Быдэстоно проблемаос тырмыт али

Умойтэм ужъёс кылдэмлы быдэ анай-атай: «Та нырысетӥ учыр, ӧм тодэ. Милям нылпимы йӧнтэм ӧвӧл», - шуыса шонере потыны выро. Нош таӵе шонере потонлэсь интыё луымтэзэ асьсэос но валало.

Районын быдэ вуымтэосты воспитать каронлы, шутэтсконзэс но улонзэс пайдаё карыса ортчытонлы бадӟым саклык висъяське но кадь. Дышетонъя, культурая, спортъя, социальной дурбасьтонъя отделъёсын ужасьёсын трос пӧртэм ужрадъёс ортчытъясько. Инспекторъёс ялан рейдъёс ортчытъяса, быдэ вуымтэослэсь дышетскон сяна дырзэс ортчытэмзэс контроль улсын возё.

Кемалась ӧвӧл районамы Татарстан Республикалэн ужъя, уже интыянъя но социальной дурбасьтонъя министрлэн воштӥсезлэн Азат Габделахатовлэн пыриськеменыз быдэ вуымтэ нылпиослэн ужзыя комиссилэн люкаськонэз луиз. Татын: «Нылпиосын лэсьтэм йыружъёс кыӵе муген будо?» шуэм юанлы валэктон утчазы. Нылпиосын ужась котькуд органъёслэн представительёссылэсь выступлениоссэс кылзэм бере, Азат Хабибелхакович: «Ужады нокыӵе но проблемаос ӧвӧл шат?» шуэм юан пуктӥз. Малы ке шуоно котькуд выступление ужам мында отчёт лэсьтон выллем гинэ луиз.

- Азьло физкультурая дышетӥсьмы Газиз агай пичи гинэ спортзалын кӧня пиналэз спортлэн секретэзлы дышетӥз. Кӧня спортъя мастерез будэтӥз. Луонлыкъёс луымтэ дыръя но амалъёс шедьтыса, пиналъёсты начар ужъёс лэсьтонлэсь утьыса кельтӥз. Малы ке шуоно ми котьку маин ке но выриськомы вал. Дышетскыса бертэм бере, нош ик школае мынӥськомы вал. Классэн кивалтӥсьмы ӝыт 8 часозь милемын выре вал, - шуыса ачиз дышетскем аръёсты тодаз вайиз со.

Табере ини луонлыкъёс но трос, нош туж жалямон, нылпи йыруж лэсьтон сюресэ султэ. Туннэ нуналэ нылпи кыӵе ӧръя вырыны мылкыд кариз ке но, котькыӵе луонлыкъёс но кылдытэмын. Мылпотон гинэ кулэ. Со спортъя, кырӟан-эктонъя кружокъёс... ваньмыз но туж умой ужало. Школалэн базаяз гинэ ӧвӧл, искусствоя школаослэн, спортъя дворецъёслэн но ӧсъёссы котьку усьтэмын. Тренеръёслэсь, секциен кивалтӥсьёслэсь штатъёссэс кулэсто шуиськоды. Нош та кулэстонъёс гинэ пиналъёсын лэсьтэм йыружъёслэн будонзылы муг луыны уг быгато.

Нылпиослэсь шутэтсконзэс пайдаё карыса ортчытонын но луонлыкъёсмы трос. Пришкольной лагерьёсын, «Романтикын», спортъя отделэн радъям лагерьёсын арлы быдэ кӧня нылпи шутэтске. Дышетскон ар ӵоже школаосын ортчись внеклассной ужрадъёс но воспитательной ужпумен ортчытӥсько. Нош сое ӝутыса возьматон кулэ: огъя вераса, тросгес активной пиналъёсын гинэ уж нуиське. Оло, воспитать каронлы секытэн сётӥськись, комиссиын учётын сылӥсь пиналъёсты люкаса, спортъя, искусствоя школаосы экскурсиосы нуоно, дыр. Школа бере кыӵе пайдаё занятие шедьтыны луэмзэ асьсэос адӟизы ке, соослэн но тунсыкъяськонзы кылдысал.

Улонэз мукет луэм бере, табере психологтэк но уг луы. Районысь ньыль школаын психологлэн штатэз луытэмын. Со сяна, социальной дурбасьтонъя отделысь психологъёс но школаосы ӵемысь ветло. Нош куамынлэсь уно школаез луэм районлы ньыль специалист гинэ ӧжыт со. Азат Хабибелхаковичлэн верамезъя, оло, дышетӥсьёслы ватсаса уж карыса котькуд школаын психологияя уж возьматон сярысь но малпаны кулэ, дыр. Азьло нимаз штат луымтэ ке но, дышетӥсь тодон-валан но сётэм, психолог но луэм, кузёмытэм нуналэн группалэн воспитателез луыса но ужам.

Ог-огзылы пумит луись трос малпанъёс кылдӥзы ке но, ужен воспитанилэсь но нылпилы бадӟым влияние лэсьтэмзэ вунэтоно ӧвӧл. Туннэ улонын нылпиез доскаез ӵушытыны но ӧм быгатэ ке, кыӵе азьпал воспитать кариськомы бен асьмеос? Таос понна кин ответственной? Нырысь ик семья, дыр, нош пиналэз семьялэсь палэнын воспитать карон удысын но быдэстоно проблемаос тырмыт али!

Нылпилэн улонэз понна котькудмы огкадь ответственной луимы ке гинэ соосты янгыш сюресэ султонлэсь утьыны быгатомы.