«Мон «дэремен но такъяен» вордскем адями»

Туала улонын но ӵемысь кылыны луэ та висъяны луонтэм кылтэчетэз (фразеологизмез) — «дэремен» вордскем нылпи. Туннэ нуналэ но сое вераськонамы шудо, удалтӥсь адями сярысь вераку кутӥськомы. Нош кытысь, ма бордысь таӵе веран потэм? — Та юанлы валэктон шедьтэм потӥз кемалась ӧвӧл 90 аресъем юбилейзэ пусъем Нина Михайловна Гавриловаен вераськем бере.

— Мон сизьым толэзен вордскиськем, — шуэ Нина Михайловна. — Анай бадӟым пуртые 8-9 сукыри потымон нянь котэ вылэм, сое гур вылэ ӝутыкуз, секыт йӧтэм но усем. Тӥни вот! Кылдэмез озьы луэм, дыр, ини соку вордскыны... «Эске, мон сизьым толэзен вордскемысь, 13-тӥ декабре вордскемысь шудтэм адями луиськем», шуисько вал анайлы. Нош анай мыным: «Ӧвӧл, ӧвӧл, Нина, тон «дэремен но такъяен» вордскем адями, соос шудо луо», — шуэ вал.

Вашкала дыръя дыжен (оболочка, плёнка) вордскем нылпиез гумыраз шудо луоз шуыса малпало вылэм. Сыӵе учыре, вордскыкуз, нылпи со дыж улын ӝокаса кулыны быгатэ. Озьыен, гогы вандӥсьёслы туж ӝог, пе, вырыны тупа вал, пиналэз кулонлэсь утён понна. Соин кулонлэсь кылем пинал азьланяз но шудо луоз шуыса лыдъяськем, нош со дыж бератаз «дэремлы» пӧрмем. Со «дэремез» семьяын туж утиллям. Сое куасьто но кадырласа гинэ возё, пе, вал. Та кылъёсты но юнматӥз Нина апай:

— «Дэремен такъяме», куасьтыса, атай сьӧраз жугиськонэ нуэм, сэре ыштэм сое, ой, ыштӥ, пе, шуыса сюлмаськем туж... Но, Инмарлы тау, атай войнаысь улэп бертӥз.

— Нина Михайловна, туннэ нуналэ тӥ быгатӥськоды-а вераны, улонды шудо шуыса?

— Туннэ нуналэ мон туж шудо улӥсько. Воваен Аляос монэ туж умой утё. Тау соослы. Мон укмыс ар улӥсько ини татын, дасэтӥ араз кошкиз ини. Сыӵе но айбат улӥсько. Шуныт коркан, ческыт сюдо, ваньмыз чылкыт, утялтэмын. Собере Сырьяысен шумотлы быдэ Алялэн нылыз, Анюта, лыктэ монэ мунчое пыртыны, мунчое пыртэ, йырсиосме утялтэ. Монэ кадырласа возё, Инмарлы тау. Аля луымтэ дыръя, Вова сиён пӧзьтэ. Али мынам Алёшае вань — Аляослэн покчи пизы. Комнатаез пылесосить карыса гинэ возе, миське но. «Бабушка, тынад тузон луэм али», шуэ. Укноез но ӵушылэ, котыр ӵушылэ. Ачиз дышетске ке но, ужа. Нылкышнолэсь но айбат ужа. Туж чылкыт возё монэ, — шумпотон но таукарон мылкыдъёссэ усьтэ песянай. 

Зэм но, Нина апайлэн пальпотӥсь ымнырызъя ик адске, гумырыз юнме ортчымтэ, сое татын — шудо пересьмон нуналъёссэ песянай вынызлэн нылыз дорын, Алевтина Петровна дорын, ортчытэ — ярато, гажало но кадырлало.

Быдэс статьяез «Азьлане» газетлэн 2024-тӥ арын потэм берпуметӥ номерысьтыз лыдӟыны луэ. 

Туспуктэм: Л. Алпутина.