Ольга Степанова: «Пинал дыръя вылэм улон…»

Палэнын гинэ вераськыса сылӥсь кык воргоронъёсты синйылтӥ. «Таӵе куазен кин урамын ветлоз? Вылаз ик, ӵуказе праздник (вераськонмы 31-тӥ гудырикошконэ луиз). Соин ваньзы дасясько: школае мынӥсь нылпиоссылы, внукъёссылы дӥськутъёссэс, сяська керттэтъёсты радъяло, луоз, студентъёссэс дышетскыны келяло… Олькапай но ужъёсын выре, дыр», — шуизы соос мыным. Отын ик вуоноын кӧня ке гуртооссы сярысь материал дасяны ӵектыса, Олькапай (Ольга Петровна Степанова) доры келязы.

Урамысен ик Степановъёслэн юртсы утялтэм но чылкыт адскиз. Укнооссы весяк чебер сяськаосын тырмытэмын.

— Бен, сяськаосты яратӥсько мон, — пальпотыса пумита монэ песянай, укноосысьтызы сяськаослы синмаськыса учкемме адӟыса. — Соос улонэз шулдырто, чеберто. Но, зэмзэ ке верано, али туж ик курадӟеме но уг поты, дыры но уг луы. Сяськаос сярысь вераськыса-вераськыса, юртазы пырыса, ӝӧк куспы пуксьыса интыяськимы но интервьюерлэн улон-вылонэз сярысь вераськыны кутскимы.

Ольга Петровна 1942-тӥ арын Пор-Кутеш гуртын вордскем вылэм.

— Семьяямы ми куинь кузя нылпи вал. Мон покчиез, кык агайёсы вань вал. Анае, Мария Петровна, гумыраз колхозын ужаз, атай жугиськонын кулӥз… Со ожмаськонэ кошкыку, мыным кӧня ке толэзь гинэ луэм. Озьыен, атайме мон огпол но ӧй адӟы. Син азям сое туспуктэмезъя гинэ вайыны быгатӥсько (атайлэн одӥг гинэ туспуктэмез кылем вал, соиз но пичи форматэн туспуктэм вал).

Жугиськон дыръя но, жугиськон бере но семьяез секыт аръёс витё. Ольга Петровна соку пичи луэмысьтыз, ваньзэ пыр-поч тодаз ӧз вайы ке но, тэльмырыса но курадӟыса улэмзы сярысь ватытэк вераз.

— Анай жугиськон сярысь вераськыны ӧз яраты. Секытсэ со адӟиз ини, нылпиосыз со сярысь медаз малпаське но медаз тодэ шуэм, дыр… Агайёслы но секыт йӧтӥз: самой секыт ужъёс соослы оскемын вал. Тодӥсько на агайёсыным ӵош ужаса ветлэмме. Уробоен турын нуллӥмы, колхоз бусыын уриськимы. Поттурын нянь сиимы. Яра али милям пудомы вань вал, соин озьы но тазьы кӧтмес тырыны быгатӥмы, — шуэ песянай.

Гуртысьтызы ньыль аръем покчиёзо школаез йылпумъяса, Ольга Шор Кушкетэ сизьым аръем школае дышетскыны выже, нош собере — Ципья школае. Отын со 10-тӥ классэз йылпумъя. Собере дышетсконзэ уг азьланьты ни. Семьяенызы соос Марий Эл республикае улыны выжо.

1960-тӥ аръёсы Татарстанысь трос семьяос Марий Эл республикае улыны кошкиллям вылэм. Сыӵе семьяос Пор-Кутешын но луиллям. Адямиослэн верамъёссыя, азьло Марий Элын, Татарстанэн ӵошатыса, улон умойгес луэм.

— Улон умойгес шуэм кыл тодӥськод-а мае валэктэ? Со нюлэсъёслэсь, озьы бере, пулэсь луэмзэ валэктэ. Со дыръёсы нюлэстэк улыны уг луы вал ук. Соин милям гуртысь но, Пор-Кутешысь, трос семьяос кошкизы бускель республикае. Отын мон куинь ар ӵоже улӥ, ужай циркулярной станокен. Нош собере… берен вордскем палъёсам берытски.

Ольга Петровна малпамтэ но, улон сое нош ик Татарстанэ, вордскем палъёсаз вуттоз шуыса. Вукогуртысь Афанасий, Марий Элын улӥсь ӵыжы-выжыосыз доры куное ветлыкуз, чебер Ольгаез синйылтэ. Кема дыр ортчытэк, соос кузпалъясько.

