Асьмелэнъёсты тоды

Ортчемез 2022-тӥ ар ваньмы понна но секытэн сётӥськиз. Шаерамы кылдэм югдур, мобилизация трос семьяосты йӧтӥз. Одӥгез сыӵе семья — Вукогуртысь Лобановъёс. Галина Валентиновна но Василий Меркурьевич Лобановъёслэсь но бадӟым Алексей пизэс мобилизациен валче нимысьтыз ожгар операцие келязы.

— Кӧня синкыли кисьтӥськиз соку, вераса быдтонтэм.., — шуэ Галя апай, со нуналъёсты тодаз вайыса.

Кемалась ӧвӧл Лобановъёслы шумпотон ивор вуэм: Алексей пизэс ушъяса, ожгар ужпумзэ быдэстон интыысеныз ёросысь военной комиссариатэ Таукарон гожтэт келяллям. Тӥледлы но, газет лыдӟисьёсмы, ӵектӥськом анай-атайлэсь пиенызы данъяськон мылкыдзэс люкыны, со гожтэтэн тодматскыны:

«Таукарон гожтэт

Вазиське тӥледлы 2-тӥ мотострелковой батальонлэн майорез Сысоев Руслан Александрович. 2022-тӥ арын шуркынмонлэн кутсконысеныз <…> мыным оскем подразделение Вылӥ Главнокомандующийлэсь пуктэм ожгар ужпумзэ быдэстэ. Капчи луымтэ ожгар условиосын Татарстан Республикаысь ожгарчиос нимысьтыз ожгар операцилэн территориаз службазэс юн нуо, асьсэ ожгар ужпузэс данэн быдэсъяло, тодазы возё, соос кун тунсыкъёсты гинэ ӧвӧл, асьсэ семьяоссэс, матысьёссэс, ӵыжы-выжыоссэс но аспалъёссэс утё шуыса.

Нимысьтыз ожгар операция ортчон интыын ужпумъёсты быдэстон понна радъям мобилизация вакытэ ожгарчиосты дасянъя но армие ӧтёнъя быдэстэм бадӟым ужды понна тау кареме потэ тӥледлы. <…> ожгарчиос пӧлысь нимысьтыз потэ пусъеме 5МСР-лэсь сержантсэ Лобанов Алексей Васильевичез. Та ожгарчи взводлэн, роталэн но батальонлэн командиръёссылы юн пыкет луэ. Ассэ воземеныз, нуналмысь уженыз, вераськеменыз, вылтусэныз, ас эшъёсызылы чидась, юн луыны, радлыкез утьыны мылкыд сётэ. Командованиен пуктэм ожгар ужпумъёсты ӟечлыко но ӝог быдэсъя. <…>.

Гажаса 2МСБ-лэн командирез майор Р.А. Сысоев».

Кыӵе бадӟым шумпотон уга со анай-атай понна — нылпизы сярысь ӟеч кылъёс кылон. Ми но тӥледын ӵош шумпотӥськом но данъяськиськом асьме аспалэнымы, Галина Валентиновна но Василий Меркурьевич. Пидылы но, нимысьтыз ожгар операцие пыриськись мукет воргоронъёсмылы но сӧл-тазаен вордскем палъёсазы, семьяосазы берытскыны мед кылдоз.

P.S.: Алексей Лобанов вордске 1985-тӥ арын Вукогуртын. Ципья шоръёзо школаез йылпумъя. 2022-тӥ арын  куарусёнэ мобилизовать каремын луэ. Туннэ нуналэ нимысьтыз ожгар операцие пыриське.