«Ми шимес ож дырысь нылпиос...»

Та нуналъёсы Бадӟым апаелы 90 арес тырмиз! Мынам солэн улонэз сярысь ӧжытак вераме потэ. Бадӟым апай — со мынам атаелэн сузэрез луэ.

Кузнецова (Лобанова) Лидия Ивановна вордӥське Вукогуртын, адӟем карымон семьяын. Соослэн атайзы — Иван Павлович — ас корказ нырысетӥ школа кылдытэ. Семьязы таза юртъерен, кык валэн улэм. Нош революция бере раскулачить карыны турттӥллям соосты. Ас кужымен ужаса улэмзы понна, ляльчиоссы ӧвӧлэн кельтӥллям. Та учырез бускельмы Митта агай вералоз вал пичи дыръям. Колхозъёс кылдэм бере бабаймы-песятаймы Вукогурт колхозэн но кивалтэм. Нош шимес ожмаськон дыръёс вуыса, бабаймылэн улонэз куспетӥ луэ. Атыкай музъемез утьыны кошкыса, со Калуга город дорын бырыны шеде... Солы соку 40 арес котыр гинэ луэм на! Озьы кык пиос но кык нылъёс атайтэк кылё. «Атайме чик но уг тодӥськы», — шуэ Бадӟым апай. Соин но, дыр, клуб вӧзамы сылӥсь обелиск доры васькыса, «атайме адӟыны лыктӥ» шуэ со.

Песянаймылы улон сюресаз трос кайгу адӟыны тупам. Со тазьы вера вал: «Семонэз, Коляез, Лидаез но Ӟинаез будэтыкум, сапег но ачим лэсьтӥ, керттӥськи, вуриськи, ачим геры кутыса гырисько но вал». Жугиськон со — котьку кайгу вае, таин гинэ уг быры— бадӟым пизэ но оже басьто! «Семонме вӧсяськыса кельтӥ мон кулонлэсь», — шуоз вал песянае.

Бадӟым апаймылы 90 арес! Гуртын будыса, ужаса, котьмаин тунсыкъяськем со: усто пужыятскись, чильтэр но керттыны быгатэм. Школаын дышетскыкуз эктонъя но кырӟанъя удмурт ансамбле пыриськем. Соку Ципья школаямы сиё-дано дышетӥсьлэн Пётр Кубашевлэн ужан дыръёсыз тупаллям. Тани Леонид Сапожниковлэсь книгазэ киям кутӥсько ке, отысь апайме шедьтӥсько! 

«Ципья школаез йылпумъяса, фермаын ужаны кутски, со дырысен нокытчы кошкытэк, скал кыскисен пенсие потӥ мон», — шуэ. Озьы тӥни апаймы улонзэ гуртын ортчытэ. Кузпалзэ но ас гуртысьтыз шедьтэ. Куатьтон куать ар улэ ини со Петыр Васьлэй юртын Кузнецова Лидия луыса, нош сое ялан Данька Лида апай шуо на гуртын. Шур сопалан гинэ улэ ке но апаймы, «дӥне кемалась ӧй ни поты» шуэ. Солэн сюлмаз кужмо пыӵамын ас юрттэ, гурттэ но ӵыжы-выжыдэ яратон мылкыд!

Кырсиен туж тупаса, тыршыса нылпиос будэтӥзы: кык ныл но кык пи. Колхозын котьку вылӥ чотын, адӟем карымон ужъёсын данъяськизы соос. Шулдыръяськонын котьку азьветлӥсь луизы, кырсимы усто мызганчи уга! Али но син азям кадь пичи дырысь ёлка праздникъёс. Отын кырсимы воштонтэм Тол Бабай луоз вал. Апайлэн тӧдьы ферма халатэныз пичиосыз серекъяны но шумпотыны лӧпкытылӥз. Нош кияз мызганзэ ке кутӥз — ваньмыз экто!

Табере апаймы бадӟым но синмаськымон семьяын шумпотыса улэ. Кык пиосыз гуртамы ик уло, одӥгез кензы но ас гуртысьтызы ик. Вот чин Вукогурт выжы! Ваньзы соос колхозын ужало, быдэ вуэм кык пиоссы- нунокъёссы вордскем гуртмес городлы ӧз воштэ! Гуртын уло, колхозмес ӝуто, семья кылдытыса, нылпиос будэто! Ужаны но, шулдыръяськыны но быгато, куспазы но тупаса уло. 

Нылъёслы кылдэм ини ас юртысь лобӟыны, соос Коми музъемын уло. «Кыдёке кошкизы нылъёсы, адӟеме потыса улӥсько», — ӝожтӥське апае. Кыдёкын ке но, бертыло, телефонэн жингырто соос. 

«Ньыль нылпи пӧлысь мон огнам таӵе кема улӥсько ини, озьы ке но та дуннеысь кошкем уг поты. Кызьы люкиськод таӵе капчи улонлэсь, узыр, шулдыр но югыт дуннелэсь?!» — шуэ со.

Гажано апае! Тон котьку «Азьлане» газетэз кутсконысен пумозяз лыдӟыны яратӥськод. Та чуръёсме тыныд сӥзисько. Улонлы шумпотон мылкыдыд ноку но медаз кысы!

Нина сузэред

Туспуктэмъёс: личный архив