Пумиськон инты — Ципья

«Гырон быдтон» праздник 10.00 часэн кутскоз.

Котькин та нуналэ чылкыт омырын дасям ческыт ӝукен кунояськыны, усточиослэн киужъёсынызы тодматскыны но пӧртэм калык шудонъёсы, тунсыко вожвылъяськонъёсы пыриськыны быгатоз. 

Шудонъёс, котьку сямен, нимаз нылпиос но бадӟымъёс понна ортчозы. Пиналъёс, синъёссэс думылыса, качыен арбери вандылозы, пуйыен но гынсапеген бызьылозы, курегпуз питыръялозы, горшок пыргытозы, визналозы но атас кутозы. Бадӟымъёс пӧлысь мылкыд карисьёс озьы ик горшок пыргытонын, куасэн но штаниен (одӥг штаниез кӧня ке мурт дӥсяса) бызьылонын, гынсапег куянын вожвылъяськозы. Озьы ик пуклёез гозыен кыскаса, бодыен но канатэн кыстаськыса, юэн тырмытэм пуйыосты нуллыса кужымзэс эскерозы, чорыгаса, атас но парсьпи кутыса мылкыдзэс ӝутозы. Со сяна, спортъя вожвылъяськонъёс но луозы: ки кужымез мертан но волейбол. Та но мукет шудонъёс-вожвылъяськонъёс «Гырон быдтон» праздникез шулдыр но тунсыко карыны юрттозы. 

Арган гуръёс сяна, калыклэсь мылкыдзэ та нуналэ шулдыртозы Удмурт Элькунысь кырӟанъя но эктонъя «Италмас» академичекой кун ансамбль но асьме ёросысь самодеятельной коллективъёс. Озьыен, празднике люкаськемъёс та нуналэ сюлмысьтызы кырӟаны-эктыны, кӧттырымон ог-огенызы вераськыны быгатозы.

Калык шулдыръяськон котькинлы мылысь-кыдысь шутэтскон, ар ӵожелы тырмымон шулдыр мылкыд но шуныт тодэ ваёнъёс мед кузьмалоз!

Нялтас вераса, туэ Балтась ёросын «Гырон быдтон» праздникез ортчытон оскемын Покчи Лӧзя но Шубан гурт поселение пырись гуртъёслы, гурт возёсъёслы.