Паймымон нылкышноослэн улон сюресъёссы

«Котькуд адями — Инмарлэн нылпиез», — шуо калыкын. Со вордӥське, аслэсьтыз улон сюрессэ радъя, дыраз шумпотэ, куддыръя курыт синвузэ но кисьтоно луэ. Со ваньмыз улон, вамышъяса ортчем сюрес. Но вӧзаз котьку кыӵе ке кужым сылэ, кудӥз юрттэ вань секытъёсты ортчыны. 

Озьы ик Прасковья Борисовна но — тылысь ужась — улонзэ Инмарен валче ортчытэ. Нош кӧня вал та кузь сюрес вылын пӧртэм адӟонъёс... Вераса быдтонтэм но син азе пуктыны луонтэм.

Прасковья Борисовналэн улон сюресэз 1930-тӥ арын Кургем гуртысен кутске. Кышкыт но шимес XX даур. Та вакыт сярысь вераськон потэ ке, одно ик котькудӥз Быдӟым Атыкай ож дыръёсты тодаз вае, дыр. Бен, туала 90, 95, 100 аресъем юбилейзэс пумитась арлыдоос со кышкыт но сютэм аръёсты али ке но син азязы возё. Верантэм секыт та аръёс, эшшо но секыт вал соосты ортчыны пиналъёслы.

Но историез выльысь уд гожты, улонэз выльысь уд улы... Кургем гуртысь Борис но Фёкла Тургеневъёслэн семьяязы 8 кузя нылпиос вордӥсько. Нырысетӥ нылзылы соос туж чебер но аспӧртэмлыко ним сётӥзы — Прасковья. Ӟеч мылкыдо, небыт сюлэмо нылаш пичиысен ик анай-атаезлы юрттӥсь луыса будӥз. Котькуд гуртысь нылпи кадь ик, юртъер котырысь ужъёсын выриз, луэмезъя дышетскиз. Но дышетскыны 7 классозь гинэ шуд усиз. Быдӟым Атыкай ож кутскемен, солы бадӟым адямилэсь ныпъетсэ ас пельпум вылаз басьтоно луэ. Пичиысен ик нылмурт секыт ужез валаса будӥз. Нырысь сое Лаише нюлэс кораны лэзизы, собере пӧртэм ужъёсты но быдэсъяно луиз. Оглом вераса, тэк пукыны дырез ӧй вал егит нылмуртлэн.
1975-тӥ арын со Ярак-Чурма гуртысь Пётр нимо пилы бызе. Нырысетӥ кышноезлэсь кузпалэзлэн вить нылпиез луэ ини. Соосты Прасковья Борисовна, матын карыса, аслэсьтыз нылпиоссэ кадь будэтэ. Жаляса верано, аслаз нылпиосыз уг вордско, озьы ке но, сое гажаса но яратыса утё картэзлэн нылпиосыз но соослэн нылпиоссы. 

— Секыт улонмы вал. Бабаймы анай интые нюлэс кораны но лэзе вал, малы ке шуоно анайлэн тазалыкез лябӟемын вал ини. Покчи дырысен ик ужез валаса будэм нылпиос ини ми. Инмарлы тау, туннэ нуналозь вуттӥз, утисьёсы но вань. Аслэсьтыз матысь адямизэ кадь утё али, уг кушто, — шуэ юбиляр-песянай.

Зэмзэ но, туннэ нуналлы Прасковья Борисовна улэ картэзлэн самой покчи пиезлэн семьяяз. Со аслэсьтыз улонзэ ӟечен лыдъя: небыт валес но чылкыт, сое сюдо но вордо, вань куронъёссэ быдэсто. 

90 аресъем юбилееныз ӟечкыласа, доразы ёрос кивалтэтысь куноос но вуизы. Сьӧразы соос синпель кузьымъёс, сяме пыремъя, сяська керттэт но тӧдьы шаль кышет, таукарон гожтэтъёс вайиллям. Юбиляр песянай ваньзылы тау кариз, ортчем секыт аръёссэ кӧнялы ке вунэтыса, туннэ улонзэ каньылэн лыдъя. Сое вордыса улӥсьёслы бадӟым гажанзэ вера.