка алынган бала яки тәрбиягә алынган 18 яшькә кадәрге бала өчен. Әгәр бала көндезге бүлектә укыса, 2022 елдан яшь чиге 24 яшькә кадәр арттырылды.

Икенче очракта дәвалану өчен ата-ана яки попечитель түләргә тиеш. Әгәр дә медицина хезмәтләре өчен бала үзе түли икән, салым тотып калу хокукыннан ул мөстәкыйль рәвештә файдалана ала. Шул ук вакытта аның кереме булырга тиеш, аннан НДФЛ 13% ставкасы буенча тотыла.

Дәвалану өчен салым тотып калуны ничек рәсмиләштерергә

Чыгымнарның бер өлешенә компенсацияне берничә ысул белән алырга мөмкин. Беренчедән, моны ел тәмамланганнан соң салым хезмәте аша эшләргә мөмкин. Моның өчен 3-НДФЛ формасы буенча декларация тапшырырга кирәк.

Шулай ук эш бирүчедән ел дәвамында рәсмиләштерергә мөмкин. Бу очракта тиешле гариза кирәк булачак, аны Федераль салым хезмәте сайтында шәхси кабинет аша җибәрергә мөмкин.

Өченчедән, гадиләштерелгән тәртип бар. 2025 елдан салым түләүчеләргә Федераль салым хезмәтенең шәхси кабинеты аша рәсмиләштерүнең мондый ысулы мөмкин. Ул 2024 елның 1 гыйнварыннан дәвалануга тотылган чыгымнарга карата кулланыла.

Күпме акчаны кайтарып була

Социаль тотып калуны исәпләгәндә, дәвалануга елына 150 мең сум күләмендә чыгымнар исәпкә алына. Шул рәвешле, кире кайтаруның максималь суммасы әлеге лимитның 13 процентын тәшкил итә — 19,5 мең сум.

Кыйммәтле дәвалау өчен 150 мең сумлык чикләү кулланылмый. Мондый очракта салым түләүче барлык чыгымнар суммасының 13 процентын кире кайтаруга дәгъва итә ала. Төп шарт - күрсәтелгән медицина хезмәте дәвалауның кыйммәтле төрләре исемлегенә кертелергә тиеш.

Моны алдагы өч елда рәсмиләштерергә мөмкин. Шул ук вакытта социаль тотып калуның файдаланылмаган өлеше киләсе салым чорларына күчерелми.

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.