Ольга Степанова: «Удмурт кыл одно ик выльдӥськыны кулэ, сотэк солэн вуоноез уз луы»

Туэ вить ар тырме Удмурт кыллэсь дунневыл нуналзэ пусйыны кутскеммы дырысен. Ӵапак 2018-тӥ арын 27-тӥ шуркынмонэ нырысьсэ Удмурт кыллэсь нуналзэ пусйимы вал. Нош 2020-тӥ арын со «Удмурт Элькунысь праздник нуналъёс но тодэ ваён дыръёс сярысь» катэн юнматӥськиз.

Кылъёслэн быремзы сярысь трос вераськонъёс нуисько, нош анай кылъёсты утён одӥгез лэчыт сылӥсь ужпум луэ туннэ нуналлы. Мазэ веранэз, удмурт кылмы но та ласянь шумпотымон югдурын ӧвӧл — егит поколение анай кылын вераськемысь дугдэ. 

Нылпиослэн но егитъёслэн анай кылын вераськемзы мед потоз шуыса, кыл туала улонлы тупатскыны кулэ. Озьыен, кыллы выль шокчон сётоно. Нош валтӥсь юрттӥсьёс та ужын — туала технологиос, интернет но, мазэ веранэз, мыло-кыдо егитъёс, кудъёсыз удмуртлыкез утён сярысь сюлмасько, удмурт огазеяськонъёсты кылдыто, пӧртэм тунсыко проектъёсты улонэ пыӵато. Удмурт кылэз но лулчеберетэз, огъя вераса, удмуртлыкез интернетлэн паськыт дуннеяз вӧлмытон бордын тужгес мыло-кыдо тыршо Удмуртиысь «Куара» мерлыко огазеяськонысь егитъёс. 

Кин уг тоды: «Куара» огин — со удмурт егитъёслэн интернет вотэсын медиаконтент (удмурт кылын видеоос, лекциос, клипъёс, конференциос но пӧртэм мукет ужрадъёс) кылдытонъя-радъянъя мерлыко огазеяськонзы.

Удмурт егитъёслэн огинзы, проектъёссы но трос мукетыз сярысь вераськимы «Куара» огинлэн проектъёсъя менеджереныз Ольга Степановаен. 

Ольга Степанова — удмурт азьветлӥсь, проектъёсты гожъясь, филолог, «Шунды» огазяськонлэн азьвыл кивалтӥсез, «Куара» огинлэн проектъёсъя валтӥсь менеджерез но егит анай. 

— Ӟечбуресь, Ольга. Тау тӥледлы, милемын вераськыны дыр шедьтӥды шуыса. Кызьы тодӥсько, туэ «Куара» огин аслэсьтыз нырысетӥ юбилейзэ пусъе — 5 ар тырмонзэ. Нош кызьы ваньмыз кутскиз? Кытысен сыӵе малпан кылдӥз? 

— Ӟечбур! Зэм но, туэ милям «Куара» огинмылы — вить ар, нырысетӥ сыӵе пичи юбилеймы. 
Кутскиз ваньмыз вить ар талэсь азьло. Ми, со вакытэ ини ужась быдэ вуэм егитъёс, люкаськимы но милям потӥз мар ке но кареммы удмуртлык понна, кыӵе ке но мерлыко ужен выреммы. Соку ми ваньмы ас удысамы ӧнерчиос вал ини. Кин ке но программированиен выриз, кин ке но дышетӥсь, кин ке но литература удысын ужась, кин ке но видео удысын ужась, кин ке но ӵектосъёсын вырись. Ӵапак со мылкыд — мар ке но карыны удмуртлык понна — милемыз огазеяз но, валтӥсь карыса, ми сыӵе тема басьтӥмы — интернетын контент вӧлмытонэн ужан, адямиосты дышетон, озьы ик удмурт кылын видеос но кылдытон. Тӥни со ужез ми али но тыршиськом нуыны.

— «Тубат», «Айшон», «Удмурт блогеръёслэн школазы» ӵектосъёс, «Аныкай» медиастудия, удмурт видеошкола «Тамга», «Куара вера» ним улсын удмурт темаослы сӥзем вакчи лекциос, клипъёсты лэсьтонъя «Пус» лаборатория — вить ар ӵоже тыршемдылэн удалтэм емышъёсыз. Тужгес пайдаё но азинлыко ӵектосъёсты но соосты улонэ пыӵатон бордын тыршись командады сярысь пыр-почгес вералэ вал. 

