Ми Тӥлесьтыд котьку но мӧзмомы

Класс бадӟым вал — 22 дышетскись. Монэ соос шуныт пумитазы — та коллективе капчиен пыриськи. Малпасько, тросэз дышетӥсь бордын, солэн котькуд нылпиен огъя кыл шедьтыны быгатэмез бордын шуыса.

Аэлита Геннадьевна мон понна дышетӥсь гинэ ӧвӧл, кыкетӥ анай но луиз. Мон гинэ ӧвӧл, ваньмы но сое яратӥмы. Дышетӥсьмылэн, мылкыдыз шоры учкытэк, котьку сямен пальпотыса вераськемез, котькудмылы юрттыны дась луэмез, ми понна дурбасьтэмез ноку но уз вуны. Аслэсьтыз ужзэ тыршыса, сюлмысь быдэсъямез понна, дышетскисьёссэ аслэсьтыз нылпиоссэ кадь яратэмез понна Аэлита Геннадьевнаез котькудӥз дышетскисез яратэ. Азьлоосыз но, ми но, вуоноосыз но яратозы шуыса оскисько. Ачиз нылпиосты матын каре бере, нылпиос но кыстӥсько со борды. Кыӵе гинэ конкурсъёс, олимпиадаос, конференциос ӧз ортчытӥське, Аэлита Геннадьевна милемыз мылысь-кыдысь дасяз, кужымзэ но дырзэ жалятэк. Тани монэ но пӧртэм олимпиадаосы дасяз. Солэн дышетэменыз мон призо интыос но басьтылӥ. Озьы ик художественной самодеятельносте но пыриськылӥ. Кылсярысь, «Мудорвай» конкурсын но нырысетӥ инты басьтӥмы. Аэлита Геннадьевна ми понна (Волкова Кира, Тарасова Алина но мон) Малмыже заказать карыса национальной дэремъёс вурытӥз. Аслаз нылпиосыз сярысь кадь сюлмаськиз со ми понна. Ми но со борды дышимы. Дышетӥсьмы огмесыз но ноку ӧз люкы, ваньместы огкадь яратӥз, вордскем нуналъёсмы сярысь но ӧз вунэтылы. Дышетӥсь умой ке, дышетскон но капчиен сётӥське, шуо. Озьы ик вань. Начальной классын дышетскон аръёс туж ӝог ортчизы. Умой гинэ ВПР-ъёсты сдавать каримы. Май толэзьлэн пумаз выпускной ӝыт ортчытӥмы. Та праздник но милемлы вунонтэм кылиз.

Аэлита Геннадьевна, ми тӥледлы азьпалан шудбур, тазалык сӥзиськом. Выль басьтэм дышетскисьёсты но визьмоесь мед луозы. Ми тӥледыз ноку но ум вунэтэ, котьку но мӧзмомы тӥлесьтыд. Азинсконъёс тӥледлы.

Тау карон кылъёсме вераме потэ на нырысетӥ дышетӥселы но — Ермолаева Таисия Анатольевналы. Юнме уг верало, нырысетӥ дышетӥсь вань дышетскон аръёслы кутскон сётэ шуыса. Таисия Анатольевна мынам нырысетӥ юрттӥсе, нырысетӥ визь-кенеш сётъясе луиз. Со монэ гожъяськыны, лыдӟиськыны дышетӥз. Солы но пумтэм тау кареме потэ. Озьыен, кыкез но нырысетӥ дышетӥсьёсы зэмос адямиос, визьмо дышетӥсьёс но адӟем карымон нылкышноос. Азьпалан но визьмоесь дышетскисьёсты дышетыны мед кылдоз тӥледлы, яратоно дышетӥсьёсы.

Наталья Байманова,
Сизнер гурт.