Калыклэн ваньмон дырез сярысь сюлмаськыса

«Күрше. Мирас» — со Татарстанын улонэ пыӵам но кӧня ке ар радысь ужась «Күрше» фестивальлэн нимысьтыз проектэз. Со лулчеберет удысысь кичӧлтонъёслы чакламын. Фестивальлэн классической форматэзъя праздникъёсты, концертъёсты но бускельёссылэсь пумиськонъёссэс радъяло, нош татын пыриськисьёслы йылпумъян результатэн проектъёсты кылдытыны ӵекто. Со луыны быгатэ, кылсярысь, архитектура, крезьгур, фото, видео, исполнительской искусство но мукет творческой индустриосысь дась продукт (кыӵе ке арт-объект, аудиогид, книга, комиксъёс но мукет). Проектэ пыриськон понна заявка сётыны быгато нимаз адямиос но, юридической муртъёс но. Пыриськон понна «Курше. Мирас» ӧрлэсь одӥгзэ бырйыны но ог-огенызы герӟаськем ӧжытсэ куинь ужрадъёслэсь программазэ дасяны кулэ, солэн бервылаз лулчеберет продукт яке обществолы кулэ луись результат кылдыны кулэ.

Шумпотымон, та проектэ пыриськон понна заявка сётӥз но, вормисьёс пӧлы шедьыса, аслэсьтыз ӵектоссэ улонэ пыӵатыны луонлык басьтӥз ёросысьтымы Покчи Лӧзя гурт поселениысь Михайловъёслэн семьязы. 

— Милям поселениын вить гуртлы одӥг клуб, адямиослы ваньмон дырзэс пайдаен ортчытон понна интыос туж ӧвӧл. Котькуд гуртын я Сабантуй, я гуртлэн нуналэз ортче, нош милям номыр сыӵе ужрадъёс ӧвӧл. Соин малпамы заявка сётыны. Огъя 228 заявкаос вал, соос пӧлысь 17-зэ гинэ бырйизы. Шумпотымон, со шудоос пӧлы ми но шедимы. Валтӥсез: та проектъя кыӵе ке но наследие кельтыны кулэ. Проектъя милям та ужпумез быдэстон понна кык инты: Шуйгурт (со Улын, Шор но Вылын Ушма гуртъёслы чакламын) но Покчи Лӧзя (Покчи но Бадӟым Лӧзя гуртъёслы). 19-тӥ июле Шуйгуртын ӵыпет вӧзын, туж чебер интыын ми площадка радъямы, вашкала удмурт сиёнъёслы сӥзем ужрад но ортчытӥмы. Мазэ веранэз, ужез отын али трос, но кутсконэз сётэмын ини. 

Огъя вераса, ми куинь ужрад ортчытоно луиськом. Кыксэ асьме ёросын: одӥгез Ушмаын вылӥын верам праздник вал, мукетыз 2-тӥ гудырикошконэ Покчи Лӧзяын ортчытыны чакласьком. Куинетӥез ужрад луыны кулэ 22-тӥ гудырикошконэ Казаньын. Ми отын калыкез удмурт кухняен тодматомы. Отын ик проектмылэн продуктэзлы — удмурт сиён-юонъёсын пичи книгалы — презентация но ортчоз. (Ушмаын ортчем ужрадэ вуэм корреспондентъёс историен тодматскизы, коркаосты учкизы, рецептъёсты люказы. Соос ик милемлы со пичи книгаез поттозы). 

Вераны кулэ: рецептъёслэн историосынызы ми кемалась выриськомы ини. Та одӥг нуналлэн малпанэз ӧвӧл. Со аръёс ӵоже люкаськем материал. «Путешествие к истокам» конкурсэ пыриськон аръёсы ик ини рецептъёсты люканы кутскимы, презентациосты ортчытъямы. Та солэн азьланьтонэз луэ, шуыны кулэ.

Сыӵе проектъёсы одно пыриськоно шуыса малпасько. Соосты улонэ пыӵатон понна коньдон висъяське. Тани ми, кылсярысь, питырано гур басьтӥмы, пуртыос, ӝӧкъёс, баннеръёс, шудонъёсты ортчытъян понна пӧртэм инвентарь. Ведь со ваньмыз милемлы кыле, эшшо книга луоз. Со ачиз вунэтонтэм тодэ ваён луэ, — быдэстэм но быдэстоно ужъёссы сярысь вера Покчи Лӧзя гуртысь Лариса Михайлова.

Нош 19-тӥ пӧсьтолэзе Ушма ӵыпет дорын «Курше» фестивальлэн «Курше. Мирас» ӵектосэз улсын ортчем аспӧртэмлыко ужрад сярысь нимаз верано ке, пусйыны кулэ, праздник удалтӥз шуыса. Ужрад тодэ вайытӥз, Балтась ёрос — Татарстанысь удмуртъёслэсь аспӧртэмлыко лулчеберетсэ утёнъя зэмос центр луэ шуыса. 

