Анай луон — шудо луон

Мар бордын анайлэн шудэз? Валамон, гадьпус, данъет басьтон бордын ӧвӧл. Анаез шудо каро нылпиос.

Сизнер гуртын улэ паймымон кышномурт — Людмила Кузьминична Тарасова. Солэн улонэз — со нылпиосты, вордскем музъемез но ас ужзэ пумтэм яратонлэн примерез. Кемалась ӧвӧл со вылӥ кун данъетэн — «Ана даны-Материнская слава» медален — пусъемын вал. 

— Нылпиосты данъет басьтон понна уд вордӥськы, — шуэ трос нылпиё анай. — Соос ӟеч адями луыса будо ке, асьсэос гаде бырттэм медаль кадь луо. Улонам мон понна валтӥсез луэ семья, со ваньмыз, мар понна мон улӥсько. 

Сямъёс кыдало семьяын

Людмила Кузьминична 1980-тӥ арын Кускем гуртын трос нылпиё семьяын вордске. Семьяязы соос ньыль кузя пиналъёс луо, Людмила — куинетӥез. Кык апайёсыз но выныз вань. Апайёсыз бускель гуртъёсын гинэ: бадӟымез — Вукогуртын, кыкетӥез — Сырьяын. Выныз туннэ нуналэ СВО-ын.

— Апайёсын котьку ӵош улӥськомы, ог-огмы доры куное ветлӥськомы, шуг-секытъёс луизы ке, маин быгатӥськомы, соин юрттӥськомы. Нош выны — со мынам куатетӥ нылпие кадь. Анаен атаймы ӧвӧл ини милям. Куспамы тямыс ар. Алигес ныылетӥзэ сӧсырмыса госпитальын кыллиз. Табере тани нош оже поттӥзы, осколокъёсын ик... Со понна ялан сюлмаськиськом, кызьы быгатӥськом, мылкыдзэ ӝутыны тыршиськом солэсь, — синкыли пыр сюлэм вӧсьсэ шарая Людмила Кузьминична.

Вынызлы секыт луыку, сое одно вӧта вылэм апаез, сюлмыз шӧдэ, соку ик сое вӧсятыны мынэ. 

— Самый бадӟым шумпотон — нылпи ваён, самый бадӟым кайгу — нылпи ыштон, — азинтэ веранзэ кышномурт. — Соин но пиоссэс, картъёссэс ыштэм кышномуртъёслы юнлык но чидан сӥзем потэ. Соослы музъемозь йыбырттӥсько. Мон сыӵе анай ӧвӧл ке но, туж Владик выны понна сюлмаськисько... Анайлы тау, сыӵе патриотэз будэтыны быгатӥз. Али соин данъяськысал ни со. 

Адямилы котькыӵе арлыдын анай кулэ уга. Тани Людмила Кузьминична но, ачиз кемалась анай ни, озьы ке но аслаз анаез сярысь югыт тодэ ваёнъёсыз ялан сое шунто. 

— Анайлы тау, милемыз туж утиз. Сюлмыз висе вал солэн. Озьы ке но техникумын дышетскыкум, секыт шокаса ке но, келяса потэ вал монэ остановкае вуытозь. Нош остановка кыдёкын милям. «Анай, эн поты ни» шуыса но, келяса потэ вал. Нырысетӥ классэ дышетскыны Ципья школае мынӥмы. Одӥг арня интернатын улӥськом вал. Понедельниказ школае вуытозь ик келяса нуэ, эшшо пирог басьтыса кельтэ вал со мыным. Владик понна но со туж сюлмаськиз: «Люда, учкод ини сое, сютэм медаз пукы» шуылӥз, — тодаз вае Людмила. 

Валтӥсь узырлык — нылпиос 

1999-тӥ арын техникумын дышетсконзэ йылпумъям егит ныл Сизнер гуртэ кен луыса лыктэ. 

— Шуд усиз Сизнер гуртын улыны, туж чебер гурт, чебер инкуазь, калыкез но татын туж умой, — шуэ Людмила Тарасова. 

2000-тӥ арын кузпалъёслэн вордске Иван пизы, 2002-тӥ арын — Димазы, 2010-тӥ арын — Артёмзы, 2013-тӥ арын — кема витем нылзы, Ритазы, нош 2021-тӥ арын Тарасовъёслэсь семязэс быдэс каре Игнат пизы.

— Огпол гинэ но, вӧтэ но ӧз пыры, вить нылпи ваё шуыса. Но Инмар кӧня сётӥз, сомындазэ ик вайи, шуг-секытъёс вал ке но, — вера анай мурт.

