Музъемез кадырлано

Та дырозь музъемъя законэз тӥям физической лицоослы - 2-5 сюрс, должностной лицоослы - 4-6 сюрс, юридической лицоослы 80-100 сюрс манет штраф поно вал ке, табере соослэн быдӟалазы трослы будоз, музъемлэн кадастр дунэзъя лыдъяськоз.

Куинь ар но солэсь тросгес дыр куспын гурт хозяйствоя музъемъёс ужамын ӧз ке луэ, законъя кылкутӥсь адямиез ответственносте кыскыны, озьы ик солэсь музъем кесэгзэ берен басьтыны луэ. Но та дырозь луэм куронъёс шӧдскымон небытэсь вал, музъемен «шудон» прибыль гинэ вайылӥз. Табере закон ӧжытак чурытгес луэ. Воштӥськонъёс сярысь верано ке, гурт хозяйствоя музъемзэс обработать карымтэ гражданъёслы, кадастр дунлэсь 0,3-0,5 процентсэ лыдъяса, штраф понӥськоз, но со штрафлэн быдӟалаез 3 сюрс манетлэсь ӧжыт луыны кулэ ӧвӧл. Кивалтӥсьёслы музъемлэн кадастр дунэзлэсь 0,5-1,5 процентсэ, яке 50 сюрс манетлэсь ӧжыт луымтэ штрафез тыроно луоз. Огазеяськонъёс музъем дунлэсь 2-10 процентсэ тырыны кулэ, но солэн быдӟалаез 200 сюрс манетлэсь ӧжыт луыны кулэ ӧвӧл. Самой бадӟым административной штрафлэн быдӟалаез 500 сюрс манетозь вуыны быгатэ.

Музъем кузёос, арендаторъёс, музъемен пайдаяськисьёс, асьсэды зэмос кузё выллем возьыса, музъемез утьыны, солэсь удалтонлыксэ будэтон вылысь азинлыко уж нуыны кулэ.