«Кытын мынам егит дыръёсы?..»

Ужысь но ожысь ветеран, КПСС-лэн членэз, коммунистической ужлэн ударникез, производстволэн азьмынӥсез луись Зинаида Семёновна Медведеваен тодматскытозь ик тодӥ: со туж адӟем карымон но данъяськымон кышномурт.

Та сярысь гурт поселениын веразы, калык но сое туж гажа вылэм.  Зинаида Семёновна доры Покчи Лӧзяе лыктыса вуэме бере, нырысь ик капкаязы юнматэм пул синме йӧтӥз. Отын гожтэмын: «Та юртын улэ Быдӟым атыкай ожысь ветеран Кушаев Иван Семёнович». Монэ пумитаны потэм Людмила Ивановна шуиз: «Иван Семёнович — мынам атае. Редакциын но ужаз со. Нош Зинаида Семёновна мынам анаелэн сузэрыз. Зинаидалэн самой бадӟым агаез — Александр Семёнович — Грозный городлэн главаез вал куке но. Собере Ижевскысь обкоме ужаны интыяськиз. Мукет агаез, Кузьма Семёнович, жугиськон бере банкын ужаз. Туж адӟем карымон воргорон вал. Зинаида Семёновна но туж дано кышномурт. Мазэ веранэз, соин вераськыса, асьтэос но валалоды…»

Та юртын монэ пумитаз туж вольыт, чебер, веськрес мугоро кышномурт. Ӵапак Зинаида Медведева луиз со. Нырысетӥ малпанэ: зэмзэ-а солы туэ укмыстон арес тырмоз?.. 

Медведева Зинаида Семёновна 1931-тӥ арын Покчи Лӧзя гуртысь огшоры крестьян, трос нылпиё семьяын вордскем. Семьяязы соос сизьым кузя нылпиос луиллям (куинез атаезлэн нырысетӥ кышноезлэсь нылпиосыз), кылем ньыль нылпиоссы вордско кыкетӥ кузпалъяськонэзлэсь. Зинаида — семьяязы самой покчи нылпизы.

— Анай-атае вазь кулӥзы, — синкылиоссэ ватыса вера Зинаида Семёновна. — Соин улонысь шуг-секытъёсты нылпи дырысен ас выламы шӧдыны тупаз. Озьы ке но, школаын дышетскыны быгатӥ. 1939-тӥ арын гуртысь сизьым классъем школае дышетскыны пыри, сое 1946-тӥ арын отличиен йылпумъяй».

Школаын дышетскыкуз ик Зинаида колхозын ужаны кутскем. Али но тодаз на, кызьы соос етӥн, пыш ишкаллям, кӧжы октӥллям, Ушма нюлэскы ветлыса. Отын кыӵе умой луэм: кӧжылэсь шыд но ӝук пӧзьтӥллям, кӧтсэс тыриллям. Шутэтскыкузы шулдыръяськыса, огазе пӧртэм сямен шудӥллям. Тужгес тодаз кылемын турын турнан дыръёссы. Кырӟаса-кырӟаса турын октэмзы, чуръямзы. Шошма — дорын, нуналаз дас пол но вуэ пыласькыны ветлӥллям. Со понна ик бадӟымъёслэсь соослы йӧтэм но.

Сизьыметӥ классэ йылпумъямез бере, Зинаида Казаньысь капчи промышленностья техникумысь обувной отделение дышетскыны пыре. 1950-тӥ арын, дышетсконзэ отличиен йылпумъямез бере, Зинаидаез Свердловскысь «Уралобувь» фабрикае ужаны лэзё. Визьмо, тыршись, вылӥ куронъёсты пуктӥсь, лякыт сямо нылкышноез ужаз гажало но ярато. Нырысь со заводын мастер луыса ужа, собере инженерлэсь ужзэ быдэсъяны кутске. Ужъюлтошъёсыз пӧлын ужась нылкышно гажанэ вутске, солы самой секыт но кылкутымон ужъёсты но оско (пӧсь цехъёсын, конвееръёсын ужъёсты). Ужало кык сменаен. Кӧня ке дыр ортчыса, сюлмыз вордскем палъёсаз кыскыны кутске.

— 1963-тӥ арын Казане бертӥ. Аслам ӧнерея «Спартак» пыдкутчан фабрикае производственной дышетонъя мастер луыса ужаны интыяськи, 35-тӥ номеро училищеысь егит дышетскисьёсты пыдкутчанэн герӟаськем ужъёсын вырыны дышетӥ. Группаосы дышетсконъя но, практикая но, дисциплиная но самой умойёсыз пӧлын вал. Конкурсъёсын но мынам группаосы призо интыос басьтылӥзы. Малы ке шуоно мон зэмзэ но аслам уже шоры кылкутыса учки, сое яратыса но кулэезъя быдэсъяны тырши, — шуэ Зинаида Семёновна.

