«Азьлане» газетлы – 90 ар

История понна вакчи гинэ дыр луэ ке но, газет понна — со быдэс даур, ортчем вакытлэн одӥг бадӟым лёгетэз.

Ӵапак 90 ар талэсь азьло, 1934-тӥ арын толшоре Балтась ёросысь типографиын «Азьлане» нимын удмурт газетлэн нырысетӥ номерез потэ. Удмурт газетлы редакторе тодмосто Николай Сергеевич Чакминэз, кылкутӥсь секретаре — Григорий Дмитриевич Халтуринэз. Со дырысь газет луэм 2 бамо, потылэм ньыль нуналлы одӥг пол. 

90 ар ӵоже «Азьлане» форматсэ но, быдӟалазэ но, потон радлыксэ но вошъя. Вошъяське озьы ик нимыз но, полиграфиез но, статьяослэн тематиказы но. Мазэ веранэз, газетлэн тиражез но пӧртэм луэ. Газет кылдэм аръёсы тираж 800 котыр возиськем. Луиллям дыръёс куке та лыдпус 300-400 экземпляр гинэ кылем, нош тужгес бадӟымез показатель — 1000 матэ.

Туннэ «Азьлане» потэ А-3 форматэн арняяз 1 пол, тиражез — ог 600 экземпляр.

Газет туннэ но гожъя ёросысьтымы югдур, политика, культура, дышетон, гурт удыс, йӧскалык ужпумъёс сярысь. Бадӟым саклык висъя дормес гажан мылкыд пыӵатонлы, артэ улӥсь калыкъёсын тупаса улонлы, аслэсьтыд кылдэ но культурадэ утёнлы-азинтонлы.

Газет туала улонлэн куронъёсызъя улыны тырше. 2008-тӥ арысен ёрос газетмы «Татмедиа» акционерной общество борды итӥське. Газетмы понна выль, туала луонлыкъёс усьтӥсько, материальной база но выльдӥське, дыр ортчемъя юнма. 2011-тӥ арын толсуре ёрос газетлэн аслаз сайтэз кылдэ но, вераны кулэ, улосчиосмы пӧлын арысь аре паськыт вӧлме. Данъяськыса вераны быгатӥськом: туннэ нуналэ «Азьлане» газетысь иворъёсын адямиос тодматскыны быгато интернетысь пӧртэм социальной вотэсъёсын но. 

«Азьлане» газетмес удмуртъёс пӧлын тодымтэез ӧвӧл, дыр. Угось Татарстанын со одӥг гинэ удмурт кылын печатласькись газет. Озьыен, Балтась удмуртъёс, таин сюлмысь данъяськыны быгато.