Адями аслэсьтыз шудбурзэ ачиз дуре

1980-тӥ ар. Тросэзлы та лыдпус Москваын ортчем гужем Олимпиадаез тодаз вайытэ, дыр. Со вакытэ Балтась ёросысь исполкомлэн физической культурая но спортъя комитетэзлэн председателезлэн Александр Кунаевлэн но та шаермы понна шӧдскымон бадӟым событие луэм ужрадэ мыныны путёвкаез кияз луэ ини. Но Ӵапак гудырикошкон (август) толэзе спорт удысын тыршись адямилэн ужан сюресэз чутрак мукет пала коже. 8-тӥ гудырикошконэ 1980 арын Александр Михайлович Кунаевез район газетлэн удмурт отделаз валтӥсь редакторлэн воштӥсезлэн интыяз тодмосто.

Александр Кунаев 1946 арын 8 толсуре (декабре) Ӟаны гуртын колхозникъёслэн семьяязы вордӥське. Атаез, Михаил Прокопьевич, «За отвагу», «За взятие Берлина» медальёсын, III степенё Слава орденэн пусъем Быдӟым ожысь ветеран вал.

1965 арын Ципья шоръёзо школаез йылпумъя. Ӟаныысь 7 аръем школаын дышетскыкуз, со «Вормон» но «Дружба» колхозъёсын валъёсты возьма. 4-тӥ классэ йылпумъямез бере ик, турын люка, бусы уже пыриське. Собере комбайнёрлэн юрттӥсез, плугарист луыса но ужа.

1965-1968 аръёсы Советской армиын служить каре, отделенилэн командирез луэ. Армиысь бертэм бераз, Ӟаны школаын директорлэн хозяйственной ужъёсъя воштӥсез луэ, физкультураен но дышетэ. 1970 арысен 1980 арозь Балтась исполкомысь физической культурая но спортъя комитетлэн председателез луыса ужа. 1975-тӥ арын, УдГУ-ысь физической воспитаниея факультетсэ заочно йылпумъя. Спорткомитетын ужакуз нылпиос пӧлын «Сурон туп», «Зарни шайба» призъёслы Ӵошатсконъёсты радъясьёслэн одӥгез луэ. Нош 1980-тӥ ар улон но ужан ӧрзэ берыктэ - «Азьлане» газетэ вуттэ. Чылкак мукет удыс, мукет коллектив. Со сяна, воксё син азе пуктыны луонтэм кылысь кылэ берыктон уж. Туж секыт вал выль ужез мытыны, мылкыд куашкан, киосыз лэзиськем дыръёсыз но луизы, дыр. Но улон шуонэд ваньзэ ас интыяз пуктэ. Пумен Александр Михайлович но выль ужан удысэзлы дыше, быгатонлыкъёсыз шараясько, воляло. «Азьлане» газетэз поттэменыз ӵош со общественной ужъёсы но мыло-кыдо пыриське. Озьы ик удмурт калыклэсь лулчеберетсэ ‡утонэ но бадӟым люкет пыртэ. Районын удмурт культурая обществоез кылдытӥсьёслэн одӥгез луэ. 1993 арысен 1997 арозь со обществолэн правлениеныз кивалтэ, районысь удмуртъёслэсь 2-тӥ, 3-тӥ съездъёссэс ортчытонэ пыриське, районысьтымы удмуртъёслэн НКА-зылэн Правлениезлэн членэз луэ. Александр Михайловичлэн кичӧлтэмезъя кык арлы огпол «Жингырты, удмурт кырӟан!» ним улсын фестиваль ортчытон пумысен решение кутэмын вал. Редакциын ужаса, районын улӥсьёсты «Азьлане» газет пыр удмурт калыклэн уно гинэ ожысь ветеранъёсыныз тодматӥз, соос сярысь трос статьяос гожтӥз. Со сяна, солэн кичӧлтэмезъя, газетын Балтась удмуртъёслэн вашкала кырӟанъёссы потыны кутскизы. Районын улӥсь удмуртъёслэсь вашкала дырысен выжыысен выжые кӧчем сям-йылолъёссэс люкаса газетэ поттонэ но со туж уно кужымзэ но быгатонлыксэ понӥз. Александр Кунаевлэн тыршемез бервылтэк ӧз кыльы, со дасо Ушъян грамотаосын, Дипломъёсын пусъем мурт. Район газетлэн коллективаз но со мур гажамон адямилы пӧрмиз: егитэз но, мӧйыгесэз но со сярысь шуныт, ӟеч кылъёс гинэ вера. Угось со ас ужезлэн усточиез.

Бен, куке но ужан сюресэз воштӥськиз, соин валче улон сюресэз но, дыр. Но жаля меда со пумысен Александр Михайлович? Малпасько, уг, дыр, малы ке шуоно ӧкынымон ӧй вал со ортчем сюрес. Мазэ веранэз, луизы, дыр, котькинлэн кадь ик, выро-гопо интыосыз. Но быгатозы шат соос могӟет кылдытыны, куке ас уждэ яратӥськод, куке тонэ гажало но куке вӧзад оскымон адямиосыд вань - эшъёсыд, ӵыжы-выжыосыд но яратоно семьяед. Нош семьяез Александр Михайловичлэн зэмзэ но адӟем карымон. Кузпалэныз Ольга Валерьяновнаен тани 45 ар ӵош ваче кутӥськыса, ог-огзылы пыкет луыса уло соос. Ольга апайлэн каньыл мылкыдыз, ӟеч сюлэмыз, небыт кылыз, тынӥсь сямыз синмаськымон. Котькуд лыктэм муртэ аслэсьтыз матысь ӵыжы-выжызэ кадь куно кароз со. Семья улонын шуг-секытъёс луытэк уг кылё. Кунаевъёслэн но секыт дыръёссы луо. Но озьы ке но, ог-огзылы юрттыса, ог-огзэс валаса но тупаса, со могӟетъёсты соос вормо, асьсэос кадь ӟеч сямо нылпиос будэтыны, умой тодон-валан сётыны быгато. Анай-атай шудо, нылпиоссы шудо ке. Туннэ нуналэ Ольга Валерьяновна но Александр Михайлович шудо анай-атай, яратоно песянай-песятай но ӵужанай-ӵужатай. Сергей пизы но Люда нылзы асьсэос семья кылдытыса умой гинэ уло, ужало, нылпи будэто. Вить внукъёссы но Кунаевъёслы улыны кужым но мылкыд ватсало, улонзэс пуштросъем но шулдыр каро. Та бадӟымлэсь но бадӟым шуд ук!

Зэмзэ но, Александр Михайлович аслэсьтыз шудбурзэ ачиз дуриз, улон солы ӧжытак юрттӥз, шонер ӧр сётӥз гинэ.

Гажано АЛЕКСАНДР МИХАЙЛОВИЧ! Сюлмысен ӟечкыласьком Тӥледыз 70 аресъем юбилееныды! Сӥзиськом юн тазалык, бадӟым шудбур но трос шумпотон. Висьытэк, куректытэк, нокыӵе шуг-секытъёслы но ортчись аръёслы сётскытэк, котькуд ӵук ӟардонлы шумпотыса, вордэм нылпиостылэсь но внукъёстылэсь ӟечсэ гинэ адӟыса, кема-кема улыны мед кылдоз.

Мур гажаса район газетлэн коллективез