Трос-трос тодэ ваёнъёсыз кышномуртлэн егит дырыз сярысь. Татарстанысь ёросъёсы ужаны ветлэмзэ (Саба районэ картофка октыны ветлӥллям, Верхний Услонэ — улмо люканы), группаосыныз концертъёсты дасямзэ но калык азьын выступать каремъёссэ со умой тодэ. Ужез шоре кылкутыса учкемез, организаторской быгатонлыкъёсыз понна ик Зинаида Семёновнаез «Спартак» фабрикалэн 35-тӥ номеро училищеяз завуч карыса тодмосто. Киев, Луганск, Ленинград городъёсы квалификацизэ ӝутыны но ветлэ нылкышно. 1975-тӥ арысен бытовой обслуживаниея Министерствоын инженер луыса ужаны кутске (кивалтӥсез соку Евгений Борисович Богачёв луэм, со котьку Зинаида Медведевалэсь ужамзэ вылӥ дунъям). Татын ужакуз, Зинаида Семёновна трос ветлэ командировкаосы, эскеронъёсы, егитъёсты ужаны дышетэ, соослы визь-кенеш сётэ. 1986-тӥ арын дано шутэтсконэ потэ. КПСС-лэн членэз, коммунистической ужлэн ударникез (1980), производстволэн азьмынӥсез, ужысь но ожысь ветеран со. Трос таукарон гожтэтъёсыз, данъян грамотаосыз, медальёсыз вань Зинаида Медведевалэн. Одӥгез ласянь гинэ жаляса вераны тупа, со кузпалъяськымтэ, нылпиосыз но солэн ӧвӧл. Туннэ нуналэ апаезлэн нылыныз кыкназы туж тупаса, ог-огэс яратыса уло соос.

—  Пенсие потэме бере но али Казаньын улӥ. Вить ар талэсь азьло татчы, Лӧзяе бертӥ. Малы ке шуоно тазалыке лябӟиз, соин апаелэн нылыз доры бертӥ. Людмилаен котьку умой вал кусыпъёсмы, котьку эшлыко улӥмы. Али но озьы улӥськомы. Мон котьку но адямиосын — ӵыжы-выжыос-а соос, валче ужасьёс-а, огшоры тодмотэм адямиос-а — огъя кыл шедьтыны тырши. Город улонлэсь куддыр мӧзмисько ке но, татын улыны мыным кельше. Быгатэмея юрттыны тыршисько,  гуртын уж уг быры ноку но. Трос уг ужаськы ке но, каллен-каллен созэ-тазэ ужасько. Мон гуртын будэм адями бере, ужлэсь уг кышкаськы. Ушъяськыса уг вераськы, но монэ адямиос гажало, шумпотыса пумитало, ӵемысь куное но мон доры вуыло. Мон талы туж шумпотӥсько, пересьмон дауре вуэм бере, солэсь но бадӟым шумпотон вань-а меда? — шуэ Зинаида Семёновна.

Вераськонамы Зинаида апайлэн племянницаез, Людмила Ивановна Мухина, итӥське.

— Ваньмыз озьы. Котьку ог-огмылы юрттыса улӥмы Зинаен. Ваньмыз ласянь адӟем карымон кышномурт со. Со понна ик сое котьку гажазы, али но гажало. Нош кыӵе вал со чебер, кыӵе со умой но валаса дӥсяськиз, кыӵе умой ассэ котьку возьыны быгатӥз! Ма, ужез но сыӵе вал. Ми, солэн племянникъёсыз, ваньмы со пыр потӥмы шуыны луэ. Зинаида Казаньын улыку, ми студентъёс вал, со котькудмес ас дораз вайиз, котькудмес утиз, сюдӥз-вордӥз.

Зинаида Семёновна Людмила Ивановналэсь верамъёссэ туж сак кылзӥськиз но кӧня ке дырлы ас малпанъёсызлы сётскиз. Берлогес со малпанъёссэ шара вераз: «Сыӵе вал мон… Котькытчы вутскись, етӥз, тэк пукисьтэм. Туж активной улонэн улӥ, кытчы гинэ ӧй вутскы. Адямиез кылзӥськыны но быгатӥ, со дыре ик аслэсьтым малпанъёсме но вераны ӧй кышка. Кытын мынам егит дыръёсы?..»

Егит дыръяз Зинаида апай балалайкаен но, гитараен но шудэм. Сотэк уг ортчыло вылэм нокыӵе концертъёс но, ужрадъёс но. Кырӟаны но туж яратэм. Ма, кырӟаны али но пумит ӧвӧл вылэм со. Тужгес солы удмурт кырӟанъёс кельшо. «Мон удмурт ук, кызьы удмурт кырӟанъёсты уд кырӟа ини», — пайме кышномурт.

14 аресэз тырмытозь гуртын улэм бере, гурт улонэз но, удмурт кылэз но туж матын каре, ужлэсь но уг кышка, ӟеч кылъёсты вераны но уг жаля Зинаида Семёновна. Тӥни озьы, висёнъёсызлы ӝожтӥськытэк, луэмезлы шумпотыса улыны быгатэ со.