— Туннэ нуналлы милям 15-лэсь ятыр проектъёсмы улонэ пыӵатэмын ини. Ужаны кутскеммы бере ик милемлы туж бадӟым юрттэт сётӥз Удмурт Элькунысь Йӧскалык политикая министерство. Со ӵектосъёсмес пыӵатыны юрттӥз, милемлы оскиз. Со понна бадӟым тау вераммы потэ. Соку министр Лариса Николаевна Буранова вал али. Солэн дурбасьтэменыз ик милям проектъёсмы улонэ пыӵаны кутскизы. Собере ини асьмеос бадӟым федерал грантъёсын ужаны дышетскимы. Туннэ нуналлы ми 6 миллионлэсь ятыр 8 федерал грант басьтӥмы ини, со чотын озьы ик пӧртэм удмуртлыкен герӟаськем проектъёсты лэсьтӥськомы. 

Котькуд ӵектосъёсын милям ужало нимаз командаос. Тросгес со «Куара» огинысь ӧнерчиосмы, конечно, но проектэз рос-прос лэсьтон понна палэнысь но кин ке кулэ на ке, ми со ӧнерчиосты но одно ик ӧтиськомы. Шуом, тани тужгес тунсыко али берло кылдытэм проектмы — со «Пус» лаборатория, кытын ми егитъёсты клип кылдытон бордын ужаны дышетӥськомы. Ужаськомы отын туж тунсыко но рос-прос мыло-кыдо командаен. Анастасия Шумилова — со «Кенеш» журналлэн редакторез, озьы ик милям «Куара» огинмылэн мыло-кыдо ёзчиез. Настя кыл кутэ сценаристъёсын ужан понна. Петя Иванов — со озьы ик милям ёзчимы, ужезъя — оператор. Со операторъёсын ужа. Озьы ик Влад Степанов (Ольга Степановалэн кузпалэз — О. П.) — клипмейкер, режиссёр, «Куара» огинлэн кивалтӥсез. Со монтаж группаен ужа, озьы ик клипъёслэн режиссёрзы луэ. Мон ачим «Пус» лаборатория" проектлэн авторез но кивалтӥсез луисько. Тӥни сыӵе командаен та проект бордын ужаса, туэ ми 21 егитъёсыз дышетӥм но куинь выль клип поттӥм. Но котькуд проектын, ӧнерчиос сяна, милям котьку но туж трос волонтёръёсмы, кудъёсыз милемлы дырзэс жалятэк юрттӥсько, трос, кин юрттӥське кыӵе ке но арбериосын, уксёен но. Мазэ веранэз, котькуд проект — со бадӟым уж. Рос-прос но йӧно мед пӧрмоз шуыса со уж, со бордын трос адямиос ужаны кулэ.

Оглом «Куара» огинын милям 28 ёзчимы — трос ӧвӧл. Соин ик, тросгес проектъёс борды басьтӥськеммы потӥз ке но, куд-ог дыръя милям ресурсъёсмы уг тырмы, малы ке шуоно 28 адями — со, конечно, кужым, но вань ужез радъяны трос дыр кулэ, нош та ужмы милям валтӥсь ужмы ӧвӧл, со мерлыко уж. Соин ик ваньмон дыръямы гинэ ми быгатӥськомы та ужен вырыны. 

— Одӥгез тужгес тодмоез ужды — «Аныкай» медиастудия. Та ӵектосты вылэ нимысьтыз дугдэм потэ. Угось со покчи пиналъёсын, соослэн анай-атайёсынызы ужанэн герӟаськемын. Таин валче юан кылдэ: трос-а сыӵе семьяос, кудъёсыз мыло-кыдо пумиськонъёсы ветло? Кыӵе тенденция шӧдӥське? Вань-а пӧлазы суро семьяос?

