«Бур килэн тодэмез уг ке поты, мар каре паллянэз — коррупциен нюръяськон пайдатэм, кулэтэм» (Нейах)

Та ӧнерын ужамез ик вуттэм сое таӵе малпанэ: «Если правая рука не хочет знать, что делает левая — всякая борьба с коррупцией бессмысленна, бесполезна» («Бур килэн тодэмез уг ке поты, мар каре паллянэз — коррупциен нюръяськон пайдатэм, кулэтэм»)

Та чуръёсты лыдӟыса, малпаськонэ уси: «Луэ-а нош озьы, куке паллян но бур киослэн нимаз, ог-огзытэк, тупатэк улэмзы? Ведь ужаку соизтэк но, таизтэк но номыр карыны уг луы». Нош улонын тӥни луэ вылэм… Озьы луэ вылэм соку, куке улон огыр-бугыр, йыринчукин берытске. Туннэ кутэм катъёс ӵуказеяз кутэм катъёсын уг тупало. Одӥг темая инструкциосты пӧртэм сямен быдэсъяло. Татысь ик пото коррупцилэн кылдон мугъёсыз: законъёсты ум тодӥське, капчиен гинэ узырмеммы потэ, улонмылэн улӥ уровенё луэмез, тросэз адями ужтэк пуке. Ужтэк улон, секыт улон вуттэ лушкаськонэ.

  Лушкаськон … Мар со? Мон сямен, со куке ас кужымен, пӧсяса-нюласа лэсьтэм, люкам, вордэм ваньбурдэ вакчи дыр куспын, юатэк-вератэк, кин ке киултэ, аслыз каре, капчиен узырмыны турттэ.

Судлэн, вылӥ чино муртъёслэн, полицилэн, эмчиослэн авторитетсы быриз. Та сярысь асьмеос валаськом, тодӥськом нуналысен нуналэ телевизор учкыса, книга-газет лыдӟыса. Кылсярысь шуом, асьме кун кужмо азинске: лэсьто технопаркъёс, стадионъёс, коркаос. Нош коррупциен нюръяськон весь огинтыяз сылэ, туж трос солы пумит нюръяськон катъёс кутэмын ке но. Юнме уг шуо вылэм: «Макем кунын юнма коррупция, сокем трос пӧрало катъёсты». Солэн йылыз-пумыз уг адскы. Ӵем дыръя судлэн киулаз уг сюро соос, кин киоссэ лэзья кун казнае. Нош сюро чыры-пырыен лушкаськисьёс: декан, лектор, зачёт понна коньдон басьтыса, яке врач. Соосты коррупционер шуыны кыл но уг берытскы кадь. Вылӥ чино лушкаськисьёсты шыпак гинэ ужысьтыз палэнто но, лушкам коньдонэз, ваньбурез сярысь малы ке но вунэто. Соос ик, мукет интые выжыса, эшшо но умой выжыясько. Валамон соиз, коррупция шӧдскымон кужмо ас вотэсаз ватсаз ни калыкез. Ӝоген шедьтыны кулэ та кышкыт кужымысь сюрес, кулэ мозмытскыны солэсь. Нош ма кароно? Полицилы но оскон кысӥз. Соос пӧлын но туж трос коньдонлы синмаськисьёс. Нош катъя котькуд адями кыл кутыны кулэ, чино мурт-а со яке огшоры мурт. Улонын суд тросаз учырын «ас сяменыз» судъя. Соин ик ужбергатӥсь, чино мурт мар каремез потэ, сое ик каре. Номырлэсь но нокинлэсь уг кышка. Малы ке шуоно со оске, солэн коньдонэз ваньзэ ас интыяз пуктоз. Нош малы кулэ иське суд, катъёс? Соку шедьтоно «янгыш» муртэ, кудӥз пала нокин дурбасьтыны уз быгаты, солы пумит уж «пӧрало».

Кылдэ таӵе юан: макем кема кыстӥськоз та пӧяськон, лушкаськон? Валамон соиз, ваньмыз адями бадӟым уксё азьын ассэ пӧртэм сямен возе. Куд-огез ассэ ачиз уг вормы. Судья но озьы ик, угось со но адями. Но соин но со суд, судья — адямилыко, зэмлыко, сое уг луы коньдонэн басьтыны. Адямиос осконэн вазисько, янгышам мурт янгышъёсыз понна кыл мед кутоз шуыса. Нош нокинлэн ассэ янгышен лыдъямез уг поты. Соку со утчаны кутске пӧртэм сюресъёс, кылкутонлэсь мозмытскон вылысь.Со сюрес выльысь вуттэ коньдон доры. Соку адями малпа: судья басьтӥз бере уксёзэ, ваньмыз умой луоз. Кӧняез гинэ вала, со сюрес умое уг вутты шуыса.

Озьыен, коррупциез асьмеос, огшоры калыкъёс ик кылдытӥськом. Зэмзэ верано ке, мон уг тодӥськы, ку вуоз солэн пумыз. Но мынам туж потэ, ЗЭМЛЫК мед вормоз шуыса. Катъёс мед ужалозы ваньмыз понна огкадь. Ми выль пушъетъёсмес будэтыны кулэ озьы, мед луозы соос зэмлыкоесь, адямилыкоесь, ас ужзы, кунзы понна кыл кутыны быгатӥсесь. Мон малпасько, соку вуоз сыӵе дыр, куке уз луы коррупция, лушкаськон. Коррупциен нюръяськонэз кутсконо ас бордысен. Тон котырысь адямиос, калык но сыӵе ик куронъёс мед пуктоз ас азяз. «Паллян» но «Бур» киос мед тупалозы!

                                                 Байманова Наталия,

Ципья шоръёзо школаысь 8 классын дышетскись