Толэз келян – шудон уж ӧвӧл (2 люкет)

Бадӟым Лӧзялэн II люкетэз

Татын но ӟучарня нуналэ туж шулдыр вал. Гуртысь азьветлӥсьёслэн тыршеменызы Вӧйдырез келянлы сӥзем ужрад ортчиз. Резеда Закирова, Алсу Фасхутдинова, Ираида Иванова, Сергей Иванов, Лидия Пиляева, Виталий Фёдоров праздникез зэмзэ но «сайкатӥзы». Табань пыжизы, шурпа пӧзьтӥзы, лыктэмъёсыз ческыт чаен куноязы. 
Виталий Фёдоров баянэн шудӥз. Эктонъёсын, кыр-ӟанъёсын узыртэм празднике мылкыд карыса гуртооссы лыктӥзы но огазе шулдыръяськизы.

Ӟаны

Гуртъёсысь калыклэн улоназ выль ужрадъёсты пыртон — со котьку шумпоттӥсь ивор. Кыӵе ке гуртын нырысетӥзэ бадӟым ужрад радъяське ке, со кык полэс бадӟым шумпотон. Та калыклэсь гуртэзлы мылкыдо луэмзэ но гуртлэсь азинскемзэ возьматэ. 
Тани Ӟаныын но туэ сыӵе бадӟым но чебер ужрад ортчиз. Солэн мылкыд ӝутӥсьёсыз луо Ӟаны гуртысь кузпалъёс — Олег но Лариса Мамыковъёс. 
— Мынам кемалась потэ вал ини вань гуртоосме люкаме но соосты куасэн бызьылонэн тунсыкъяськытэме. Ато куасъёс школаын гинэ кылизы ни. Отын но трос мылкыд карисез ӧвӧл. Кӧня ке малпаськыса, калык шулдыръяськыса шутэтскыны мед быгатоз шуыса, сое Вӧйдырлы тупатӥмы. Озьы дасяськон борды кутскимы. Валтӥсь спонсоръёс асьмеос луимы. Коньдонэн но юрттӥсьёс вал, кин ке табань дасяз, шудонъёсын юрттӥсьёс лулчеберетъя юртысь Алефтина Иванова но Михайловъёслэн семьязы луизы. Праздник ортчытэмлэн йылпумъянъёсыныз туж мылкыдо кылимы, ведь валтӥсез: кинлы гинэ ӧм вазиське, ваньзы милемлы поддержка сётӥзы, пумит ӧз кариське. 
Кылкутон бадӟым татын, веранэз ӧвӧл. Ваньзэ рос-прос малпаськоно, озьы ке но мар ке кыле. Сюлмаськиськод, люкаськоз-а калык, уз-а... Инмарлы тау, ваньмыз умой ортчиз, — люкиськиз мылкыдъёсыныз Лариса Григорьевна.

— Таӵе ужрад ортчытыны кемалась малпанъёсамы улэ вал ини. Гурт калыкез кызьы ке выртоно, маин ке тунсыкъяськытоно, дорын пукыса гинэ гуртлэсь улонзэ азьланьтыны уг луы ведь, — йылэтӥз Олег Аркадьевич.

