Мӧзмыса тодам вайисько

Лякыт сямо, ассэ ӝикыт возись пиосмурт шуыса тодӥсько. Ӟечкыласько мон но тонэ Котырес лыдпусэныд! Сюлмысьтым сӥзисько трос аръёслы тазалык но тынычлык.

Сашалэсь верамъёссэ лыдӟыса шуак тодэ лыктӥзы ӵош ужам эшъёсы: мӧзмыса тодэ вайисько Клава Павловаез (со ик ӧтиз монэ типографие ужаны), Григорьева Маня апаез, Аля Фоминаез, Оля Евдокимоваез, Зина апай Романоваез, Женя Гайсинаез, Галя Борисоваез но мукетъёссэ редакциын ужасьёсты. Оло, газетлэн юбилеяз пумиськомы?

Маня апай, Аля, Женя но Зина апай шрифтъёсты оген-оген киын бичаса газет бамъёсты но пӧртэм бланкъёсты верстать каризы. Сокем паймисько вал, кызьы соос сыӵе ӝог шедьтылӥзы кулэ шрифтъёсты сомында ячейкаосысь, нош газет потэм бере, полосаосты сэрттыны но букваосты ӝог гинэ берен интыязы тырыны быгатэмзылы. Эшшо та ужзэс быдэстыкузы ик куспазы вераськыны но вуылӥзы, кырӟаны но. Клава но мон текстъёсты линотип машинаен бичамы. Оляен Галя уйин печатлазы газетмес, ӵукна лыдӟисьёслы келяны вуттылӥзы.

Бигер эшъёсынымы но туж тупаса ужамы. Оло удмурт, оло бигер — ваньмы огкадесь вал, нокин ӧз вылтӥяськы. Ми бигер кылэз ӟеч тодӥмы, нош соос удмурт кылэз уг валало вал, шуг ӧй вал милемлы секретничать но карыны. Конечно, соку ини командировкаосы машинаен ветлылӥзы. Тодам лыктэ серемес учыр. Редакцие вуиз нылаш Амина — Казаньысь журфакысь практикантка. Командировкаысь вуиз но гор-гор серекъяса номыр верамез уг луы, собере вераз ни, кызьы машиназылэн огез питранэз машиналэн азьпалтӥз питырам. Водительмы, Рафаэль, шаян, серемес егит адями, котькыӵе учыре шеде вал.

Та дыр ӵоже газет поттонын ужасьёс но трос пол вошъяськизы, луоз. Синмаськыса лыдӟисько Ольга Плотниковалэсь, Наташа Жуковалэсь гожъямъёссэс. Туж тодэме потэ егит гожъяськись Н. Жукова сярысь. Котьку синмаськыса лыдӟисько туж тодыса-валаса гожъямъёссэ. Шӧдӥське, журналистлы дышетскемын шуыса.

Вера Лобанова

Ижевск