— «Аныкай» ӵектосмы туэ ньылетӥзэ радъяське ини. Пӧртэм форматэн ми сое эскерылӥмы, пӧртэм сямен, ёросъёсын но ужамы. Но туэ милемлы юрттӥськиз Азьмуртлэн фондэз. 700 сюрс котыр уксё ми басьтӥмы та проектэз радъян понна. Туэ та проектамы 17 семья пыриське. Ми анай-атайёсты дышетӥськомы нылпи блогъёс кылдытыны, нош пиналъёслы со вакытэ, куке анай-атайёссы дышетско, дырзэс тунсыко ортчытон понна пӧртэм площадкаос радъяськомы. Соос киужен выро, удмурт эктонъёсын тодматско, актёр мастерствоен, огъя вераса, пӧртэм сямен соослэсь ваньмон дырзэс радъяськомы. Но валтӥсез — ваньмыз татын анай кылын. Милям юрттэммы потэ со семьяослы, кытын куспазы, нылпиосынызы верасько удмурт кылын. Соин та проектэ ми тыршиськомы кутыны удмурт кылын вераськись семьяосты, соосты ӧвӧл, кин дышетэ яке кинлэн дышетэмез потэ, нош чылкак удмуртъёссэ. Вань, конечно, суро семьяос но, кинлэн, шуом, картэз ӟуч яке бигер, но озьы ке но анайёссы тыршо нылпиосынызы вераськыны удмурт кылын. Ми туж шумпотӥськомы, соослэн емышъёссы но вань шуыса. Кылем арын «Аныкаямы» тросгес Ижкарысь вал ке семьяос, туэ трос ёросъёсысь пырисько, ветло котькуд занятие. Алнашысь но, Пичи Пургаысь но, Якшур-Бодьяысь но. Котькуд шутэтскон нуналэ соослэн мылкыдзы вань ветлыны. Со туж шумпоттэ. Озьыен, зэм ик но, проект тунсыко но соослы кулэ луэ. 

Та ӵектосмы милям асьме семьямес чакласа кылдӥз, шуыны луоз, дыр. Куке милям пимы вордскиз но ми картэным удмурт кылын соин вераськыны кутским. Туж ӧжыт вал инты, кытын, шуом, капка сьӧры потыса, пиналъёс асьсэ огъёзъёсынызы вераськысалзы удмурт кылын, кыӵе ке но садик сяна, яке семьяын сяна. Соку ик кылдӥз сыӵе малпан: кылдытыны сыӵе инты, кытын нылпиос быгатысалзы ас ёзъёсынызы удмурт кылыны вераськыны. Эшшо ми семьяенымы туж яратӥськомы пӧртэм путешествиосы ветлыны. Но, кузь сюрес ке, нылпи жаде, солэн потэ кыӵе ке но мультфильмъёс яке кыӵе ке но видеоблогъёс учкемез. Нош удмурт кылын со вакытэ трос ик ӧй вал сыӵе ужъёс, яке ӟечлыксыя умой ӧй вал соос. Соин потӥз кылдытэм нылпи блогъёс. Но огнамлы со секытгес луысал, малпамы вазиськыны анай-атайёслы, малы ке шуоно соос но тодо, мар соослэн нылпиоссылэн учкемзы потэ. Озьы кылдӥз проект, кытын анай-атайёс асьсэлэн нылпиоссылы асьсэ нылпиосынызы ӵош ик кылдытъяло видеоблогъёс, кудъёссэ бератаз быгато быдэс интернетын учкыны. 

— Билингвизм (кык кылын вераськон) сярысь но малпанъёстэс тодэм потэ. Кызьы тӥ малпаськоды, кулэ-а пиналэз пичиысен кык яке солэсь тросгес кылъёслы дышетыны?

— Кык кылын дышетон сярысь ке верано, мон котьку но серекъяса верасько, ми амбассадоръёс луиськомы шуыса. Малы ке шуоно мон котьку но валэктыны тыршисько анай-атайёслы но, интернет вотэсын но, пӧртэм интервьюосын но: кык кылын дышетыны, зэмзэ вераса, секыт ӧвӧл, вераськыны гинэ кулэ. Ми, кылсярысь, нылпиенымы нимысьтыз нокыӵе ужрадъёс ум ортчытъяське, со удмурт кылын мед вераськоз шуыса, куспамы но, соин но котьку удмурт кылын гинэ вераськиськомы. Мон, конечно, котьку но билингвизм понна дурбасьтӥсько (аспирантураын дышетсконме но ӵапак билингвизм темаен герӟаса азьланьтэме потэ). Со самой, мыным потэ, капчи сюрес, куке нылпи пичи дырысеныз кӧня ке кыл дышетэ, куд-ог дыръя сура ке но, мукет кылэ выже ке но, бератаз со интыяз одно ик пуксёз. 

