27-тӥ шуркынмонэ быдэс дуннеын Удмурт кыллэн нуналыз пусйиськиз

Та нуналэ, Удмурт кыллэн нуналэзлы сӥзьыса, асьме районысь удмурт кылэз дышетӥсь школаосын но пӧртэм ужрадъёс ортчизы.

Ципья школа Удмурт кыллэсь нуналзэ бадӟым карыса пусйиз

Ципья школа котьку аслаз узыр географиеныз, узыр йӧскалык составеныз данъяськиз. Татын куспазы тупаса уло бигеръёс но удмуртъёс, ӟучъёс но поръёс. Котькуд праздникез но соос ӵош шулдыръяськыса ортчыто. Удмурт кыллэсь нуналзэ пусъёнэ но мыло-кыдо пыриськизы ваньзы татын дышетскисьёс, озьы ик тросэз дышетӥсьёс но. Школае пыремен валче ик син азе йӧтӥз ӝӧк вылын сылӥсь коробка. Отын « Акция «Удмурт кыл мон понна» шуыса гожтэмын вал. Та акцие трос нылпиос пыриськиллям, луоз — коробка туж секыт луэм вал ни. Покчи классъёсын дышетскисьёс понна асьсэ киынызы лэсьтэм закладкаослы, шор классъёсын — «Мон — удмурт»  суредъёслы конкурсъёс радъяськизы. Паймоно кадь: покчи нылпиослэн гинэ но макем узыр вылэм фантазизы! Огшоры кагазлэсь гинэ ӧвӧл, басмаослэсь но лэсьтӥллям, пӧртэм бисеръёсын но чебермаллям закладкаоссэс. Нылпиослэн вань ужъёссы — закладкаос но, суредъёс но — поттэмын вал коридоре интыям адӟытонэ. Соин школалэн холлаз перемена дыръя бадӟым экранын мультфильм возьматыкузы но тросэз нылпиос мультфильм интые киужъёсты учкизы. Но мультфильмез учкисьёс но трос люкаськизы: покчиос гинэ ӧвӧл, бадӟым классъёсын дышетскисьёс но итӥськизы.

— Куд-ог нылпиос удмурт мультфильмъёс вань шуыса воксё уг тодо вылэм. Соин но ми, удмурт кылъя дышетӥсьёс, та нуналэ нылпиослы одно ик удмурт мультфильмъёс но фильм возьматыны кулэ шуыса малпамы, — вера Ираида Анатольевна Чернова, Ципья школаысь удмурт кылъя но литературая дышетӥсь.

Бадӟым переменае холлын шулдыръяськонъёс но ортчытӥзы. Максим Григорьев мызганэн шудӥз. Нылпиос гинэ ӧвӧл, дышетӥсьёс но кырӟазы-эктӥзы. Кылсярысь, ӟуч кылъя но литературая дышетӥсь Ираида

Евгеньевна Жукова но библиотекарь Мария Евгеньевна Васильева «Купанча» кырӟанэз быдэстӥзы.

— Мылкыдмы ӝутскемын вал милям, кырӟаммы потӥз. Ми удмуртъёс ук, соин но та празднике пыриськеммы, кызьы ке но асьмелэсь пичи люкетмес пыртэммы потӥз. Нылпиос ми шоры учкыса шумпотӥзы. Ми оскиськом, соос но удмурт луэменызы данъяськозы, — пусйизы соос.

Покчи Лӧзя школаын но удмурт кылэз данъяло

Покчи Лӧзя школа но Удмурт кыллэсь нуналзэ пусъён праздниклэсь палэнэ ӧз кыльы. Татын но удмурт кылъя но литературая дышетӥсьёс — Ольга Мироновна Пчельникова но Наталия Львовна Антонова — дышетскисьёс понна тунсыко ужрадъёс радъяны ранӟымтэзы. Бадӟым классъёсын дышетскись нылпиос понна радъямын вал тунсыко викторина, возьматэмын вал удмуртлыкен герӟаськем видеороликъёс. Шӧдскиз, дышетскисьёслы таӵе ужрад тунсыко потӥз шуыса. Нылпиос ваньмызлы юанъёслы ответ ӧз ке но шедьтэ, асьсэлэсь активной луэмзэс возьматӥзы.

