Семык шулдыръяськонъёс уг вуно

Нош асьмеос, православие осконэн улӥсьёс, тужгес сӥлы карыса, Семык праздникмес пусйимы: кулэм ӵыжы-выжыосмес буре вайимы, матысьёсынымы пумиськимы. Озьы ик ёросысьтымы куд-ог удмурт гуртъёсын чебер сямлы пӧрмиз ни Семык ӝытэ быдэс гуртэн люкаськыса шулдыръяськон. Туэ сыӵе шулдыръяськонъёс Вуж Кушкет, Карек-Серма но Покчи Лӧзя гуртъёсын ортчизы шуыса тодӥськом. 

— «Борнак» обществомылэн юрттэменыз кык ужрад ортчытыны быгатӥмы. Нырысетӥез — пиналъёс понна тунсыко шудонъёсын, вожвылъяськонъёсын Нылпиосты утён нуналлы сӥзем нимысьтыз ужрад. Кыкетӥез — Семык шулдыръяськон. Отчыяз бадӟымъёс пыриськизы. Сӥлен ӝук, ческыт турынэн чай пӧзьтӥмы, сиён-юонъёсын узыр ӝӧк дасямы. Собере мылысь-кыдысь шудӥмы: горшок пыргытӥмы, котырскыса, чорыгаса шудӥмы. Нош кыӵе удмурт шулдыръяськон юмшантэк! Мызган гуръёс улсын сюлмысь но кӧттырымон юмшамы. Огъя вераса, шулдыр вал, вань гурт калык, бертэм куноос потӥзы, мылысь-кыдысь шутэтскимы. Туж бадӟым тау ваньмызлы, кин ужрадэз радъянэ но ортчытонэ пыриськиз, — ивортӥзы калык шулдыръяськонэз ортчытӥсьёс — Карек-Серма гуртысь клублэн но библиотекалэн кивалтӥсьёссы Зоя Никитина но Наталья Шестакова.

Зэм но, трос-а кулэ мылкыдэз шулдыртон понна?! Ваньмыз асьме бордысь потэ уга. Калык шулдыръяськыку палэнын мӧзмыса сылӥд ке, мазэ веранэз, мылкыд уз ӝутскы. Нош одӥг ке но шудонэ, яке юмшан пӧлы пырид ке, кӧня шумпотон басьтӥськод, мылкыд пуроме. Тае Лӧзя палъёсысь калык но ӟеч тодэ. Угось Покчи Лӧзя лулчеберетъя юртын ужасьёс, нимаз ик устолыкъя кивалтӥсь Галина Петрова, ялан тунсыко ужрадъёс ортчытъяло: сяме пыремъёссэ азинто, пумен выльёссэ пыӵато. Та палась калыклэн одӥгез тужгес яратоно шулдыръяськонэз — со арысь аре ортчытӥськись «Берёзка» праздник. Та калык йылол но вашкала Семык праздникен герӟаськемын. Азьло дырысен та празднике черкез но, юртъёсты но кызьпу вайёсын чебермаллям. Озьы ик Кызьпу бадӟым инты басьтэ славян, скандинав, финн-угор но мукет калыкъёслэн лулчеберетазы но. 

Та шулдыр ужрад котыр улосысь трос куноосты люка, арысь аре паськыт масштабен ортче. Выжыез но солэн мур, туж кема аръёс ӵоже ортчыто ини сое Покчи Лӧзяын. Шумпотымон, адямиос, праздникез яратыса, гажаса, лыкто, мыло-кыдо шудонъёсы, юмшанъёсы пырисько шуыса.
Татын но, мукет шулдыръяськонъёсын сямен ик, котькуд лыктэм мурт: бадӟымез но, пичиез но — табанен но чаен кунояськыны, пӧртэм шудонъёсы пыриськыны быгатэ. Огъя вераса, котькуд аре шулдыръяськон но зэмос праздниклы пӧрме.