Нюлэс будэтӥсь аспалмы

Вордӥськем палъёслэсь кыдёкын ке но улӥськомы, табере котьма тодыны луэ: телефон но интернет туж усто юрттӥсьёс луо. «Азьлане» газетэз лыдӟыны тужгес но яратӥсько. Отысь будэм эшъёсме но адӟыны луэ, выль иворъёс, пӧртэм учыръёс сярысь тодыны. Кин ке но трос нылпиен данъяське, куд-огез ужын азинсконъёсын паймытэ, нош мон таяз учыре ӵош дышетскем пияше сярысь гожъяло чуръёсме.

Нимыз солэн — Геннадий Петрович Андреев (Максим Геня шуо вал пичи дыръяз). Вордскем со Кутэш гуртын, огшоры семьяын.  Пичи дыръяз ик анаез покчи пизэ, Генязэ, механизатор карыса, вордскем юртаз кельтыны малпам. Со озьы ик будэм, пичиысен ужаса, куара кылзыса, школаын умой дышетскыса, лачмыт возем ассэ. Нурмаын тракторлы право басьтэм бераз, армие кошкем. Кык ар границамес возьмаса бертэм но колхозын тракторен ужаны кутскем. Нош улоназ куаӵак воштӥськонъёс луыса, егит пияш Киров улосысь нюлэс техникуме дышетскыны пырыны малпам.  

— Геннадий Петрович, бен школа йылпумъямедлы ньыль ар ортчыса дышетскыны секыт луиз, дыр, ук?

— Ӧвӧл, милям Ӟаны школаын ик дышетӥсьёсмы туж кужмоесь вал. Математика, химия, биология, история капчиен сётскизы. Со сяна, спортъя кужмо вал школамы, шахматъя, шашкия кружокъёс, хор но удмурт ансамбль вань вал — ваньмыз со мыным техникумын но собере институтын дышетскыны юрттӥзы. Монэ тодӥсь дышетӥсьёслы таукарон кылъёсме вераме потэ. Одӥгез гинэ секыт луиз, кунгож кыл ӧз дышетэ, латин кылын будос нимъёсты туж секытэн дышетскыны тупаз (серекъя).

— Техникумез йылпумъямед бере улонэд кызьы воштӥськиз?

— Семья кылдытыса, трос аръёс ӵоже Киров улосын нюлэс будэтон но утён удысын тырши. Пӧртэм дыръёс луизы, тужгес но укмыстонэтӥ аръёсы. Нюлэс будэтон интые, нюлэс вузась но луыса ветлыны тупаз. Аслам ужасьёсылы уждун сётъян понна, пулэн но корен сюрес вылэ потӥсько вал. Яке сакыр песоклы, пызьлы, вӧйлы вошъясько, полиэтилен плёнкалы, шкафьёслы но диванъёслы вошъян дыр но луиз. Со дыре сюрес вылын туж кышкыт вал, уксёез яке вузано арбериез таласьёс трос луизы (рэкет). Пистолет но автомат гумылэсь но пегӟон дыръёс вань вал. Ваньзэ тодэ вайисько ке, сюлэмшугъяськонэ ик вуисько.

— Али дыре нош кыӵе ужъёсыд мыно?

— Пичи гинэ карамы кык лесхоз вал, отын сю ньыльдонлэсь но трос ужась адями тыршиз, нош табере со ик ужез дас вить ӵошен гинэ быдэсяськомы.

— Нюлэс уждэ воштон сярысь малпанъёсыд ӧз кылдэ-а?

—  Котькыӵе шуг-секытысь потыны тыршоно, ас ужме куштон сярысь малпанъёс огпол но йырам ӧз лыктэ. Кызьы быгатӥ, озьы ужай. Адӟизы но дунъязы тыршемме: Москвае Кремль двореце но кык пол нюлэс ужась делегат каризы, трос гинэ грамотаосын пусйизы. Нош таяз аре тужгес но вылӥ дунъязы мынэсьтым тыршемме «Заслуженный лесовод России» сиё-дано ним сётӥзы.

— Ми сюлмысь ӟечкыласькомы тонэ вылӥ дунъям нимыныд, озьы ик данъяськиськом тыршись аспалэнымы, кузпалэн, атаен но ӵужатаен! Вераськемед понна тау!

Нина Лобанова,

Нолинск кар