Ёросамы табере «Ялтра» нимо ошмес вань

Туннэ нуналэ котькуд сямен гуртын ошмес вань, кытын ке одӥг гинэ но ӧвӧл. Вераны кулэ, та туж шумпотымон югдур. Ортчем 2024-тӥ арын Ӟуч Лӧзя гурт калыклэн но ошмес сярысь кемалась малпанэз улонэ пыӵаз – табере лӧзяос но юзмыт ошмес вуэнызы данъяськыны быгато.

– Зэмос Выль ар кузьым выллем луиз ук та! Ӟечокъёс! – шумпотэмзэс веразы гуртоос ошмеслы нимпул (вывеска) юнматэмзы бере. Ӵапак 2024-тӥ арлэн берпуметӥ нуналаз, 31-тӥ толсуре, гуртысь воргоронъёс ошмес коркае нимпул юнматӥзы. Нимыз но солэн туж тупась – «Ялтра», (ошмес Ялтра нюлэскысен кутскон басьтэ уга).  

– Бадӟым люкетэз самообложение коньдон чотын лэсьтэмын, но со уксё ӧз тырмы, соин грант уксё но кутэмын вал. 2024-тӥ арын ми 2 миллион грант утӥмы уга. Озьы 2 350712 манет коньдон кошкиз ошмес радъянлы. – валэктон сётӥз Покчи Лӧзя гурт поселенилэн главаез Айдар Исмагилов. 

– Ужъёсты 2023-тӥ арын кутскимы ини. Шедьтӥмы ошмеслэсь синзэ, кольцоосты интыямы но вуэз отчы поттӥмы. Но, жаляса верано, нырысь интыям трубаосты воштоно луиз, бадӟымгесъёссэ трубаосты поныны тупаз. Огъя кузьдалазы 1 иськем но 100 метр луиз. 

Ваньмыз 2023 арын ог 235000 манет тыр уж быдэстэмын луиз (кольцоосты интыян, кирпич поттон заводысь гордсюй нуллон, трубаосты вошъян). 

Валтӥсь ужъёсты «Мелиоратор» организация быдэстӥз. Спонсор юрттэт сётӥз Ильмир Султанов, со кольцоосты басьтӥз, вулы быдэсак химической анализ лэсьтон понна тыриз (азьвылгес кӧня ке элементъёслы кариськеммы вал ини. Созэ «ФарМат» спонсировать карем вал). Павильонэз 2025-тӥ арлэн самообложение коньдонэз чотын лэсьтыны тупаз, озьы ик гурт калык туж мыло-кыдо пыриськиз, коньдонэн но юрттӥз, ки кужымен но, – ватсаз Айдар Салимзянович. 
Зэмзэ но, гурт калык ошмесэн герӟаськем ужпумез быдэстонэ вань сюлэмзэ поныса пыриськиз. Нимысьтыз ик пусйыса вераны кулэ ошмессинэз утчан, шедьтон-эскерон но копан ужъёсы асьсэлэсь бадӟым люкетсэс пыртэм муртъёсты. Гуртоос Филиппов Владимир, Антонов Владимир, Сергеев Анатолий, Кузьмин Иван но Вылын Ушма гуртысь Яковлев Евгений, кудӥз трос пол трактореныз ву кыскыны юрттӥз, ӵапак та ужлэн самой кутсконаз сылӥсь валтӥсь адямиос луо. Соос трос дырзэс но кужымзэс та ужлы сӥзизы. 

Ошмес корка лэсьтонын валтӥсь ужъёсты быдэстӥзы Иван Кузьмин, Владислав Иванов, Сергей Васильев но сварщик Владимир Антонов. Соослы котьма ласянь юрттӥськиз Андрей Алтухов, юбоосты пуктылыны Владислав Григорьев, липет липыны Кирилл Дмитриев юрттӥзы. Удодов Александр калайёсты кырыжъяз, нош Плотников Дмитрий кулэ арбериосты вайылӥз. Ужбергатӥсь Сергей Плотников ошмес дорысь территориез югдытон ужпумез быдэстӥз: солэн ужасьёсыз юбо вылэ нимысьтыз прожектор пуктӥзы. Гурт калык ваньзылы, кин пыриськиз та ӟеч уже, тау каремзэ вера.

Фото: В. Иванов