Җәмгыять

Ихлас йөрәктән чыккан рәхмәт сүзләре

Ильнур, 4 сентябрь 2017 - 17:26

4875

Зәңгәр күктә оча ике кошкай, Чиксез бәхетлеләр парлыга. Иң-иң гүзәл җырын алар җырлый, Сөю белән карый парына.

Оя корган саф мәхәббәт белән,
Кошчыклары - олы шатлыктыр.
Кошларның да теләкләре изге -
Тату яшәү, тигез картлыктыр.

Бәхетләре мәңге булыр иде,
Давыл чыгып, ярын алмаса.
Чут-чут килеп сайрашырлар иде,
Язмыш дигәннәре аяса.

Җилләр-давылларның да көчлесе,
Җиңмәстәй авыры була шул.
Каерыла канатлар, сыналар,
Йөрәккә ут булып тула шул.

... Зәңгәр күктә оча нәни кошкай,
Үзе генә, ялгыз нибары.
Сайравы да үзәкләрне өзә,
Сагыну-сагыш тулы моңнары...

2017 елның 21 августы әнә шул шигъри юллардагы кошчыктай минем дә пар канатымны каерды. Яраткан тормыш иптәшем, балаларымның газиз әтисе, туганнарына таяныч-терәк булырдай уңган куллы Илһамым (Җамалиев Илһам Рафаиль улы) арабыздан мәңгелеккә китте. Тормышыбызны күркәм итеп төзеп, тәүфыйкълы балаларга сөенеп яшәгән мәлләрдә күгебезне, әйтерсең, кара болыт каплады. Салкын җәйнең азагында җылы көннәр бүләк иткән август ае безнең йөрәкләрне өшетте генә.

Әйтеп аңлата алмаслык авыр минутларда янәшәбездә терәк булган якыннарыбызга, әти-әниләребезгә, туганнарыбызга, күршеләребезгә, дусларыбызга, үзебезнең классташларыбызга, Балтач урта мәктәбе коллективына, кызларыбызның классташларына, аларның әти - әниләренә, озынайтылган көн группасының район методик берләшмәсенә нинди генә рәхмәтләр әйтсәк тә аз булыр. Үзем белем-тәрбия биргән укучыларымның, аларның әти-әниләренең янәшәдә булуы да җаннарны җылытты. Исемнәрен аерып әйтмәгән якын кешеләребез зинһар үпкәләмәсен. Һәммәгез һич кайгы-хәсрәт күрми, тигезлектә, иминлектә яшәгез. Пар канатлар каерылмасын, якыннарны югалту ачысын татырга язмасын.

Аллаһ безгә күркәм сабырлык биреп, тормыш иптәшем, кызларымның әтисенең гүрләрен якты кылса, урынын җәннәт түрләрендә насыйп итсә иде.