Бускельёсмы дорын но удмурт кылын газет потоз

Та сярысь ивортӥзы «Вамыш» газетысь ужъюлтошъёсмы, ми доры куное вуылыкузы. Туж шумпотӥськом бускельёсмы понна: Кукмор удмуртъёслэн но табере асьсэ анай кылынызы потӥсь ёрос газетсы луоз.

«Вамыш» газет Кукмор ёросысь «Хезмэт даны» («Трудовая слава») газетлэн удмурт кылын потӥсь дубляжез луоз но озьы ик «Татмедиа» акционер огазеяськонлэн изданиосыз пӧлы пыроз. «Азьлане» газет кадь ик со арняяз одӥг пол, арнянуналэ, потӥсь 8 бамъем газет луоз. Газет поттон уж бордын куинь мурт тыршоз: валтӥсь редакторлэн дубляжъя воштӥсез, редактор (журналист) но верстальщик (со ик нырысь-валысь сайтлэсь ужзэ но нуоз шуыса витиське). Туннэ нуналлы «Вамыш» газет 300-лэсь трос тираж люканы быгатэм. Оскиськом, та лыдпус азьланяз йылоз гинэ но Кукмор ёросысь удмуртъёслэн кемалась кылдэм малпанзы зэмалоз шуыса.

Азинсконъёс сӥзиськом бускель ёросысь ужъюлтошъёсмылы. Кылдэм шуг-секытъёсты капчиен вормыса, мытэм ужзэс азинлыко нуыны мед быгатозы. Газетсы кузь гумыро мед луоз, котькуд лыдӟись доры сюрес мед шедьтоз! Ӟеч сюрес тыныд, «Вамыш» газет!