— Тросэз анай-атайёс ӝожтӥсько, удмурт кылъя школьной учебникъёсын туж трос валантэм выль кылъёс, терминъёс шуыса. Мазэ ватонэз, милемлы но, газет поттон ужын тыршисьёслы, сыӵе пыкылонъёсты кылыны тупа, статьяосамы выль кылъёс пыртылэммы понна. Тӥ кызьы учкиськоды удмурт кыллэн выльдӥськемез шоры?

— Терминъёс сярысь верано ке, мынам диплом уже университетын ӵапак со выль терминъёслы сӥземын вал. Соин ик мон татын уг быгатӥськы кыӵе ке но палэнысь эксперт луыны, малы ке шуоно та юан шоры тодосчи сямен учкисько. Бен, тросэз дышетӥсьёс, тани мынам гуртам ик бускель кышномурт ӵем вера, али учебникъёс секытэсь шуыса. Зэмзэ вераса, мон туж кемалась туала учебникъёсты киям ӧй кутылы ни, дышетон ужен уг выриськы бере, туннэ нуналлы пие но уг дышетскы на школаын. Соин ик макем соос секыт, вераны уг быгатӥськы, но котьку но малпасько, удмурт кылэн тросгес мед тунсыкъяськозы шуыса. Одно ик кулэ сое капчиен, шудыса дышетыны, нылпиослы тунсыко мед луоз шуыса, кыӵе ке но выль технологиосты уже кутыса. Тӥни соку, мон малпасько, пиналъёслэн асьсэлэн но мылкыдзы луоз дышетыны, терминъёс но сокем ик уз люкетэ, дыр. Но валамон ни, али югдур секыт бере, дышетонэз но, оло, ӧжытак капчиятыны кулэ. Малпасько, нылпиослы пичи дыръязы ик кылэз секытэн сётыны кулэ ӧвӧл, дыр. Но озьы ке но, пумен со выль терминъёсты пыӵатыны умой луысал, малы ке шуоно удмурт кыл одно ик выльдӥськыны кулэ. Сотэк солэн вуоноез уз луы. Шуом, ӵошатсконъёс, шудонъёс пыр, газетын, радиоын пичиен кутыса, нырысь-валысь валэктонзэ уже кутыса, кызьы 30-тӥ аръёсы ужазы выль терминъёсты пыртон но кылдытон бордын. Мон малпасько, со умой практика туала арын но.

— Кызьы тӥ малпаськоды, вань-а удмурт кылмылэн вуоноез? Вань ке, кыӵеен тӥ сое адӟиськоды? Кыллэн но лулчеберетлэн азинсконаз интернет, туала технологиос кыӵе инты басьто, кызьы асьсэды шӧдыто, тӥляд малпамдыя?

— Мон, конечно, туж бадӟым оптимист улон шоры учконъя, но статистика милемы мукетсэ вера, удмурт кылмы туннэ туж ик умой югдурын ӧвӧл шуыса. Тужгес но нылпи ваем бере, югдурез адӟыса, сюлэм шугъяське. Жаляса верано, котырысьтым ик адямиослэн, тросэзлэн активистъёслэн но нылпиоссы удмурт кылын уг верасько... Но ми вань уженымы тыршиськомы кӧня ке но удмурт кылмылэсь сюрессэ кузёмытыны, кемагес мед улоз на шуыса. 

Выль технологиос, туала технологиос — со сыӵе амалъёс, кудъёсыз бордын одно ик ужаны кулэ, кудъёсызлы одно ик кулэ саклык висъяны. Со пӧртэм искусственной интеллектэн ужан, программирование, медиатехнологиосын, медиаконтентэн ужан. Удмурт кыл но со удысъёсын луыны кулэ, малы ке шуоно со бордын азьланез, удмурт кыл отын уз ке луы, валамон ни, со нокытын но уз луы ни.

— Эшшо огпол тау вераськемдылы. Туж тунсыко вал. Выль вормонъёс, выль малпанъёс но выль мылкыдъёс тӥледлы но «Куара» огинлэн командаезлы! Ӟеч ужды шумпотон гинэ мед кузьмалоз но мед улоз удмурт кылмы калык пӧлын но, интернет дуннеын но!

Вераськиз Ольга Плотникова

Туспуктэмъёс: Ольга Степановалэн личной архивез