Нюлэс – тодмотэм но кышкыт дунне

Улӥын сётэм куронъёсты лыдэ басьтӥды ке, нюлэскы ветлондэс тӥ шумпотыса гинэ тодэ ваёды.

1. Нюлэскы мынон азьын рос-прос дасяськыны кулэ. Мыноно маршруттэс азьвыл ик тодмостэ. Одно ик матысь адямиостылы кытчы мынэмды но ку бертэмды сярысь вералэ. Сьӧрады шырпу яке зажигалка (соосты, медаз котме шуыса, пакетэ понӥд ке, умой луоз), пурт, компас, зарядить карем телефон (пауэрбанк но уз люкеты), ву басьтыны кулэ. Тазалыкеныды шугъяськонъёсты вань ке, сюрес вылэ потон азяды одно ик кулэ луись эмъюмъёсты басьтэ.

2. Дӥськутты но яркыт буёло мед луоз, светоотражателез луиз ке, эшшо но умой луоз. Та тодмет тӥледыз, ышиды ке, чальгес шедьтыны юрттоз. Одно ик йыре понон, кузь саесо дэрем яке кофта но брюки дӥсялэ, лемтэйёслэсь, куакъёслэсь утиськон понна. Пыдкутчан котмисьтэм но юн, пыдын ветлыны каньыл луыны кулэ.

3. Умой луоз, вӧзады нюлэсэз тодӥсь мурт луиз ке. Нюлэстӥ оген ветлон умойтэм пала вуттыны быгатэ.

4. Нюлэскы вуэмды бере мур пырыны эн дыртэ, нюлэс дуръёстӥ гинэ ветлыны тырше. Нош мурегес пырыны малпады ке, пырон азьын котырак учке но эшшо огпол асьтэлы пусъе ориентиръёсты. Нюлэскы пырон азьын компасады учке, ышиды ке, тӥ компасъя со пала ик потыны быгатоды (яке телефон пыр электронной карта вылэ пуктэ точка, кудӥз сюрес кутскемдэс возьматоз но капчиен берытскыны юрттоз). Нюлэс пушкы пырыса но син шоры йӧтӥсь ориентиръёсты утчалэ, тодады кельтэ яке асьтэос тодмостэ.

5. Нылпиосын ӵош мынӥды ке, соосты умой учке! Дорысьтыды кыдёке кошкыны эн лэзе.

6. Тылпулэсь утиськонъя куронъёсты чаклалэ. Эн тылске! Нюлэскын тылпу потон – туж кышкыт югдур. Вань тылпуос пӧлысь 95%-эз адямилэн янгышезъя кылдэ.

7. Нюлэскысь пӧйшуръёсты эн кышкатэ, эн исалэ, эн сюдэ.

8. Кыйёслэсь палэнске.

9. Тодмотэм будосъёсты, емышъёсты, губиосты эн сие.

10. Тодмотэм интыосысь, сюрес вылын люкаськем вуосты юыны эн тырше.

11. Ышиды ке, ӧнерчиос нырысь ик буйгатскыны куро. Сак кылзӥське, мар вань котырады. Куддыр машина яке адями куараос шонер сюрес вылэ потыны юртто.

12. Тӥледыз одно ик утчалозы шуыса тодӥськоды ке, интыысьтыды эн кошке, тылске но возьмалэ. Дырын-дырын пӧртэм куараен сигнал сётыны быгатӥськоды: черекъялэ, бодыен писпуэ шуккылэ.

13. Нюлэскысь асьтэос потыны турттӥськоды ке, азяды шонер гож пуктэ но сое ыштытэк азьлань мынэ.

14. Нюлэскысь бертэмды бере мугордэс но дӥськуттэс пыр-поч эскере. Куд-ог агуло нымы-кибыос дыр ортчыса гинэ куртчылыны быгато.

15. Но котьку тодады возе: нюлэс чылкытэз яратэ, соин йыртэмаса, жагтӥськыса эн ветлэ.