Безнең авыл Плющенкосы яки...

Туганым Тәлгать тә бозга чыга һәм егылып, аягын авырттыра. “Татарстан” хуҗалыгында гараж мөдире булып эшләгән чагы иде дип хәтерлим. Билгеле, “нәрәт”кә – көн саен үтә торган белгечләр җыелышына йөри алмый Тәлгать. Шундый  “нәрәт”ләрнең берсендә ул чактагы рәис Рамил Нотфуллин коллегаларыннан аның хәлен белешә: “Безнең Плющенконың ни хәле бар?”... Дөрес, аңа карап, Тәлгатькә бу кушамат ябышып калмады. Әмма авылларда, районыбызда әле дә балалары белән бергә спорт белән шөгыльләнүче әтиләр турында ишеткән саен шушы хәл искә төшә.

–Районыбызда спортчы гаиләләр бик күп, – ди бу хакта кызыксынгач, район яшьләр эше һәм спорт бүлеге мөдире Рөстәм Заһидуллин. – Ләйсән-Азат Әхмадуллиннар, Алсу-Рамил Нигъмәтҗановлар республика ярышларында урыннар алды. Кече Лызидан Григорьевлар, Кенәдән Ибраһимовлар, Соснадан Ситдыйковлар, Пыжмарадан Шәфигуллиннар, Чепьядан Мортазиннар... – бәхеткә, мондый актив гаиләләребез һәр авылда диярлек бар. Рифат Зарипов, Булат Исрафилов, Булат Зыятдинов, Эмиль Гарипов, Альберт Бәзәгытдинов, Айдар Хәйретдинов, Глеб Давлеков... – балалары белән даими шөгыльләнүче, спорт залларына, ярышларга йөрүче әтиләребез дә шактый. Һәм алар елдан-ел арта. Бу бик сөендерә.