Та нуналэ тӧр шорын вал удмурт кузё кышноослэн дауръёсын утиськем сиён-юонъёссы: табанянь, мильым, шешери, перепеч, шу перемеч, пельнянь, пурты пирог, сӥлен ӝук, турын чай, сюкась, мусур но мукет. Тросэз соос мур выжыё но нимысьтыз учыръёсъя дасясько. Кылсярысь, мильым, яке ӝуко мильым. Та ческыт сиёнлэсь вашкала рецептсэ Балтась ёросысь котькуд удмурт гуртын тодо но утё, сое дасян технология выжыысь выжые выже. Азьвыл Ымусьтонэ пыжем удмурт сиён туннэ зэмос кулинарной ваньбурлы пӧрмиз ини. 

Праздниклэн куноосыз, ческыт йӧскалык сиёнъёсты веръям сяна, аспӧртэмлыко удмурт крезьгуро инструментэз — кубызэз — адӟыны но кылзыны быгатӥзы. Нимысьтыз празднике вуэм кубызчиос — Михаил Романов но Николай Плотников — шудэм улсын мылкыд карисьёс кырӟазы но эктӥзы. Со сяна, люкаськем калыклы асьсэлэсь творчествозэс кузьмазы Балтась лулчеберетъя центрысь кырӟась Татьяна Ишмурзина, Вуж Кушкет гуртысь арганчи Алексей Павлов, Сырья гуртысь «Сырья зоутъёс» ансамбль но Улын Ушма гуртысь усточи Александр Волков. Ужрадэз туж быгатыса но шулдыр нуиз ёросысь лулчеберетъя центрысь ӧнерчи Айсылу Асадуллина. Нимысьтыз пусйыны кулэ Егорова Галиналэсь дасям киужъёсын адӟытонзэ. Со ужрадэз эшшо но чебертӥз, яркыт буёлъёс кузьмаз. Озьы ик праздникын мылкыд карисьёс Леонид Сапожниковлэн «Удмурт шыкысысь ваньбуръёс» книгаеныз но кырӟанъёсын бичетэныз тодматскыны но басьтыны быгатӥзы. 

Празднике вуылӥз Балтась муниципал ёрослэн кивалтӥсезлэн воштӥсез, Покчи Лӧзя гурт поселениысь депутат Наиль Сабирзянов. Со люкаськем калыклы шуныт мылкыдзэ вуттӥз, ӟеч кылъёс вераз, поселенилэн но гуртсылэн улоназ мыло-кыдо пыриськем адямиосты сӥлы карон ужрадэ пыриськиз. Данъямын ва та нуналэ Шуйгуртысь (Шор Ушма) депутат Фёдоров Александр. Ӵапак солэн киӵолтэменыз Ушма гуртысь ӵыпет лэсьтӥськыны кутскиз но бадӟым проектэ выжиз. Пусъемъёс пӧлын вал Кашапова Оксана но — Шуйгуртысь ошмесэз утись кышномурт. Солэн семьяез азьло дырысен ошмесэз утьыса возе. Сяська мертто, утялто. Данъямъёс пӧлын вал поселенилэн но гуртсылэн улоназ мыло кыдо пыриськисьёс но: Вылын Ушмаысь Ишмурзина Марина, Улын Ушмаысь Наталья но Анатолий Никитинъёслэн семьязы, Вылын Ушма гуртысь староста Миронова Эля. Озьы ик семья кылдытэменызы пусйизы Покчи Лӧзя гурт поселениысь егит кузпалъёсты но — Елена но Максим Васильевъёсты. Ӧз вунэтэ Наиль Нургаязович сярысь но: солы, саламъёсын тырмытыса, Романов Михаил Ефимовичлэсь керттэм корзиназэ кузьмазы. Кызьы пусъе, Покчи Лӧзя гурт поселенилэн кивалтӥсез Лариса Михайлова, Наиль Нургаязович пыр трос ужъёс быдэстӥсько, пӧртэм проектъёсты улонэ пыӵатонын солэн но ёрос кивалтэтлэн люкетэз туж бадӟым.

Праздник кырӟанъёсын но юмшанъёсын, пӧртэм тунсыско шудонъёсын но вожвылъяськонъёсын, тужгес ческыт сиён-юон дасясьёсты быръёнэн пӧлэстӥськыса туж шулдыр ортчиз. 

Табере гурт калыклэн мылкыдыз ӝутскиз та интыез эшшо но чебер карыны но арлы быдэ отын гуртлэсь нуналзэ ортчытыны, эктон площадка радъяны. Ӟеч малпазэс улонэ пыӵатыны мед кылдоз ушмаослы.

Тодады вайытӥськом, та проектлэн кыкетӥ ужрадэз Покчи Лӧзя гуртын 2-тӥ гудырикошконэ ортчоз шуыса витиське.