— Анае монэ «Татариысь кошкыса, нош ик Татарие бертӥськод» шуыса, бӧрдыса, жаляса келяз, — тодаз вае Ольга Петровна.

Вукогуртын улыны кутскыкузы, Ольгалы 21 арес луэ. Егит ныллэн школаын дышетскемез сяна тодон-валанэз луымтэен, гуртын уж луымтэен со колхозэ ужаны интыяське. Кыӵе гинэ ужъёсын ассэ эскерымтэ со: скалъёсты но кыскем, кунянъёсты но сюдэм, дас ар ӵоже пудоосты но бызьылытэм, пӧртэм ужъёсты быдэсъям. Нокыӵе ужлэсь кышкасьтэм Ольга Петровна ваньмыз борды рос-прос басьтӥськем, ваньзэ кулэезъя быдэсъям. Соин кышномуртэз ас дыраз трос данъян грамотаосын но таукарон гожтэтъёсын пусйиллям (туспуктэмын). Пенсие со 50 аресэн потэм ке но, кӧня ке ар ӵоже колхозын ужзэ азьланьтэм на. 

Афанасий кузпалэнызы соос вить нылпиоссэс будэто но пыд йылазы султыто. Туннэ нуналэ витез но ас семьяоссэс кылдытыса уло. Нина нылыз Покчи Лӧзяын, Галина — вӧзаз гинэ, бускель юртын улэ. Юрий но Василий пиоссы но Вукогуртын уло, Владимир — Ципьяын. Ачиз Ольга апай покчи пиеныз Василиен, солэн кузпалэныз Ольгаен но Роман но Артём внукъёсыныз ӵош улэ. Жаляса верано, кузпалыз кӧня ке ар талэсь азьло кулэм ини.

— Макем шудо адями ведь мон. Нылпиосы ваньзы вӧзам гинэ. Нина гинэ кыдёкынгес. Кыӵе ке праздник вуэ вылэм — бадӟым семьяенымы, ӵыжы-выжыосынымы валче люкаськыса шулдыръяськиськомы. Ӝӧк куспы но ум тэриське. Гуртын улӥсь внукъёсме но ураме потыса гинэ но адӟыны быгатӥсько. Со шуд ӧвӧл-а? — пальпотыса вера нылкышно.

Ассэ Ольга Петровна юнме гинэ шудо адями уг шуы. Туннэ нуналэ солэн дас вить внукез но вить правнукез вань ини. Внукъёсыз песянайзэ но ӵужанайзэ ярато, ӵемысь со доры куное лыкто вылэм.

— Внукъёсы шоры учкыса шумпотӥсько. Валасько, улонэ юнме ортчымтэ шуыса. Ӵыжы-выжыосмы юнме кырӟамтэзы:

Пиала чарка ныгылес —

Тыгыляз, кошкиз — шӧдӥд-а?

Пинал даур — сяська даур — 

Ортчиз, кошкиз — шӧдӥд-а?

Озьы. Улон кошке, ортче. Шӧдыса вуыны но уг луы. Пинал дыръя вылэм улон… Егит дыръя мон нокытысь, номарлэсь ӧй кыльы. Кытчы ке мынэмед потэ вылэм — мынӥськод, мае ке лэсьтэмед потэ — лэсьтӥськод, нош табере… Нылпиосмы, внукъёсмы — асьмелэн та улонэ кельтэм пытьыосмы. Табере соослы шумпотыса улӥськомы, — йылпумъя Ольга Петровна.

Каньыл, серекъяса вераськись, куно карыны быгатӥсь луэмез сяна, Ольга Петровна бадӟым сюлэмо адями но вылэм. Бускеляз огназ улӥсь песяез, Зинаида Перемечеваез, со уте вылэм. Зина апай доры но куное пырыса потӥ, угось огназ улӥсь песянай куноослы котьку шумпотэ…

Вераськонмы куспетӥ Ольга апай сярысь юаме бере, Зина апай синкылизэ ватыны ӧз быгаты ни.

— Бускеле мынам туж йӧно. Азьло но со монэ утиз, али но со монэ учке. Инмар солы тазалык но шудбур мед сётоз. Кулон но вань, улон но вань… Инмарен но бускельёсын ӵош улэмелы туж шумпотӥсько, — шуиз со.