Со сяна, Покчи Лӧзяысь дышетскисьёс доры куное ми но, редакциын ужасьёс, вуимы — мон но валтӥсь редакторлэн «Азьлане» газетъя воштӥсез Ольга Плотникова. «Азьлане» газетлэн историез, туала югдурез сярысь, редакциын ужам адямиос сярысь верамы. Газет сяна, сайтэн герӟаськем ужъёс сярысь но мадимы. Малпасько, дышетскисьёслы милям верамъёсмы тунсыко потӥзы, дыр, шуыса.

— Али уд ке но валаське, тӥледлы удмурт кыл кулэ шуыса, берлогес валалоды. Кытчы мынӥды ке но, кытын луиды ке но, удмурт луэмды сярысь вераны эн возьдаське. Удмуртлык асьмелэн вире пыӵамын. Кызьы ӧд тырше ке но ӟуч кылын вераськыны, эн вунэтэ: малпаськиськоды тӥ удмурт кылын, малы ке шуоно тӥ — удмуртъёс, — шуизы дышетӥсьёс, ужрадлы йылпумъян лэсьтыса.

Праздник нуналэ ӧвӧл ке но, Покчи Лӧзя школаын мукет нуналаз покчи классъёсын дышетскисьёслы возьматӥзы мультфильмъёс, озьы ик бадӟым классъёсын дышетскисьёс понна та нуналъёсы «Пузкар» киноез возьматыны малпамын.

Праздник мылкыдмес эшшо но ӝутыса, дышетӥсьёс милемлы удмурт орнаментъёсын чебермаса ас киынызы лэсьтэм закладкаосты кузьмазы.

Удмурт кыллэн нуналыз — Шор Кушкет школаын

Шор Кушкет школа но Удмурт кыллэсь нуналзэ сӥё-дано карыса пусйиз.

Мукет сямен луыны но уг быгаты, дыр — та школаын тросэз дышетскисьёс но, дышетӥсьёс, директорысеныз кутскыса — удмуртъёс. Татын борддоръёсыз гинэ но удмуртлыкен пыӵамын. 

— Ӵукнаысен гурламы. Школае пырыкузы ик котькинлы Удмурт кыллэн нуналэзлы сӥзем пус (логотип) сётэмын вал. Борддоръёсы юнматэмын вал ӟеч кылъёс («ӟечбур», «тау», «вождэс эн вае», «таза лу», «ӟеч луэ» но мукетъёс. Ӵукнаысен чузъяськизы удмурт кырӟанъёс но гуръёс. Школьной радиоузел пыр ивортӥзы та нунал сярысь. Мылкыдмы зэмос праздник дыръя кадь вал, — шуыса ивортӥз Шор Кушкет школаысь удмурт кылъя но литературая дышетӥсь Мария Петровна Николаева.

Зэмос праздник пӧрмем ик ӟаныослэн — туспуктэмъёсъя гинэ но адске, ваньзы — нылпиос но, дышетӥсьёс —  но удмурт дӥськутэн пальпотыса шулдыръясько. Римма Николаевна Петровалэн, анай кылъя дышетӥсьлэн, верамезъя, нылпи садысь пиналъёс но мылысь-кыдысь та ужрадэ пыриськиллям. Соос удмурт сямен задор эктэмзэс возьматӥлям.

Удмурт кыллэн нуналыз туэ нырысьсэ гинэ пусйиськиз ке но, та нунал асьме калыкмылэн бадӟым историяз пырыса мед кыльысал. Трос аръёс, дауръёс ортчыса но, удмурт кыллэн нуналыз вань шуыса, адями медаз вунэты вал. Нош али данъяськыса вераны быгатӥськом: Балтась ёросысь удмуртъёс но та дунневыл ужрадэ мыло-кыдо пыриськизы. Та асьме понна туж шумпотымон.