Анай кыл котькудӥзлэн аслаз

Туннэ, 21-тӥ тулыспалэ Анай кыллэсь калыкуспо нуналзэ пусйиськом. Соин валче ми пӧртэм выжыысь аспалъёсмы пӧлын юалляськон ортчытыны малпамы. Юанмы таӵе вал: мар соос понна анай кылзы но макем ӵем соос куто сое улонын? 

Валэктонъёс сётӥзы удмурт, бигер, пор но ӟуч выжыысь пӧртэм удысын тыршись адямиос. 

Александра Раимова,
Тагашур гурт:

— Анай кыллэсь кутске нырысь вераськон. Мынам вордскем кылы — удмурт кыл. 
Анай кыл мон понна — со ас котырысь улонэз валан, йырвизьмын но сюлмын адямилык мылкыд кылдытон. Анай кыл — со аспӧртэмлыко сям, дор, анай-атай, калык кырӟан чуръёс, эшъёс, ӟеч мылкыд. Сюлмысь шуныт, югыт малпанъёсты анай кылын сяна уд быгаты сыӵе яркыт возьматыны. Вераськыны кутскем дырысеным анай кылме нунналлы быдэ улонам кутӥсько, анай кылме туж яратӥсько но соин данъяськисько.

Лиана Фёдорова,
Улисьял гурт:

— Анай кыл мон понна со мынам кыкетӥ шокчонэ кадь, сюлэм жугиськонэ кадь. Аслам анай кылыным вераськисько ке, мон шокасько, мон улӥсько. Мон туж яратӥсько анай кылыным вераськыны, мон сое уже кутӥсько тросгес гуртын. Анай-атаеным, семьяеным пор кылын вераськисько. Ужакум но (парикмахер луыса ужасько) луылэ: Марий Эл республикаысь мыным клиентъёс сюро, тӥни соосын вераськисько. Аслам анай кылыным вераськисько ке, со лул веськатон кадь. Но мон туж вожъяськисько со адямиослы, кудъёсыз уло Марий Эл республикаын но соослэн бускель гуртъёссы — со пор гуртъёс. Одӥг гуртысь мукет гуртэ мыныса, ас вордскем кылыныд вераськыны луэ. Нош мон тани Улисьял гуртын улӥсько, бускелямы бигер но удмурт гуртъёс гинэ, соин ик ӟуч кылын, я кинэн ке бигер кылын вераськоно луэ. Мон понна со кыӵе ке могӟет кадь. Тани экспедициосы ветлон дыръям, вожъяськыны кутски Марий Элысь пор гуртъёсын улӥсьёслы. Со туж умой вылэм. Мынӥськод магазинэ, нош отын ваньзы пор кылын верасько. Мон уг валаськы, тросэз тае уг дунъяло шуыса. Мон понна со лул веськатон. Мон туж яратӥсько анай кылме, сотэк чик уг быгатӥськы но котьку ас вордскем кылыным вераськыны тыршисько. Луонлык кылдысал ке, быдэс нуналъёсын пор кылын вераськысал. Но, жаляса верано, улон сыӵе, бадӟым городын улоно луэ, трос калыкен ужано луэ бере, адямиосты герӟась кыл интые ӟуч кыл кутӥське.

Гульзида Газизуллина,
Балтась каргурт:

— Мынам вордскем кылы — бигер кыл. Ӵапак бигер кылын вераськыны кутски, нырысетӥ кылъёсме верай. Берло аръёсы улонэ но анай кылэн герӟаськемын. Котькытын мед луом, котькинэн мед вераськом, кепыратэк, нырысь ик мон ас анай кылыным ӟечъяськисько. 
Анай кыл — со вашкалаосынымы кельтэм мерас, анай-атайёсын сётэм визьнодан но нылпиосмылэн азьпал улонзы. 
Ас вордскем кылме яратэмысьтым ик, профессия бырйыны дыр вуэм бере, йырме кема висьытытэк, бигер кылъя но литературая дышетӥсь луыны малпай. Вылӥ тодон-валан басьтэме бере, аслам вордскем школаям ужаны луонлык кылдӥз. Берлогес, ужан интыме воштыса, «Хезмәт» газетын журналист, нош табере веб-редактор луыса мон азьланьтӥсько анай кылыным гожъяськыны. Мынам вордскем кылы — со быдэс улонэ, улонам валтӥсь тӥрлыке.

Ольга Плотникова,
Покчи Лӧзя — Санкт-Петербург:

— Мон понна, гуртын вордскем но Санкт-Петербургын анай кылыным — ӟуч кылын — кырӟанъёс кырӟась нылаш понна, ӟуч кыл — со кылъёслэн люкамзы гинэ ӧвӧл. Со монэ выжыосыным, вордскем музъемелэн зынэныз но кырӟанъёсын герӟась улэп нюжа. Со мынам лул-сюлэмылэн куараез, кудзэ мон нуллӥсько быдэс шаер кузя, гуртлэн эркын лудъёсысеныз кутскыса кар урамъёс дорозь. Ӟуч кыл — мынам кужыме, данъяськонэ, кырӟанэ, кудзэ мон яратыса кузьмасько адямиослы. 
Нош кыӵе паймымон бадӟым кужымез ӟуч кыллэн: со паськыт вӧлъяськем шаерысьтымы вань калыкъёсты огазея, вань улӥсьёслы валамон луэ. Со кужмо но воштонтэм ёз, кудӥз Россиез герӟа, огазе возе.

Дасяз Ольга Плотникова