Нош могӟетъёс зэмзэ но луиллям: ньылетӥ пиналзэ кышномуртлы вайыны косымтэзы вылэм ни, врачъёс тромбофлебит луыны быгатэ шуыса вераллям. Но Людмила Кузьминична дӥсьтэ: ньылетӥзэ но, витетӥзэ но вае.

— Туж бадӟым тау кузпалэлы, Виталийлы, солэн дурбасьтэмезлы, юрттэмезлы луыса, мон туннэ асме шудо анай шуыны быгатӥсько. Котьма ласянь юрттэтэ но пыкетэ со мынам, — кузпалзэ мур гажамез сярысь вера кышномурт.

Семьяысь кусыпъёс нылпиос вылын но туж юн шӧдӥсько шуыса малпа Людмила.

— Анай-атайлэсь адӟем карыса уло ук соос. Аслам опытэя верасько: кызьы анай-атай улэ, озьы ик улыны тыршо нылпиос но. Тани соос адӟизы ке, ми ог-огмес яратыса, гажаса улӥськом шуыса, ог-огмес кылзыны но кылыны быгатӥськом шуыса, соос но озьы ик улозы шуыса оскисько, — малпанзэ вера со.

— Семьялэн шудэз ма бордын? — юасько.

— Нылпиос сӧл-таза луизы ке — со самой бадӟым шуд. Соослэн ваньмыз умой луиз ке: ужазы но, дышетсконазы но, проблемаоссы ӧз луэ ке — мыным но умой. Нош шуг-секытъёс кылдо ке, соосты ваньмы ӵош, семья куспын быдэстӥськом, — шуэ Людмила.

Вить нылпи — вить пӧртэм сям 

Тарасовъёслэн юртазы котьку ӵаш потто. Вить нылпиос — со вить пӧртэм сямъёс, вить адӟонъёс, кудъёссэ анай шонер ӧре пыртэ. 

— Бадӟымез пимы Иван, пичи дырысеныз ик туж серьёзной луыса будӥз. Школаын умой дышетскиз. Армрестлинген выриз, трос грамотаосыз вань. Туэ апрель толэзе семья кылдытӥз ини. Йошкар-Олаын уло. Ваня институтэз йылпумъяз, инженер-технологлы дышетскиз. Али дыре заводын ужа.

Дима чылкак мукет. Серекъяны яратэ, вераськыны, кырӟаны но эктыны туж усто. Шулдыр ужрадъёсты туж кельшытэ. Таиз пимы Сабаын строитель-каменщиклы дышетскиз. Отын чурыт порядок вал, солы армия интые туж умой луиз со. Али улэ но ужа озьы ик Йошкар-Олаын. Ужез газэн герӟаськемын.

Куинетӥез, Артём, гитарист но пӧртэм олимпиадаослэн призёрзы, отличник. Туэ горд аттестатэн 9-тӥ классэз йылпумъяз. Ньыль аресозь вераськытэк улэм пи шуыса вералод шат сое? Вераськытэк, визь люкам, дыр, шуыса малпаськом ни ми со сярысь. «Нянь» шуиз ке, пинал вераськыны, пе, кутске, шуо калыкын. Артём но «нянь» шуиз но, вераськыны но кутскиз. Солы котьма тунсыко вал. Алфавитэз ачиз дышетскиз, ваньмызлы ачиз дышетскиз. «Анай, дышетскем потэ» шуыса, кылем арын скал кыскыны но дышетскиз. Табере мон кытчы ке кошкисько ке, со скал кыске милям. Огъя вераса, оскымон адями.

Рита туэ 6-тӥ классэз быдтӥз. Со милям спортсменка. Куас спортэн туж тунсыкъяське, нимысьтыз кружоке ветлэ. Озьы ик куасэн бызылонъя трос дипломъёсыз но грамотаосыз вань ини солэн. Нылы — мынам юрттӥсе. Солы уж уно йӧтэ. Песяймы ӧвӧл. Пичи вынзэ но учкыны тупа. Со но жадьытэ.

Покчиез, Игнат, нылпи садэ ветлэ. Со сярысь мон тазьы верасал: из улэ понӥд ке, отысь но потоз. Со милесьтым вань клеткаосмес выртэ, пересьмыны уг лэзьы. Бадӟымъёссэ нылпиосме визьноданы капчи вал, нош покчизэ секытгес: телефон борды кыстӥське. Вань кужмысь солэсь телефон ватӥськом. Но озьы ке но со но вормонъёсыныз шумпоттэ ини: куаэсэн бызьылонъя куинь грамотаез вань, кылсярысь. Покчиез бере, эркияськомы но ини. Ачиз но уйин ужысь бертыса пырыкум, шӧдэ но: «Анай, мон тонэ яратӥсько! Тон мынам самой чеберез», — шуэ. Шум уд поты шат талы?! — данъяське нылпиосыныз анай.

