«Асьмелэн самой бадӟым янгышмы — нылпиосты кышкатон», — шуэ районысь калыкез дышетонъя управленилэн кивалтӥсез Алия Закиева.

- Нырысь ик сое вераме потэ: та ужпум милемын гинэ герӟаськымтэ. Асьме районын 80-лэсь уно адями кулэстӥськоз шуыса витиське. Арчаын та лыдпус 100-лэсь но уно. Та нылпиослэн лыдзылэн кулэсмеменызы, оптимизациен герӟаськемын. Ми школаослы, нылпи садъёслы конкретной со яке та муртэ кулэстэ шуыса ум вераське, соос та ужпумез асьсэос сэрттыны-пертчыны кулэ. Кулэстонъёс адямиослэн улонэнызы герӟаськемзэ ӟеч валаськомы, соин ик та проблемаез адямиослы луэмезъя капчигес карыса быдэстыны тыршом.

- Та проблема нылпиослэн лыдзылэн мултэсмыса мынэменызы герӟаськемын. Нылпи садъёсысь кошкись пиналъёс ӧжыт, нош вордскемъёсыз арысен аре мултэсмыса мыно. Нылпи садэ мыноноос электронной черодэ гожтӥсько. Соос арлыдзыя группаослы люкисько. Кыӵе нылпи садэ кӧня пинал лыктоноез азьвыл ик тодмо. Котькуд заявлениез нимысьтыз эскериськом. Кемалась ӧвӧл Тавзар гуртын нылпи сад усьтӥськиз, сӥзьыл Балтасьын 120 пиналлы чаклам выль нылпи сад усьтӥськоз. Таос проблемаез кӧнялы ке кулэстыны юрттозы. Туннэ нуналэ 345 пиналлы направление сётэмын, 440 пинал черодын сылэ.

- Туэ экзаменъёс реальной картинаез син азе пуктыны луонлык кылдытӥзы. Асьмелэн самой бадӟым янгышмы - пиналъёсты ЕГЭ-ен кышкатон. Соосты кышкатоно ӧвӧл, мукет сямен, стрессэз кулэстон ласянь дасяны кулэ. Дышетсконын тыршем пинал понна ЕГЭ кышкыт ӧвӧл. Туэ школаез йылпумъямъёс пӧлын но 90-92-98 балл люкам пиналъёс луизы. Пиналъёсты нимаз предметъёсъя дасям сяна, дышетӥсьёслы психолог но, социальной педагог но луыны кулэ. Юридической ласянь дасьлык но мултэс уз луы. Вакчияк вераку, пиналъёсты улыны дышетыны кулэ. Нош ик сое вераны кулэ: куд-ог дышетскисьёс туэ но темаез кытысь ке кӧчырыны оскыса улӥзы. Сыӵеос юн янгышазы. Тӥни сыӵеослэн стрессы кужмо луэм, дыр. Экзаменъёс луэм Балтась шор ёзо школаын видеокамераос азьвыл ик интыяськизы. Пиналъёс талы азьвыл ик дышыса мед вуозы шуыса, лябгес дышетскем дышетскисьёс понна нимысьтыз экзаменъёс радъямы. Видеокамера туж шерез понна выль маке луиз. Та туэ гинэ пыртэм вылез ӧвӧл, соин ик дышетскисьёс но, дышетӥсьёс но, анай-атайёс но та экзаменъёслэсь кулэ йылпумъян лэсьтозы шуыса малпасько.

- Пиналъёслэн тросэз асьме дорын шутэтскозы. Со понна вань кадь луонлыкъёс кылдытыны тыршим. Школаосысь лагерьёс ини 26-тӥ майысен ужаны кутскизы. Отын - 1020, ужъя но шутэтсконъя лагерьёсын 330 пинал шутэтскиз. Таӵе лагерьёсын август толэзе нош ик 80 пинал шутэтскоз. Нош «Романтик» лагерьын 16-тӥ июньысен 22-тӥ июнёзь 90 пинал шутэтскиз. Азьпалан луоно кык сменаын нош ик 246 пинал шутэтскоз шуыса витиськом. Татын сое но вераме потэ: Казаньысь лыктэм нимысьтыз комиссия «Романтик»-лэн дасьлыкезлы вылӥ дунъет сётӥз. Та понна районэн кивалтӥсьёслы, та уже пыриськем котькинлы мур тау каремме вуттӥсько. Рашит Ильясовен кивалтоно коллективлы, та уже активно пыриськем школаослэн коллективъёссылы но тау каронэ пумтэм.