Кытын уло удмурт батыръёс?

Ӥырдыт нюръяськонъёсы пыриськизы Карлыган, Сырья но матысь гуртъёсысь ӟыгытъёс - дышетскисьёс но студентъёс. Конкурсэз дасязы но нуизы Карлыган культура юртын ужасьёс - «Ӥардон» нимо удмурт фольклоръя калык ансамбльысь артистъёс. Кыӵе но могӟетъёс пыр потыны ӧз тупа ӟыгытъёслы вормыса потон понна! Удмурт кылын вольыт вераськемзэс, юрт котырын ужаны дышемзэс эскеризы, кужымзэс мертазы, нылъёслэсь йырсизэс пунӥзы, соослы мусо кыл веран устолыксыя визьзэс сыназы, вальс эктӥзы... Ӵошатсконъёс вискын Карлыган но Сырья гуртъёсысь артистъёс сцена вылын поръязы. Учкисьёс мылкыдзэс, куанэмзэс кужмо кичабонъёсын кисьтӥзы. «Мискиньёслэн» ымзы ик жадиз Карлыганысь Вершинин Дималэсь гир ӝутъямзэ лыдъякузы. Быдэс калыкез паймытӥз со: мугорын огшоры гинэ пияш кадь, 70 пол ӝутӥз 16 кг гирез! Со ик дано «Удмурт батыр» нимез но басьтӥз.

Ӵошатсконъёсы пыриськем егитъёсмылэн но учкисьёсмылэн нимынызы та вунонтэм, тунсыко пумиськонъёсты радъясьёслы - карлыганъёслы - тау кылмес вераськом но таин валче азьланяз но Мари-Турек но Балтась ёросысь удмуртъёслэн кусыпъёссы эшшо но юнмалозы шуыса оскиськомы.