Транспорт одӥг палтӥ ветлоз

Озьыен, Нурма паласен лыктӥсь машинаос со нуналысен «Альпари» магазин дорысь тыкырыке берытсконо но Нариман урамтӥ ортчоно луозы. Школьная ураме вуэм бере, бур пала но, паллянэ но пырыны яра. Нариман урамтӥ мукет пала ветлон алӥське. Тӥни озьы, «Сбербанк» тыкырыкозь, яке Чехов урамозь, мыноно, посёлоклэн центраз со тыкырыкысен тубоно но центр кузя (сюресэд со пала ке) одӥг палтӥ ветлон сюресъя кошконо. Котьма ке но сюресвыл пусъёслы сак луыса ветлыны кулэ, ГИБДД-ысь ужасьёс ласянь эскеронъёс кужмо луозы.

Мынон-ветлон одӥг палтӥ гинэ радъямын луоз шуэм бере, тросэз маршрут автобуслэн ветлэмез, дугдон лэсьтон интыос пумысен сюлэмшугъяськыны кутскиз. Автобусэз центральной урамтӥ ветлымон карыса кельтыны уг луы-а, шуыса вазиськисьёс но вань. Та ужпум, пассажиръёслэсь сюлмаськемзэс лыдэ басьтыса, районлэн главаезлэн пыриськеменыз ортчытэм кенешонын эскериськиз. Ваньзэ пыр-поч эскерем бере, автобус центртӥ уз ветлы шуэм йылпумъян лэсьтӥськиз, малы ке шуоно та понна центральной сюресын автобуслы чаклам нимысьтыз полоса луыны кулэ, но, пасьталаез автобус тэрымон луымтэен, сюресмы та куронъёслы уг тупа. Соин ик, автобус Нариман урамтӥ ветлоз, дугдоз «Шатлык» магазин доры. Отын, калыклы умой каньыллыкъёс кылдытон вылысь, дугдон павильон пуктыны чаклаське.