Улонысь серемес учыръёс

Вот кылзэлэ одӥг учырез…

Сӥзьыл шулдыр ӝыт — «бабье лето» шуо кадь сыӵе куазез ӟучъёс. Кышноеным дасяськиськом садоогородысь Иже бертыны. Мотоцикллэн  юлькаяз (90-тӥ аръёсы ваньмыз мотоциклэн лобало вал — машина кинлы гинэ йӧтӥз) тырим пуйыен картошка, чукиндэр, кешыр. Ужатӥ мотоциклэз, йырамы понӥм каска. Пукси мотоциклэ, сьӧре кышное интыяськиз. Ӧжатак мотоциклэз ӟырдатӥ но «инмарен» вырӟимы. Куазь шулдыр, мылкыд умой, ширтӥськом гуртэ. ГАИ пост дортӥ ортчыку, ӧжытак шымырски ке но (ӧжыт-а дугдытон причинаос), ваньмыз умой ортчиз — пал синмын гинэ учкизы. Городэ пырим, корка доры вуим. «Лена, — шуисько, — умой бертӥм, васькы ни». Берытски но — сьӧрын буш. Кышноме ыштӥськем. Сюлэмы пыдтышкам ик васькиз. Кытчы бен мон сое ыштӥ, мар каром ни таре?  Йырам чаляк гинэ оломар малпанъёс но лыктӥзы. Ну, малпасько, мон сое светофор дорын уськытыса кельтӥ. Шонерзэ верано ке,  мон яратӥсько вал светофор дорысь вырӟыку, газэз нюртыны но мукет транспортлэсь азьлогем потыны. Пинал дыръя кин но сыӵе уг выры?  Куд-ог дыръя азь питран ик ӝутӥське вал. Ури-бери вырӟи кышноме утчаны. Ворттӥсько, сюресэз ик уг адӟиськы. Стоп, малпасько, тазьы уз луы, ачим но аварие сюро, тазьы дыртыса но куалекъяса. Шедьтӥзы ке, мар ке но ивортозы, йыр ке йыр, пыд ке пыд — берытсконо кари. Корка доре вуи но — кышное подъезд дорын сылэ. Шумпотыса, ымы пель дорам ик вуиз. Мон борды кутскиз ук кышное: «Монэ юри кельтӥд, эшшо шумпотэмдэ ватыны ик уд быгатӥськы. В обшем, озьы но тазьы валамы, мар луиз.

Бакчаын мотоциклэз ӟырдатыку, кышное вырӟем сьӧрысь номерез ӵушылыны. А мон соку каллен вырӟи. Лена азьло каллен, пе, мынӥ, дугдоз али шуыса. «Адӟисько, таид кужмогем но кужмогем кошке, сьӧраз бызисько, черекъясько — каскаен номыр но уг кылӥськы. Малпасько: возьмато али бертэм бере кулэзэ. Автобусэн доре вуи». Мукетсэ асьтэос тодӥськоды.

Та учыр бере азьло кышно мотоциклэ пуксем бере пыдзэ ас борды гозыен думисько вал, соку гинэ вырӟисько. Ӟучъёс верамъя — «бережёного бог бережёт». Шутка. Вот озьы луэ куд-ог дырья, эшъёс.

Валерий Перемечев,

Ижевск-Вукогурт