Мусо пальышамзэ ноку но ум вунэтэ

2023-тӥ ар. 20-тӥ толсур. Та нуналэ куазь но пилемо луиз, я кыдыраса, я лымыен суро зориз. Инкуазь но «бӧрдӥз» кадь, Александр Сергеевичез берпум сюресаз келяса...

Александр Сергеевич Петров вордӥське 27 гудырикошконэ 1938-тӥ арын Гондыргуртын. 1961-тӥ арын, армиысь бертэмез бере, егит Александр «Азьлане» газетлэн редакцияз ужаны кутске но 23 ар улон гумырзэ кылысь кылэ берыктон ужлы сӥзе. Александр Сергеевич туж усто кылысь кылэ берыктӥсь луэм. Со сярысь соин ӵош ужам котькин выльысь но выльысь вера. Александр Сергеевич кагазэ гожъятэк меӵак машинисткалы диктовать каре вал шуыса тодаз ваё соос. «Постой, погоди» гинэ шуэ, пе, вал солы Ушмаысь машинистка луыса ужась Волкова Мария но. 

2018 арын 80 аресъем юбилеез азьын Александр Сергеевич дорын куноын луыны тупаз вал. Урамысен ик дуно кунооссэ кадь пумитаз милемыз соку Сандыр агай (матын карыса озьы гинэ вазиськылӥмы солы). Кема вераськимы соин, редакцилэн, газетмылэн бадӟым но узыр историез сярысь трос выльзэ соку тодӥмы.

Шумпотымон, улонэз юнме ортчымтэ Александр Сергеевичлэн — ӵош ужасьёсыз сое котьку гажаллям, азьланяз но гажаса тодазы ваёзы, семьяез но сое сюлмысь яратэм. Кузпалэныз Елена Семёновнаен соос вить нылпи будэтӥллям, улонысь шуг-секытъёс пыр валче потӥллям.

Александр Сергеевичез вордскем гуртаз но, котыр ёросын но, удмуртъёс верам сямен, чипыен-куреген тодо вал, дыр. Туж визьмо, сабырлы, каньыл мылкыдо, небыт но ӟеч сюлэмо, лякыт вераськись но котьку пальпотӥсь ымныро воргорон вал со. Ӵапак таӵеен ик кылёз со сое тодӥсь адямилэн тодаз но сюлмаз. Ми но, газет поттон удысын ужасьёс, «Азьлане» газетлэсь зэмос патриотсэ, оскымон лыдӟисьсэ но матысь эшсэ сыӵеен тодамы возёмы.

Александр Сергеевич, ӟеч кӧлэ... Пеймыт гуды югыт, секыт сюйды мамык выллем капчи, нош интыды узьмагын медло. Ми тӥледыз ум вунэтэ, «Азьлане» газетлэн историяз тӥляд нимды зарни букваосын гожтэмын.

Ёрос газетлэн коллективез Александр Сергеевичлэн кузпалэзлэсь, нылпиосызлэсь, внукъёсызлэсь, правнукъёсызлэсь но матысьёсызлэсь мур кайгузэс люке.