Турьяысь адӟем карымон песянайёс

Арлыдоослэн сюлмаськонъёссылы, шуг-секытъёссылы, пичи дырысьтызы тодэ ваёнъёссылы саклык висъяса но валтӥсез — лыдӟисьёсты соослэн улон-вылонэнызы тодматон вылысь газетамы арлыдоос сярысь статьяослэсь циклзэ поттыны кутскиськеммы вал. Шумпотымон, лыдӟисьёслы та малпан кельшиз. Асьсэос но арлыдоос та ужез кулэен лыдъязы. Соин газет лыдӟисьёсты ёросысьтымы мӧйыосын тодматонмес азьланьтӥськом. Таяз учыре вераськон мыноз Турья гуртысь кык адӟем карымон песянайёс — Аксакова Дарья Яковлевна но Аксакова Мария Алексеевна — сярысь.

Турья гурт пичи бере, вань юртъёссы ураме пыремен валче син азьын. Аксаковъёслэн юртсы но юртъер котыръёссы гуртысь самой бадӟымъёсыз но чеберъёсыз пӧлысь шуыны кулэ. Кузёоссы но юртсылы тупасесь — пальпотыса вераськисесь, куно карыны быгатӥсесь. Нырысь матысенгес тодматски Дарья апаен. Аксакова (Зайцева) Дарья Яковлевна вордскемын 1939-тӥ арын Турья гуртын. Нялтас вераса, Дарья апай — ужысь ветеран, «Знак почёта» орденэн но со пусъемын.

— Татын вордски, татын улӥ но улӥсько. Вань улонэ та гуртын ортче, вордскем дырысеным кутскыса. Мынам Люба апае вань вал. Анаймы милемыз, кык нылъёссэ, огназ вордӥз-будэтӥз. Атаймы жугиськонын пленэ шедем. Собере сое ыстӥллям Кемеровое шахтае ужаны. Со отын ужаз но улӥз. Та пала ӧз ни берты. Анаймес дораз ӧтем вал, уксё но лэзиз, но анай кошкыны соглаш ӧз луы. Но 25 ар ортчем бере (сомында арлы сое шахтае ужаны лэзиллям вал), кӧня ке пол куное бертылэмез вань ми доры. Али кадь тодӥсько нырысетӥ пумиськонмес: мон ини вуэм ныл, фермаын ужан дыръёсы, парсьёсты сюдӥсько вал. «Ой, Даки, Даки», — жаляса лыктӥз мон доры атай. Мукет семья кылдытыса улӥз со, нылыз вань вал, пиез. Но атайлы вожме ӧй потты, — атаез сярысь тодэ ваёнъёссэ вераз Дарья апай.

Анаез солэн гумыраз колхозын ужам, валъёсты сюдэм.

— Адями вырӟытозь, анай пудо сиён но ваем, ӵукна изьытэк. Сыӵе веранъёсыз вань вал. Ма, зэмзэ верано ке, анай троссэ ватэм, дыр. Кӧня шуг-секытъёсты чидамзэ ачиз гинэ тодэм, дыр, со… Ож дыръя тужгес но секыт йӧтэм. Пичи вал бере, ачим жугиськон дырез вераны уг быгатӥськы, нош тани ож бырем бере луэм шуг-секытъёсты тодӥсько. Вазь ӵукнаысен бер ӝытозь бусыын ужамы. Нылпиослы но нылкышноослы, пересь муртъёслы но висёнэнызы сэрен оже пыриськыны быгатымтэ воргоронъёслы вань шуг-секыт йӧтӥз.

Ужан сяна, школаын но дышетсконо вал. Покчи классъёсын гуртын дышетски, собере Кушкетэ ветлӥ ини. Озьы сизьым класс быдтӥ. Мукет нокытын ӧй дышетскы, колхозэ ужаны пыри. Дышетскыны мыныны ӧй но малпа, соку кин гинэ дышетскиз ини… Кытысь уксё басьтод? Сиыны нянез но ӧй вал али, картофкаез но. Жугиськон бере туж секыт вал али трос аръёс ӵоже. Гуртысь колхозын тыршимы, нырысь со Чапаев нимо колхоз шуыса нимаськиз, собере «Шошма» луиз, табере ини — «Борнак». Отын мон парсь фермаын ужай.  Парсьёсты сюдӥ, соосты пиятӥ. Ферма бадӟым вал. Соин уж трос луиз. Кема аръёс ӵоже парсьёсты сюдэм бере фермачиослы сиён пӧзьтӥ, столовойын ужай, — веранзэ азьланьтэ Дарья Яковлевна.

Секыт жугиськон но жугиськон бере аръёсыз сыӵе адӟонъёсын но шуг-секытъёсын, секыт ужын ортчо. Огдыре чебер, тыршись, ужлэсь кышкасьтэм нылэз гуртысьтызы Геннадий нимо егит воргорон синйылтэ. Егитъёс, семья кылдытыса, валче улыны кутско. Огзы сьӧры мукетыз куинь нылпиоссы вордско. Кема аръёс ӵоже юн кусыпъёсты возьыса эшлыко но ужась семьяын улыны быгатонлэн валтӥсь мугез ог-огдэ валаса, гажаса но ог-огедлы юрттыса улэм бордын луэ, дыр.        

Кузпалзэ, Аксаков Геннадий Алексеевичез, Дарья апай вордскем гуртысьтыз ик шедьтэ. Со Карек-Сермаын бригадир луыса ужам, берлогес фермаен но кивалтэм.