Нылпиос сярысь вераку, пусйытэк уг луы, Тарасовъёс трос аръёс ӵоже песяй-бабаен валче тупаса, бадӟым семья луыса улӥзы. Мӧйыос егитъёслы котькуд ласянь юрттэт но пыкет луизы. Нылпиосты утьыны-вордыны но юрттӥзы. 

— Песяймы милям строгой вал, но нылпиосмес вордӥз, умой утиз, — шуэ гажамзэ но тау каремзэ вераса, Людмила Тарасова. Жаляса верано, Евдокия Мироновна но Гаврил Егорович туннэ пӧламы ӧвӧл ни.

Гуртын котькуд пинал — со юрттӥсь но пыкет

Людмила Кузьминична вера, воспитанилэн валтӥсь секретэз — личной пример. Соос кузпалэныз асьсэос но ужаса будэм муртъёс, нылпиоссы но пичиысен ик тодо, мар со музъем вылын ужан, юртто фермаын но, муш бакчаязы но, юрт котыразы но. 

— Бен, нылпиосыз ужлы дышетоно. Нош ми дорын уж уно. Пудо но трос. Кык пичи бакчамы, кык картофка бакчамы вань. Сое утялтыны кулэ. Корка пушкын но порядок возем потэ. Пиналъёсме но чылкытлыклы, порядоклы дышетӥсько, — шуэ Людмила.

Ужез яратэменыз но музъемез яратэменыз, Тарасовъёслэн семьязы юн хозяйство кылдытыны быгатӥз: туннэ соос асьсэлэсь мини-фермазэс возё, кудӥз бадӟым семьяез сюдыны юрттэ. Озьы ик соослэн улон-вылонзылэн зэмос аспӧртэмлыкез луэ муш вордон: кызь кык умортозы вань. Со но быдэс семьяез огазеясь уж луэ. Нылпиос пичиысен ужаны дышетско, анай-атайзылы мушъёсты но гурт пудоез утялтыны юртто. 

— Шутэтскыны но дыр шедьтӥськом, — вера кышномурт. — Одӥг нуналмес жалятэк, одно ик вуэ пырыны мынӥськом ми. Люкаськиськом но кошкиськом ваньмы ӵош. Ялан ужаса улыны уг луы, шутэтскон но кулэ. Со пичиосызлы но, бадӟымъёсызлы но шумпотон луэ. 

Ужез сюлэмезъя

Людмила Кузьминична «Смаиль» обществолэн фермаяз скал кыскись луыса ужа, сое ас ужезлэн усточиез шуыса тодо. Секыт ужлы дышем киос котькуд скаллы подход шедьто. Ужам аръёсаз солэн йӧл кысконъя лыдпусъёсыз но ёросын устоосыз пӧлын. 

— Ужась киос тырмымтэен, монэ фермае скал кыскыны ӧтизы. Мынӥ, мыным скал кыскон уж кельшиз. Кин ке вералоз, туала дыре скал кыскисьлэн ужез капчиёмиз шуыса. Уг тодӥськы, луэ-а меда сое капчи шуыны. Азьло ведраен ветлоно ке вал, табере аппарат тыроно. Нош карусель дугдытэк берга. Соин капчигес луиз шуыны шонер уз луы, дыр. Воштӥськиз ужмы, таиз зэм. Озьы ке но, аслэсьтым ужме туж яратӥсько, — ужез сярысь вера кышномурт.

Фермаын 1100 скалъёсты куинь ӵошен кыско. Сменаен ужало. Нунал куспатыса.

Туала гуртысь кышномурт 

Людмила Кузьминична Тарасовалэн историез — со туала гуртысь кышномуртлэн портретэз. Со вылӥысен юрттэт уг возьма, ас киыныз ӟеч улон кылдытэ. Музъем вылын ужан, нылпиос сярысь сюлмаськон но ас ужзэ яратон — Людмила Кузьминичналэн шудэзлэн валтӥсь секретэз луэ. 

Медаль басьтон семья понна пусйымон учыр луиз. Но та нылпи вордэмез понна гинэ данъет ӧвӧл, соосты будэтонэ понэм туж бадӟым ужез понна, соосты чылкыт сюлмо, ужась но ӟеч адямиос каремез понна. Кун анайёсты пусъе, но котькуд анай тодэ: зэмос данъет — со кӧлытэк ортчытэм уйёс понна тау карон но пиналъёсызлэн азинсконъёссы понна шумпотон.