Тунсыко путешествие

Соос пӧлын «Промышленный туризм» номинациын вормем Покчи Лӧзя школаысь Кристина Балтасева, Алина Калинина но Антон Мухин но луизы. Путешествие ветлэм нылпиослэсь мылкыдъёссэс тодыны тӥледлы но ӵектӥськом.

«Золотое кольцо России» шуэм маршрут — со совето дыръёсы кунгож сьӧрысь адямиосты Россиен тунсыкъяськытон понна кылдытэм маршрутэ пыртэм кӧня ке городъёс. Соос адямиосты Россилэн историеныз но культураеныз тодмато. Путешествие ортчытыны арлэн котькуд дыраз луэ, отчы тямыс валтӥсь городъёс пыро.

Тани туэ, «Путешествие к истокам» конкурсын вормыса, милемлы шуд усиз ньыль сӥзьыл нуналэз Золотой кольцолэн городъёстӥз путешествиын ортчытыны (Москва — Суздаль — Боголюбово — Владимир — Москва).

Экскурсионной автобусэн «Золотое кольцо» маршрут кузя кошкыса, ми паймымон дуннее вуимы, дыр ласянь но пичильтык путешествие лэсьтӥмы, кадь, Россилэсь вашкала городъёссэ адӟимы.

Вань ньыль нуналаз ик куазь шуныт но шундыё тупаз. Котырысь улослэн чеберез дунне шоры ик мукет синмын учкыны юрттӥз, выль мылкыдъёс кузьмаз. Милемыз тодматӥзы Владимирско-Суздальской княжестволэн историеныз, ӟуч князьёслэн улонэнызы. Ас синмынымы адӟимы туж уно паймымон чебер XI-XII дауръёсы лэсьтэм архитектурной синпелетъёсты, соос пӧлын Успенской собор, Золотые ворота, Церковь Покрова на Нерли. Ми вуылӥмы уно музейёсы, кудъёсаз Атаймузъеммылэн культураез милемлы матынгес луиз.

Берпум нуналэ бадӟым шаермылэн шоркараз — Москвае мынӥмы. Со выль ужъёслы мылкыд вырӟытӥсь город, кудаз ялан пӧзе улон. Ми адӟимы уно тунсыко интыосты, быдэс нуналэз ортчытӥмы Москваез учкыса, шумпотэммылэн пумыз ӧй вал.

Ньыль нунал шӧдытэк ик ортчиз, милям воксё уг поты вал кошкеммы. Ветлэммы милемлы уно пайда но шумпотон вайиз, выль тодмоосмы луизы, опыт но выль тодон-валанъёс басьтӥмы. Доре ми сьӧрамы умой но вунонтэм мылкыдъёс вайимы.

Калинина Алина,
Балтасева Кристина,
Мухин Антон,
Покчи Лӧзя школаын дышетскисьёс