— Одӥг гуртын улӥмы бере, огмес-огмы тодӥмы. Жаляса верано, картэ кемалась кулӥз ини, 2007-тӥ арын. Куспамы йӧно улӥмы. Куинь нылпиосмы вордскизы. Самой бадӟымез — Олег. Со аслаз семьяеныз Малмыжын улэ. Кыкетӥез Алёша пие. Солэн кышноеныз Ленаен но нылпиосынызы ӵош та юртын улӥськомы. Куинетӥез нылмы, Юля, Лельвижын, со но аслаз семьяеныз улэ.

Туннэ нуналэ куать внукъёсыз, одӥг правнукез но вань ини Дарья апайлэн. Али августын гинэ вордскем. Шудо песянай та сярысь шумпотыса вера:

— Бертыса кошкизы ини, адӟимы, туж шумпотӥсько. Яра али кыдёкын уг уло, куное бертылыса улыны быгато. Али Юляос но кемалась ӧвӧл гинэ бертӥзы. Пересь адями понна нылпиосызлэн, внукъёсызлэн яратэмзы, соослэн саклык висъямзы, куное бертыса улэмзы — самой валтӥсез.

Нылпиосыз сярысь гинэ ӧвӧл, кензэ но ушъяса вераз Дарья Яковлевна. Елена Анатольевналэн тыршеменыз юртсы чылкыт но шулдыр вылэм. Ачиз но Дарья апай тэк уг улы. Быгатэмезъя юртаз пӧртэм ужъёсты быдэсъя, сиён пӧзьтэ. Пудоосты яратэ вылэм. Соослы ачиз картофка пӧзьтэ, сюдэ.

— Йӧно кенэ мынам. Соин мыным удалтӥз шуыны луэ. Лена ваньмыз ласянь юрттэ, пие но йӧно. Хозяйствоез но умой нуо, милемыз но утё, — шуэ Дарья апай.

«Милемыз» шуыкуз, Дарья апай, ассэ сяна, Мария апаез но вера. Мария апай — Дарья апайлэн кузпалэзлэн апаез луэ. Со но Аксаковъёслэн семьяязы улэ. Жаляса верано, тазалыкез ляб луэмысь, Мария апай туннэ нуналэ валес вылын кылле ини. Но со шоры учкытэк, монэным тодматскыса вераськыны со пумит ӧз луы.

— Тани таӵе улӥсько ини мон, — шуэ Мария апай. — Ветлэме уг луы, лумбыт кыллисько, яра али утисьёсы вань. Лена но, Дарья но юртто, тау соослы, — шуэ песянай.

Мария Алексеевна но Турья гуртын вордскем, 1936-тӥ арын. Школаын сизьым ар ӵоже тодон-валан басьтэм. Турьяын но, Кушкетын но дышетскыны вутскем.

Жугиськон кутскыку, Мария апайлы вить арес луэ. Атаез оже кошкыса бырем.

— Атайме тодӥсько на. Оже кошкыкуз, мыным куать арес вал. 1942-тӥ арын кошкиз со, ӧз ни берытскы… Мынам вынъёсы вань вал — Геня но Миша. Миша самой покчиез вал, атай оже кошкыку, солы ваньзэ-ӧвӧлзэ одӥг арня гинэ луиз… Мон, пичи ныл, бызьылыса, тэтчаса али вордскем вынылы ним малпаса ветлӥ, Коля ним поныны турттӥсько вал. Нош оже кошкыны дасяськись атай Миша ним понӥз вынылы. Но Миша чебер ним.., — тодэ ваёнъёссэ шара вера Мария апай.

Анайзы, колхозын ужась кышномурт, огназ нылпиоссэ будэтыны кылем. Аслыз но Мария апайлы туж секыт йӧтэм, вазь ик быдэ вуыны тупам. Школазэ йылпумъямен валче гуртысьтыз клубе заведующий луыса ужаны интыяськем. Куинь ар ӵоже отын тыршем бераз, со но Турьяысь парсь фермае интыяське. Парсьёсты но куинь-ньыль ар ӵоже сюдэ. Собере ини колхозын ик пӧртэм ужъёсты быдэсъясь луыса тырше.

— Кытчы косо, мае ужаны сёто — ваньзэ быдэсъясько вал. Ужамтэ уж ӧз кыльы. Капчи ӧй вал… Кусоен турнаськом, саньыкен тыриськом, трактор сьӧры мынӥськом вал… Пичиысен ужаса будӥмы, вормыса но вормытэк саньыкен пӧртэм ужъёсты ужамы, кыскыса-кыскыса сое ветлӥмы. Кӧжы турнамы. Бадӟымгес будэммы бере, ож бере кӧня ке дыр ортчыса, гуртын пудо потыны кутскизы, кутьы возьманы но оскизы милемлы. Пӧсяса, ымныр кузя ву вия вал но ужамысь ӧм дугдэ. Тыршимы. Курадӟимы. Секыт вал улонмы. Ваньзэ вераса быдтыны но уг луы.., — шуэ Мария Алексеевна.

Озьыен, Мария Алексеевналэн вань улонэз, пичи дырысеныз кутскыса пересьмытозяз но, ужаса ортчем. Пенсие Мария апай 1991-тӥ арын потэм. Аслэсьтыз семьязэ кылдытымтэ бере, туннэ нуналэ со Геннадий вынызлэн пиеныз но солэн семьяеныз улэ. Сое татын туж умой учко, ваньмыз ласянь песянайлы юртто.

Кыкназы ик песянайёс Вуж Турья гуртын вордскыса будӥллям, вань улонзэс та гуртлы сӥзьыса улӥллям, соин гуртсылэн зэмос патриотъёсыз луо шуыса гожтӥд ке но, янгыш уз луы, дыр. Секыт улон адӟизы ке но, ӝожтӥськыны соослэн мугзы ӧвӧл: туннэ нуналэ гуртазы соос гажамон семьяослэн одӥгез, бадӟым, чебер, шуныт юртын пересьмон даурзэс пумитало.