Бускельёсын огкылысь

Коллективъёсмы ӝутскем мылкыдын но синпельлы кузьымъёсын бертӥзы. Фестиваль ортчиз бускель Малмыж ёросысь Пор-Китяк (Поречке Китяк) гуртын. 

Лулчеберет удысын трос гинэ ужрадъёс ортчо шуиськом ке но, удмурт шӧмоез котьку тунсыко но матын потэ. Мазэ веранэз, удмурт праздникъёс сокем ӵем уг но ортчо. Соин сыӵе дуно пото котькуд удмурт шӧмо люкаськонъёс. Пӧртэм ёросъёсысь, республикаосысь удмуртъёсын бадӟым праздникъёсын гинэ пумиськыны луонлык кылдэ. Сыӵеосыз пӧлы пыртыны быгатӥськом «Гырон быдтонэз». Кин тодэ, оло, азьланяз таиз но фестиваль ӟеч йылоллы пӧрмоз удмуртъёслэн пумиськон календарязы.

Бен, ужрадэз радъян, кылдытон, нырысетӥзэ ортчытон — со котьку секыт. Ваньзэ рос-прос малпано-дасяно, куноосты пумитано, калыкез но люкано, чеберманъёс сярысь но вунэтоно ӧвӧл. Малпасько, «Зарни бугор» фестиваль ӟучъёслэсь «Первый блин комом» шуэм лэчыт веранзэс ӧз зэматы. 

Огъя фестивале Татарстан Республикалэн Кукмор но Балтась ёросъёсысьтыз, Марий-Эл Республикалэн Карлыган гуртысьтыз, Киров улослэн Малмыж ёросысьтыз, Вятский Полянаысь 15 коллективъёс пыриськизы. Балтась ёросысен та ужрадэ Покчи Лӧзя лулчеберетъя юртысь «Вуюись» ансамбль, Ципья лулчеберетъя юртысь «Азвесь гырлы» эктонъя ансамбль но Евгения Михайлова, Ӟаны лулчеберетъя юртысь «Шулдыр ӝыт» калык ансамбль, Турья гурт клубысь «Марӟан» ансамбль, Кушкет гурт клубысь Алексей Павлов но Карек-Серма гурт клубысь Зоя Никитина вуылӥзы. Вань коллективъёс но самодеятельной артистъёс люкаськем калыкез асьсэлэн быгатонлыкъёсынызы паймытӥзы.

— Праздникмы удалтӥз шуысал. Нырысетӥзэ ми дорын таӵе фестиваль ортчиз. Ваньзэ радъяны юрттӥзы клублэн заведующиез Гляндам Камаева, дышетӥсьёс, Пор-Китяк гуртын улӥсьёс, Удмурт Китяк гуртысь калык. Спонсоръёсмы луизы «Смаиль» агрофирма, гуртысь калык, гуртын вордӥськем но гуртэн герӟаськем калык. Сяме пыремъя, йӧскалык удмурт сиён-юон сяна, ми нимысьтыз фотозона но лэсьтӥмы. Котькуд лыктэм куномылэн синпельлы туспуктэмез мед кылёз но азьпалан та йылол медаз ышы вал шуон малпанэн лэсьтэмын вал со, — ивортӥз ужрадлэн одӥгез радъясез, Пор-Китяк библиотекалэн заведующиез Алефтина Трухина. 

— Шумпотыса вуиськом котькуд удмурт празднике. Туж шулдыр вал таиз но. Милемлы кельшиз фотозона но, куно пумитан но, радъям сцена но, праздниклэн аспӧртэмлыкез но. Ми дышемын ини Балтасьын, Кукморын, Карлыганын ортчись ужрадъёслы, тани Малмыж палъёсысь удмуртъёсын но тодматскыны луонлык кылдӥз. Паймымон, егитъёс но та ужрадэ трос лыктӥллям. Тыршись, асьсэлэсь анай кылзэс яратӥсь но гажась калык улэ вылэм та палъёсын. Азьланяз та йылол выжызэ мед лэзьысал. Арысен аре тросгес но тросгес удмуртъёс мед люкаськысалзы, — веразы малпанъёссэс лыктэм куноос. 

Пор-Китяк гуртын огшоры фестиваль гинэ ӧз ортчы, та ужрад вань калыкъёсты огазеяз. Калык кырӟанъёсын, эктонъёсын, мызган гуръёсын пачылмиз котькуд лыктӥсьлэн мылкыдэз. Калыкез огазеясь таӵе ужрадъёс азьланяз но шуныт куазен но мылкыдо адямиосын мед шумпоттозы.