Кузьымлы-данлыко тодэ ваён

1941-1945-тӥ аръёс… Быдӟым Атыкай ож. Макем шимес но кӧшкемыт та кыл?! 1418 уй но 1418 нунал ӵоже мынэм ожмаськон. Тужгес но бадӟым ыштонъёсын, трос виркисьтонъёсын котькуд семьялэн сюлмаз пыраклы кылем дыр. 27 миллион быремъёс, кӧня ивортэк ышемъёс, сӧсырмем улонъёс. Туж дуно усиз асьмелы та Вормон.

Туэ Вормон нуналлы 75 ар тырмиз. Историлэн бамъёсаз со арысь аре кыдёкегес выже. Со кышкытлыкез адӟем адямиос лыдъямон ӧжыт но ӧжыт кылё. Ожысь ветеранъёслэн, тылысь ветеранъёслэн радъёссы арысь аре кулэсмо. Атайтэк будэм ож дырысь нылпиослэн, соку гинэ вордскем пиналъёслэн сюлэмъёсазы али но бурмымтэ, пыраклы кылем яра со. Зэм, кӧня нылкышноос палкышно кылизы, кӧня нылпиос атайтэк будӥзы, кӧня нылпиос  вордӥськытэк кылизы?!

Мынам малпамея, Россиысь одӥгез но семья та секыт адӟонлэсь палэнэ ӧз кыльы, дыр. Арлы быдэ, Вормон нунал вуыку, матысь адямиосылэсь кылӥсько та Вормон нуналэз вайись ӵыжы-выжыосы сярысь.

Одӥгез соос пӧлысь Ермолаев Иван Васильевич — мынам ӵужатаелэн ӵужатаез. Вордӥськемын 1897 арын, Сизнер гуртын. Войнае со пыриськоно луэм арлыдо вакытаз ини. Соин ик, вылды, сое полевой кухняе сиён нуллӥсь карыса тодмояллям. Но жаляса верано, 10 коньывуонэ 1943 арын, мина улэ шедьыса, улонэн люкиськоно луэ. Берпум гожтэтаз, «ми кадь арлыдоослы ӝоген шумпотон ивор вуоз — доре лэзёзы» шуыса, пе, гожтэм. Но, кылдымтэ бертыны... Кӧня синвузэ кисьтӥзы, луоз, пересь ӵужанаймы, атайтэк кылем нылпиосыз?! Йырам соку ик чилектэм кадь тодам лыктӥзы Н.Байтеряковлэн кылбур чуръёсыз:

«Сандык пыдсын ӵужектэмын

Секыт ивор — тӧдьы конверт.

Курыт малпан каръяськемын:

Уз ву, уз ву! Ноку уз берт!»

Пересь ӵужаеным но озьы ик луиз, дыр. Мар мында нылкышноос ож вакытэ палкышно кылизы. Озьы ке но, нокин ӧз ӝожтӥськы, ӧз сётӥське соос лек тушмонлы. Берпум ымтыренызы нылпиоссэс сюдыса, кайгу-куректонзэс ужен вормыса, юрттӥзы солдаткаос асьме  ожгарчиосмылы. Со дыре вань калык одӥг осконэн улӥз: вордскем шаерез тушмон ки улысь мозмытоно.

Мукетыз ӵыжы-выжые — ӵужанаелэн песятаез Кунаев Михаил Прокопьевич. Вордӥськемын со 1909 арын, Ӟаны гуртын. Ожмаськонэ басьтэмын 29 инвожое 1942 арын. Таиз песятае тужгес но сэзь но кышкасьтэм луэм. Немецъёслы пумит 2 пол атакае потэм. Нырысетӥзэ — 6 оштолэзе 1945 арын Кённигсберг город азьысь Такенвальде гурт дорын. Гранатаеныз пулемётэз пуштытыса, отделениысь боецъёслы азьлане сюрес усьтэм. Кышкасьтэм, батырлыко луэмез понна пересь песятае куинетӥ степенё «Слава» орденэн пусйиське. Кыкетӥзэ — 16 оштолэзе 1945 арын Кабибульде гурт котырын, атакае потыса, 3 гитлеровецъёсты быдтэ. Та подвигез понна «За отвагу» медален пусйиське. Вормон нуналозь ожмаськонлэн пӧртэм фронтъёсаз со вуоно луэ, куинь пол сӧсырмыны шеде. Инмарлы тау, песятае ожысь сӧл-таза бертыса, трос аръёс ӵоже колхозын тыршем. Улон аръёсаз ож дырысь кыӵе гинэ дыръёсты, пе, тодаз уг вайы вал. Вань адӟемъёссэ мадьыны ке кутске, синвутэк кылзыны, пе, уг луы вал. Данъяськисько, таӵе  батырлыко сямъем ӵыжы-выжыеным.