— Гажано гуртоос но лыктэм куноос! Ваньдылы бадӟым тау, кин мыло-кыдо «Вӧйдырез келян» ужрадэ пыриськиз. Бадӟым тау, кин коньдонэн юрттӥз (Лев но Людмила Мамыковъёс, Алексей Николаевлы, Алефтина Ивановалы, Ирина Чупановалы, Геннадий Ефремовлы, Руслан но Татьяна Михайловъёслы). Озьы ик тау, кин ужрадэз ортчытыны юрттӥз: Александр но Серафима Николаевъёслы, Павел но Ольга Тихоновъёслы, Юрий Кунаевлы, Ольга Кунаевалы, Светлана Павловалы. Ӵошен гинэ вань секытъёсты ортчыны но сюлмысь шутэтскыны луэ. Ваньдылы ваньзэ умойзэ гинэ сӥзисько, — таукаронъёссэс вуттӥзы кузпалъёс.
Зэмзэ но, татын нылпиослы но, бадӟымъёслы но шутэтскон сэрег радъяськиз. Пичиос нискылазы но пӧртэм шудонъёсы пыриськизы. Бадӟымъёс понна туж паськыт программа радъяськиз: огшоры но пӧйшуран куасъёсын ӵошатсконъёс, ыбылӥськон, урамъёс куспын мини-футбол. Берпуметӥяз вормем командалы нимысьтыз кӧчись кубок но дасямын вал, со Коммунаров ураме кылиз. Котькуд нимаз ӵошатсконын вормем но призо инты басьтэмъёс медален, коньдоно конвертэн но ведра чечыен пусйиськизы. 
Эшшо одӥг гуртын выль йылол кылдӥз. Оскисько, та ужрад азьланяз аслэсьтыз масштабзэ паськытатыса, быдэс ёросмылы тодмо луоз на! 

Покчи Лӧзя

Тулысэз пумитан одӥгез тужгес яркыт но шулдыр праздник луэ. Со ортче калык пӧлын, жингрес кырӟанъёсын но задоресь эктонъёсын. Покчи Лӧзя гуртын но котькуд праздник шулдыр радъяське. Татын трос тырше лулчеберетъя юртысь устолыкъя кивалтӥсь Галина Петрова. Аслэсьтыз кужымзэ жалятэк, со котькуд ужрадлы аспӧртэмлыко шӧм пыртэ.
— Вӧйдырез келянлэн валтӥсь спонсоръёсыз «Сурнай» общество (кивалтӥсез — Тауфик Гилязов) луиз, со котькуд ужрадэз ортчытыны юрттэ. Озьы ик бадӟым люкетсэс пыртӥзы «ЭЛВИ—ПЛЮС» общество но солэн кивалтӥсез Сергей Плотников, «Фармат» магазин но ноку пумит уг луы. Ильмир Султановез но пусъеме потэ, туж юрттэ. «Ялтра» но «Берёзка» магазинъёс табаньлы сиён-юон сётӥзы. Коньдонэн юрттӥсьёсмы ӧй луысалзы ке, ужрадъёслэн шӧмзы но мукет луысал. Сомында кузьымъёс вал! Зарезь мында! Ваньзылы туж кельшиз, калык ӝутскем мылкыдэн кошкиз. Ӵукнаяз туж трос ӟеч кылъёс веразы, — шумпотэмзэ вераз Галина Денисовна.

Ярак-Чурма

Вӧйдыр — одӥгез шулдыр праздник, кудӥз тол праздникъёсыз йылпумъя но тулыс вуэмез ивортэ. Котькуд аре сямен, туэ но Ярак-Чурма нылпи садэ ветлӥсь пиналъёслы туж чебер но шулдыр ужрад радъяськиз. Со милям ӟеч сяме пыремын ни. Быдэс арня ӵоже нылпиос дасяськизы та праздниклы. Ортчизы вераськонъёс, кызьы шулдыръяськиллям азьло дыръя, дышетӥзы кырӟанъёс, эктонъёс, закличкаос. Лэсьтӥзы сульдэр. 28 тулыспалэ Ярак-Чурма покчиёзо школа-нылпи сад азьын шулдыръяськон луиз. Нылпиос дышетэм кырӟанъёссэс быдэстӥзы, ӧтизы куное Масленицаез, мыло-кыдо пыриськизы котькуд шудонъёсы. Праздник пӧсь табань сиёнэн йылпумъяськиз.
Ивортӥз Мария Матвеева

Туспуктэмъёс: В. Фёдоров, Г. Петрова, Юлия Щербакова, Т. Васильева, А. Иванова