Акашкалы дасесь-а ини?

Вукогуртъёс но арлы быдэ Акашкаез шумпотыса витё. †ем кылоно луэ таӵе вераськонъёсты: «Курегъёсты пузало-а ини? Трос-а люкаськиз курегпузды Акашкалы? Кӧнязэ пӧзьтоды, кыӵе буёло буялоды?» Гуртамы улӥсьёс, шорлыдын вераса, 50 яке 100 пала курегпуз буяса дасяло. Пыжиськемзэс (куличсэс) но буям курегпузъёссэс, кудыосазы тырыса, черке вӧсяны нуо. Та нуналэ туж вазь ӵукна анай сайкатоз вал: «Султэ ӝоггес, шундылэсь шудэмзэ адӟытэк кылёды, мон учки ини - солань-талань тэтчаса, шунды яркыт пиштэ».

Акашка нуналэ вазь ӵукна ик нылпиос, чебер выль дӥськутъёсын дӥсяськыса, кудыосын курегпуз бичаны пото. «Христос кулэмысь улӟыса султэм! Зэм но улӟыса султэм!» - шуыса вазисько. Котькуд коркан соосты шумпотыса, капказэс вӧлак усьтыса пумитало, мылысь-кыдысь сётъяло чебер буям курегпузъёссэс. Собере нылпиос куспазы ушъясько, кинлэн трос но чебер буёло курегпузъёссы люкаськемын.

Лымы шунаса пичи кесэг ке но возь потэмын ке ни, вукогуртъёс люкасько курегпузэн шудонэз учкыны. Соку воргоронъёс потто ини валлэн сиеныз тырмытыса нимысьтыз вурем тупсэс (солэн формаез огшоры туплы уг кельшы), кудзэ арысь аре утьыса возе тужгес оскымон адями. Шонер гож вылэ (гожлэн пумъёсаз боды бышкалтоно, капка выллем) котькудӥз шудӥсь одӥг радэ, кусып кельтыса, ыль яке буям курегпуз пуктэ. Собере кутско ини тупез питыръяса курегпузъёсты утылыны. Тани шудӥсь тупеныз курегпузэз йӧттӥз-питыртӥз, ачиз, шумпотыса утэм курегпуззэ басьтыны бызьыса мынонъяз, ӵемтаськыса кӧт вылаз усе! Калык гурак серекъя. Нош таиз шудӥсь кужымзэ ӧз чакла - тупез зол питыртыса, ыль курегпузэз пазьгытӥз. Таизлы но ӧз удалты - туп курегпузъёс вискытӥ ортчиз. Соос ӧжыт кылемъя, шудӥсьёс тупэз матысенгес лэзьяло.

Кӧня ке рад шудэмзы бере, пумаз луэ «потон гу». Тупез питыръяло кык поллы кыдёкысен, шудӥсьлэн тупез «капкае» ӧз ке пыры, палэнтӥ ке кошкиз - пиосмурт шудонысь потэ. Татын ини огезлы, тупез тужгес шонер питыръясь воргоронлы, туж удалтэ - вань курегпузъёсты со утэ. Курегпузэн шудон йылпумъяськем бере, егитъёс задормыса волейбол, футбол шудо. Шулдыръяськем беразы, ӵыжы-выжыоссэс ӧтчаса, котькуд коркан вӧсясько, ческыт сиён-юонъёсын, пыжиськемъёсын куноясько.

Вукогуртысь воргоронъёслы вазиськеме потэ: таӵе сямдэс ӧд вунэтэ, дыр, ук, тупдэс ӧд ыштэ на-а? Туэ куазь чебер луоно кадь, дасяське Быдӟымнуналэз - Акашкаез - ӟеч данъяны.