Ӟечкыланъёс

Мынам анае Светлана. Ужа со «НАЗын» бухгалтер луыса. Мынам анае котьма карыны быгатэ: ческыт пыжиське-пӧраське, чебер дӥськут вуре, пӧртэм сяськаос будэтэ. Та чебер тулыс нуналэ мон ӟечкыласько анайме 8 Март праздникен. Сӥземе потэ тыныд, анай, шудбур но тазалык. Ми Савелий вынэн тонэ туж яратӥськомы!
Нылыд Настя

Мынам анаелэн нимыз Анжелика. Солы 32 арес. Ужа со Казаньын, «Пятёрочка» магазинын. Мынам анае туж чебер, ужез яратӥсь но небыт сямо. Со уже кошкыку, мон туж мӧзмисько. Анае мыным ческыт сиёнъёс вае.

Яратоно анае! Ӟечкыласько тонэ Нылкышноослэн калыккуспо нуналэнызы! Сӥзисько тыныд тазалык но шудбур. Мон тонэ туж кужмо яратӥсько!
Тынад пиед Артур

Мынам анаелэн нимыз Яковлева Ольга Борисовна. Со мынам дунне вылысь тужгес чеберез но ӟечез, ужез яратӥсез но сюлмаськись мылкыдоез. Анае туж ческыт пӧраське. Нуналлы быдэ шумпоттэ милемыз ческыт пыжиськемъёсын. Мынам анае киужъёслы но усто. Со яратэ алмаз пужыятонэн вырыны но суредаськыны.

Анай, тонэ 8 Мартэн ӟечкыламе потэ но шудбур но тазалык, яратон но ваньзэ умойзэ сӥземе потэ.

Мон тонэ туж яратӥсько.
Тынад нылыд Карина

Мынам анае Кушакова Надя. Ужа со «Труд» колхозын. Анае самой ӟеч адями дунне вылын. Мон туж данъяськисько аслам анаен. Ми апаен солы котьку юрттӥськомы. Милям анаймы туж ческыт пӧраське но пыжиське. Со милемыз туж яратэ. Ми но сое туж кужмо яратӥськомы.
Пиед Денис

Мынам анаелэн нимыз Кузнецова Анжелика Валерьевна. Ӧнерезъя со ӟуч кылъя но литературая дышетӥсь но покчи классъёсын дышетӥсь, но «Наз» центрын ужан терапиен инструктор луыса ужа.

Анаелэн хоббиез — киужъёсын вырон. Со яратэ аспӧртэмлыко георгиевской лентаос, атлас тасмаослэсь бантикъёс лэсьтыны, шудонъёс керттыны быгатэ. Солэсь ужъёссэ ёросысьтымы, республикаысьтымы тросаз адӟытонъёсын адӟыны луэ. Мынам анае уно ӧнер конкурсъёсы пыриське но котьку призо интыос басьтэ.

Мынам анайме Нылкышноослэн калыккуспо нуналэнызы ӟечкыламе потэ но та чебер нуналэ шубдур, тазалык, удалтон сӥземе потэ. Мон тонэ кужмо яратӥсько, анай!
Тынад нылыд Ольга

Мынам анаелэн нимыз Тамара. Солы 32 арес. Анае ужа фермаын. Ӵукна вазь султыса мынэ со ужаны. Мынам анае яратэ пыжиськыны. Со туж шулдыр адями. Мон туж яратӥсько анаез.

Та чебер тулыс празднике сӥзисько солы тазалык но шудбур. Котьку таӵе чебер луы, мусо анае!
Нылыд Ксюша.

Мынам анае Кузнецова Марина. Со туж чебер но мусо. Мынам улонам анае юн пыкет луэ. Вань секретъёсме мон солы гинэ быгатӥсько вераны.

Та шулдыр тулыс нуналэ мынам сӥземе потэ тазалык, кема улон. Мон тонэ туж яратӥсько, анае!
Нылыд Арина

Мынам анае Андреева Наталья Петровна. Солы 42 арес. Ужа со фермаын. Анае ческыт пӧра. Со милемлы урокъёс лэсьтыны юрттэ.

Мон сое туж яратӥсько. Котьку таӵе чебер но капчи мылкыдо кыльы.
Нылыд Оля

Мынам анае чебер, мынам анае визьмо но шулдыр. Солэн нимыз Алёна. Ужа со магазинын вузкарись луыса. Мынам анае ческыт пыжиське, пӧртэм сиёнъёс пӧра. Со милемыз яратэ.

Котьку мед луоз анае! Ноку эн висьы, ми тонэ туж яратӥськомы.
Пиед Юра

Мынам анае Чернова Лидия. Со туж яратэ пудо-животъёсты, соин ик фермаын ветеринар луыса ужа. Анае туж трос ужа, доре жадьыса бертэ, мон солы юрттыны турттӥсько, нош со мыным.

Анае мынам самой чеберез, мусоез но йӧноез. Солы гинэ верасько мон аслэсьтым вань секретъёсме. Ми висьыкумы, со котьку ми вӧзын, лякыт кылыныз юрттэ но бурмытэ.

Милемыз будэтэмез понна, утемез понна мон быдэс сюлмысен ӟечкыласько тулыс праздникен. Таза но шудбуро луы, котьку таӵе чебер но сайкыт ымныро.
Нылыд Алеся

Анае мынам Тукаева Ольга. Со туж яратэ пыжиськыны, ужа со повар луыса больницаын. Мынам анае котьма карыны быгатэ: эктыны но, кырӟаны но, киужлы но со туж усто.

Котьку капчи мылкыдо кыльы, мусо анае. Ми тонэ туж кужмо яратӥськомы.
Пиед Дима

Мынам анайлэн нимыз Светлана. Ужа со вуриськись луыса. Анае самой чебер но шулдыр адями. Яратэ со пыжиськыны но дӥськутъёс керттыны быгатэ. Шудо но таза луы котьку но, серекъясь ымнырыд милемлы шундылэсь но яркыт.
Пиед Рома

Мынам анае Ирина. Солы 42 арес. Анае капчи мылкыдо, сайкыт ымныро но каньыл сямо. Со милемлы котьку юрттэ, визьнод сётэ, капчи кылыныз бурмытэ. Тау кылъёсме верасько мон солы милемыз будэтэмез понна, сюлмаськемез понна. Ми тонэ туж юн яратӥськомы, мусо анае!
Пиед Даниил