Рәшит Сафин – асылташыбыз иде

1 май көнне Балтачта яшәүче кызым, кинәт авырый башлагач, аңа чылтыратканнар. "Мин чит илдә әле" - дип җавапланган ул. Профилактикада, дәвалануда гынадыр дип уйладым. Яман чир белән җәфалануын, операция дә кичерүен, инде соңгы 2 елда Германиядә дәваланып кайтуын ишеткәнем бар иде. Германиядә нурланыш - радиацияләрне артыгын алганмы, аннан "каталка" да кайтарганнар инде. Өендә үләсе килмәгәндер, үзенең шәкертләре кул астында, нәкъ 45 ел элек үзен эшкә алган, беренче авыруларын кабул иткән, кем әйтмешли, туган хастаханәбезгә - Балтач районы үзәк хастаханәсенә салуларын сораган. 25 май, кич, элемтәгә чыккан идем, хатыны:авырып тора әле, диде. Иртән тавышларым аша реанимациядә булуын ук ишеттем, ә кичкә өзелгән. 27 майга соңгы юлга озаттык. Районыбызга гына түгел, ә бөтен республикабызга горурлык иде ул!

Ямьле май аеның ахыргы көннәре республикабыз, Балтач районы халкына олы кайгы алып килде. Республика клиник хастаханәсендә эндоскопия хезмәтенә нигез салучы, оештыручы һәм аны махсус хезмәт итеп аякка бастыручы табиб, РКБның эндохирургия бүлегенең элекке мөдире, СССРның сәләмәтлек саклау отличнигы, Татарстанның һәм Россиянең атказанган табибы Рәшит Шәрип улы Сафинның йөрәге тибүдән туктады. Бөтен гомерен республикабыз халкының сәләмәтлеген саклауга багышлаган, дистәләрчә мең кешеләрнең гомерен саклап калган игелекле, изге җан үз-үзен генә саклап кала алмады шул. Инде 40 елдан артык үзен һәм аның данлы эшләре хакында белсәм дә, узган ел ноябрь мин шул бүлектә операция ясатып, авырулардан һәм анда эшләүче медицина хезмәткәрләреннән Рәшит Шәрипович хакында берсеннән-берсе җылы фикерләр ишетеп, мәкалә язу теләге туды. РКБ дан кайткач, рәхмәтемне дә белдерим дип, янына кердем. Әмма, бераз уйланып торгач: "Бик ашыкма, үзең дә унайланып җит" - диде. Үзенең савыгасына, яшәячәгенә ышаныпмы, ашыктырасы килмәгән иде Ришад Шәриповичның, көзгәрәк, 70 яшьлегенә дип уйлады.

Дәвамы бар.

Рамазан Фәрзиев.