«Улэм потэ», — шуылӥз

Улыны тыршись воргорон, нылпиоссэ но внукъёссэ туж яратӥз. Вань улытозяз ужаз «Труд» колхозын. Усто комбайнёр вал, берло фермаын ужаз. Тальянкаен виртуозно, дугдыны валатэк туж задор быгатэ вал шудыны. Вася агай тальянкаен праздникез шулдыртыны потоз шуизы ке, соку ик гурт калык люкаськылӥз.

Гужем бакчаын, ми бускельёс, вераськыса пукылӥм, визь-кенешъёс сётылӥз мыным. Вукогуртын азьвыл кинъёс кызьы улӥзы но ужазы, кытын ӵыпет, колхоз бакча, вуко, амбар но мукет ужан интыос вал шуыса вералляз. Огполаз армиын служить каремез сярысь но вераз: «Саратовын куинь толэзь ӵоже возизы. Сюдӥзы туж начар, зын пырем чорыген но сисьмем картофкаен. Сӥзьыл куазь кезьыт вал ни соку, кесяськемесь шинель, плащ-палатка но пилотка сётӥзы. Германие келякузы мунчое пыртӥзы, умой солдат дӥсь сётӥзы ни. Нуизы кык толэзь ӵоже огшоры товарной вагонэн. Польшае вуыса, кык арня мукет поезд витимы, чугун сюрес Европаын паськытгес вылэм. Германие вуыса паймимы: немецъёс узыр уло вылэм, котьмазы вань, чылкыт, ваньмыз радызъя, лушкаськисьёс ӧвӧл. Нылъёссы чебересь ӧз поты милемлы солдатъёслы, ымнырзы пужыесь, мугорзы ярамон ик. Татын службамы ӝожтӥськымон ӧй вал, умой ортчиз. Бертыку ковёр вайи, аслым но Петыр агайлы буртчин дэрем, майкаос но мар. Германие кылем потэ вал, доре гожтэт гожтӥ со сярысь. «Ми тонэ вордӥм, армие мынымон таза будэтӥм, табере милемыз кулэ уд кары-а, мар-а?» — шуыса гожтӥзы анаен-атай. Бертыны косӥзы, туж кылем потэ вал но».

«Кулэме уг поты ай таӵе умой улон дыръя, улэм потэ», — шуылӥз. Сопал дуннеяз ӟеч мед улоз ни.

Пичи но егит дырзы война дыре тупам адямиосмы оген-оген кошкыло ни улонысь. Тросэзлэсь улэм-вылэм историзэс тодытэк кылиськом, но собере малы меда ӧй юалляськы шуыса жаляськом. Вашкала дӥськутъёсты но арбериосты утьыса ум возиське, валлянаен герӟетэз быдтӥськом. Кыӵе синмаськыса учкисько кумапайлэсь, анаезлэсь но, вашкала куэм дӥськутъёссэ, мукет киужъёссэ. Ваньзэ-ваньзэ вуж арбериоссэ утьыса возем, азьвыл уго номыр но тыршытэк капчиен ӧз шедьы, соин тус-тас карыны жалязы, луоз.

Вера Лобанова, Вукогурт