Сыӵе ик кышкасьтэм, визьмо но гажано адями вылэм песятаелэн ӵужатаез Егоров Иван Николаевич. Вордӥськемын со 1901 арын Бадӟым Лӧзя гуртлэн 1 люкетаз. Быдэс ожмаськонэз офицер луыса ортчем. Котыр ёросын соослэн выжызы туж гажамон  вылэм. Атайзы Егоров Николай Егорович  Церковно-приходской школаын службаосты нуэм, дышетэм. Гуртооссы солы но, солэн нылпиосызлы но атай нимын гинэ вазиськыло, пе, вал. Семьяязы соос 6 кузя пиналъёс луиллям. Атайзы дышетӥсь луэмысь, нылпиоссы но туж грамотной луыса будӥллям. Соос пӧлын вылэм пудопершал но дышетӥсь, счетовод но колхозэн кивалтӥсь. (Песятаелэн  Евдокия апаеныз куке но егит дыръяз пумиськылэ вылэм ачиз тодмо удмурт писатель, милям гуртомы Г.С. Медведев).

Иван песятае 3 ожез пырпотэм адями: Нырысетӥ Дунневыл ожгар (1914-1918), Граждан ож (1917-1922), Быдӟым Атыкай ож (1941-1945).

Ожысен со туж ӟырдыт гожтэтъёс лэзьям. Со пичиесь гинэ гожтэтъёс гожтэмын вылэм чылкыт, валамон удмурт кылын. Пуштросаз шӧдӥськем  песятаелэн бадӟым сюлмо луэмез, анай-атайзэ, вордскем шаерзэ яратэмез, гурт калыксэ гажамез но мӧзмемез. Ож бырем бере со азинтэм кутскем ужзэ. Ӧнерезъя со вылэм музъем ужъёсъя лэсьтӥськись, Балтаси ёросын валтӥсь архитекторлэсь ужзэ быдэсъям. Солэн проектъёсызъя лэсьтэмын вылэм вуж эмъюрт, ветлечебница, клуб. Лэсьтӥськон  ужкагазъёс ваньмыз солэн киез пыр ортчиллям. 1959 арысен со тыршем «Красный Труд» артельын  нормовщик луыса. Тӥни сыӵе гажано адями вылӥллям атае паласен ӵыжы-выжыосы.

Туннэ нуналлы мон шумпотыса но данъяськыса вераны быгатӥсько Вормонэз вайись ӵыжы-выжыосы сярысь. Соос зэмос геройёс. Соослэн шаермес утемзы, тужгес но милям семьямылы, пыраклы синпельлы кылёз. Яркыт шунды, сэзь инбам, шудо улон — ваньмыз со асьме Совето Союзысь  калыкмылэн, матысь ӵыжы-выжыосмылэн улонзэс жалятэк нюръяськемзылэн емышез. Ойдолэ, ноку ум вунэтэ та туж секытэн сётӥськем Вормонэз, выжыысь выжые вераса кельтомы нылпиосмылы но соослэн нылпиоссылы ож дырысь геройёсты. Тодамы возёмы: Атаймузъеммылэн ӵуказе нуналыз асьме бордын. Мед луоз улонамы котьку тупаса улон, медаз шобырты тушмон сэзь инэз, котькуд  кӧлоно уйёсмы каньылэсь, вордӥськоно нуналъёсмы сайкытэсь мед луозы!

Полина Плотникова

Покчи Лӧзя шоръёзо школаысь 9-тӥ классысь дышетскись