Семык ортчиз, нош мылкыдъёс кылизы (2 люкет)

Трос аръёс ӵоже лулчеберет удысын дано ужасез, Вуж Кушкет гурт клубен кивалтӥсез Светлана Щербакова но аслэсьтыз мылкыдъёссэ вераны палэнэ ӧз кыльы. Солэн та удысын ужамез 40 ар пала матынъяське ини. Калыкен матысь кусыпъёсын ужамез но вылӥ данъетъёсын пусйиськемын.

— 2015 арын нырысетӥзэ «Гуртлэсь нуналзэ» ортчытӥм. Татын нырысьсэ луыса концертной программаен, гуртысь азьмынӥсьёсты, вордскем нылпиосты, кузпалъёсты данъямы. Одӥг паласен, та туж бадӟым ужрад луиз милям пичи гуртмылы. Но мукет паласен, ог-огенызы вераськыны, шулдыръяськыны лыктэмъёслы дыр кема уг кыльы вал. 2017 арын кыкетӥзэ ортчытӥм, татын ини унозэ шудонъёслы саклык висъяны тыршимы, Геннадий Кузнецов шулдыртӥз соку калыкез. Собере пӧртэм мугъёсын та праздникез ортчыны луонлык ӧй вал ини. Туэ юбилей выллем, дас ар ортчыса, нош ик гурт калыкез огазеяны малпамы. Зэмзэ вераса, нырысь мылкыд ӧй вал, туж сюлмаськытӥсь уж та. Дышетӥсьёс — Светлана Михайловна но Светлана Ивановна — туж юн сылӥзы ини. «Адямиос туж куро ук», — шуизы. Озьы тӥни каллен дасяськыны кутским. Инмарлы тау, кинлы мар оскемын, кинлы мар быдэстыны косэмын — ваньзэ лэсьтӥзы. Ӝӧк котырын Елена но Иван Филипповъёс, Алевтина Петрова, Людмила Раимова, Антонина Самсонова, Генриетта Павлова, Олег Исаев, Виталий Клеймёнов, школаысь дышетӥсьёс Светлана Карабаева но Светлана Щербакова, выризы. Калыкез сюдон-вордон но капчи уж ӧвӧл. Ӝӧк но узыр пӧрмиз, гуртысь калык ик ачиз тырмытӥз сое. Шудонъёсты шудытӥзы Алина Филипова, Тамара Фомина, Вероника Никитина, Наталья Исаева, Людмила Исаева, Татьяна Исаева, Елена Евдокимова, Сергей Щербаков, Светлана Карабаева, Светлана Щербакова. Озьы ик пӧртэм тӥрлыкъёсын юрттӥзы Людмила но Пётр Ильмурзинъёс. Соос асьсэос ик кузьымъёсты но, шудытон интыосты но радъязы. Нина но Николай Исаевъёслэн семьязы куноослы курег но парсь сӥльлэсь шашлык вузазы. Зэмзэ ке верано, татын вань гуртоослэсь нимъёссэс гожтыны луэ, котькудӥз аслэсьтыз люкетсэ пыртӥз. Ваньзылы, кин пыриськиз, радъясьёслы, гурт калыклы, вань юрттӥсьёслы, пӧрасьёслы, спонсоръёслы бадӟым тау шуисько. Кужымды ноку медаз быры, азьланяз но таӵе ужрадъёсты ортчытыны таза мед луоды", — люкиськиз малпанъёсыныз гуртысь клублэн заведующиез Светлана Щербакова.

Зэмзэ но, ужрад калыклы туж кельшиз шуыны луэ. Пӧртэм малпанъёсын, ужъёсын сюлмаськись адямиос та ӝытэ кӧня ке шумпотыса, сюлэмзэс усьтыны быгатӥзы. Арлы одӥг пол гинэ люкаськон, вордскем палъёсад бертон — со кема нуналъёслы но аръёслы тодэ кылись вакыт. Оскиськом, таяз аре но кушкетъёслэн шуныт мылкыдъёсын пачылмем ӝытсы азьпалан сюлэмзэс шунтоз, вордскем музъемазы бертон мылкыдзэс юнматоз.