Азьлане
Габдулла Тукаез буре вайыса
Василий Петрович Никитин Балтась районысь Карек-Серма гуртын вордске. Ципья шор ёзо школаез йылпумъяса, Глазкарысь пединститутлэсь физико-математической факультетсэ йылпумъя. Али дыре Ӟаны шор ёзо школаын ужа.
Василий Петрович ачиз но кылбур гожъя, бигер калыклэсь кылбуръёссэ берыктонэн но выре. Улӥын сётӥськом солэсь Габдулла Тукайлэсь берыктэм кӧня ке кылбуръёссэ.
Вордскем кыл
О, вордскем кыл, о, чебер кыл, анай-атайлэн кылыз!
Дуннеысь трос мар ке тодӥ, тон, вордскем кыл, вань вылысь.
Та кылын шып кырӟаса ук кӧкыын анай веттам,
Песяйлэсь выжыкылзэ нош кылзылӥ котькуд ӝытэ.
О, вордскем кыл! Шӧдӥсько мон улонын ӟеч юрттэттэ,
Туж матын но валамон тон, шумпотон, йырвисетэ.
О, вордскем кыл! Тон сямен мон нырысьсэ лыдӟи вӧсьме:
Огнаме монэ эн кельты, уть анайме-атайме!
Фатима но Уӵы
Фатима
Малы тон уд чирдӥськы ай, уӵые?
Кырӟам куараед бурдъясал мылкыдэз.
Четлык туж умой, котыраз сиёнъёс,
Малы мылкыдтэм тон, я ӝуты йырдэ.
Уӵы
Кырӟан интые вож тэльын вал мынам.
Отын котькыӵе луонлык вал ортчыт.
Малы мон тыныд шумпотон возьматом,
Куинь кузя пиосы кылемын ке отчы.
Вите на монэ яратон юлтоше,
Мӧзме со, куасьме: ку луом ни ӵошен.
Тыныд валантэм: мурт музъем - со пытсэт,
Четлык - со четлык, зарнилэсь ке но со.
Фатима
Ярам, озьыен, усьтӥсько мон ӧстэ,
Потод эрике - жильдылод гуръёстэ.
Я, лобӟы, уӵы, вож тэле ас дорад,
Эшед, пиосыд туж витё, дыр, карад.
Зэмлык но Пӧян
Вашкала дуннеын музъемтэк одӥг ву, пе, вылэм.
Пӧянэн ӵош Зэмлык со дыре тулкымъя лэйкаллям.
Кельшисьтэм эшъёслы уяны одӥг пыж сётӥллям,
Ог-огзы пумитэ таосыд со пыже пуксиллям.
Ӧжытак уяса, кыл бордысь жугиськон пуромем,
Эшъяськон ке ӧвӧл, пурт борды кырмисько урмемен.
Пӧянэд Зэмлыкмес зол кужмо киыныз сэрпалтэ,
Со дырысь Зэмлыкмы ву пыдсын югытэз адӟымтэ.
Вордӥськем музъемелы
Пиналысен кошки палэнэ, адӟонлэсь пегӟыса.
О, Казаньсьӧр, выльысь адӟиськод, берытски мӧзмыса.
Кыдёкысен тодмо возьвылъёс ӝутказы мылкыдме,
Курадӟытӥсь тодэ ваёнъёс кысказы сюлэмме.
Шудтэм ке но будӥ мон татын анайтэк-атайтэк
Егит дырме курыт ултӥян сӥсъялляз ке но тэк, -
Пумен ортчо секыт аръёсы, бурдоос лобӟем кадь,
Тодам лыкто со нуналъёсы, ӝыт адӟем вӧтъёс кадь.
Шуккыллязы пыжме тулкымъёс - ӧй выйы ву пыдсы,
Ӝуатъялляз тынад лек тылыд - монэ ӧз суты со.
Со дырысен шӧдӥ, валай кадь, вордӥськем музъеме,
Зол тулкымед, ӟырдыт тылыд но ярамон сюлэмам.
Тодӥ, ваньмыз тынад дун-чылкыт: ошмесъёс, шуръёсыд,
Бусы вамен лёгем сюресъёс, итымед, гуртъёсыд;
Арлэн котькуд дырыз: сӥзьылэд, тол, тулыс, пӧсь гужем;
Котьма, котьма: ыштыр, чабата, тӧдь носки, шортдэрем,
Ыжъёс, ошъёс, утӥсь пуныос, бӧксылӥсь скалъёсыд.
Узыр ӧвӧл ке но, мусо ук вордӥськем палъёсы.
Вордскем гуртэ
Гурезь йылын сылэ мынам вордскем гуртэ.
Гуртлы матын одӥг ошмес весь жильыртэ.
Чеберлыксэ гуртлэсь, шӧмзэ ошмес вулэсь
Тодско, данъяськисько соин лулысь-сюлмысь.
Йырам улэ ялан татын адӟемъёсы:
Шумпотыса шудонъёсын ортчем аръёс,
Агаеным ӵошен паськыт луд вылъёсын
Геры сьӧрын сьӧлтаськыса ветлэмъёсы.
Та дуннеын туж трос адӟон вите, оло?
Тодмо ни, дыр, кытчы куштоз монэ улон,
Кытчы мыно, кытын уло, маръёс лэсьто -
Пырак тодам кылёз мусо вордскем гуртэ!
Следите за самым важным и интересным в Telegram-каналеТатмедиа
Без социаль челтәрләрдә: ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен
Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.
Нет комментариев