«Ужатэк улыны нокызьы уг луы»

Туэ понна туж шумпотымон суред син азе пуксе: 90 ареслэсь ортчем арлыдоослэн лыдзы трос на. Соослэн мылкыдзы егит дыръязы кадь ик бурдъяськыса улэ, шутэтскыны уг дырто, весь ужаны, ӵыжы-выжыоссылы юрттыны тыршо. Улон сямзы ик ужен пачылмемын, ужтэк пукемзы уг луы. Соин ик улон мылкыдзы но бурдъяське, кужым сёто ӵыжы-выжыоссылэн тазалыксы но шудбурзы.

Ципья гуртысь ужысь ветеран Елизавета Гавриловна Кумаева 5-тӥ гудырикошконэ пусйиз аслэсьтыз 90 аресъем юбилейзэ. Сӥлы карыса, юбилееныз ӟечкыланы песянай доры куное вуизы Балтась ёросысь быдэсъясь комитетлэн кивалтӥсезлэн воштӥсез Ильгам Гайнутдинов, ёросысь социальной обслуживаниея «Наз» центрысь ӧнерчи Гузель Галимуллина, «Труд» возёслэн кивалтӥсез Рашид Хадиев но Ципья гурт поселенилэн быдэсъясь комитетэзлэн кивалтӥсез Ильнур Галиев. Россилэн Президентэзлэн ӟечкылан открыткаезлы но Балтась ёрослэн главаезлэн Таукарон гожтэтэзлы Елизавета Гавриловна шумпотӥз. Лыктэм куноослэн каньыл мылкыдзы но кузьымъёссы дано юбилярлэн сюлмаз шуныт мылкыдъёс пыӵатӥзы.

— Сюлмысен юбилееныды ӟечкыласько. Сӥзисько юн тазалык, каньыл улон, нылпиосыныды, внукъёсыныды но правнукъёсыныды ӵошен улыны мед кылдоз на. Курытсэ но, кӧшсэ но адӟем, ужаса будэм адямилы табере шутэтскон кулэ ини. Нылпиосты но ёрос понна тыршисесь. Тӥледыз но утьыса-вордыса возё. Будӥсь поколенилэсь гажамзэ адӟыса кема улэ на. Тани тӥледлы чебер шаль кузьмаськом, сое дӥсяса куное ветлыны луонлыкты медло. Тӥ — дано ужась, кытын гинэ ужаллямтэды, котькытчы вутскиллямды. Тӥляд тыршеменыды, ужез яратэменыды нылпиосты но быгатӥсесь будэмын, — ӟечкыланъёссэ вераз Ильгам Фидаелевич.

— Будӥсьёсыз таза мед луозы, ужатэк улыны нокызьы но уг луы, тэк пукыны сюлэм уг чида, — тау кариз Елизавета Гавриловна. 
Пӧртэм учыръёс пыр потэм нылкышно тодэ ваёнъёссэ секыт мылкыдэн уг вера, чидаськыса, азьланезлы бадӟым осконъёсын улэ.
«Труд» возёсын кема аръёс ӵоже ужам ветеранлы Рашид Хафизович Татарстанысь гурт возёсъя но сиён-юонъя министрлэсь, Марат Зяббаровлэсь, Таукарон гожтэтсэ но сётӥз. Егит дырысен кутскыса но гумыразы вань кужымзэс сётыса колхозын мыло-кыдо тыршем кузпалъёсты Рашид Хафизович ӟеч тодэ, Анатолий кузпалэныз дыраз ӵошен ужаллям. Туж ӟеч сямо ужась луэм Анатолий Васильевич, колхозын комбайнёр луэм. Елизавета Гавриловна но котькуд ужын ассэ быгатӥсен возьматэм.

Елизавета Гавриловна вордӥське 1933 арын бускель гуртын, Вукогуртын. Татын ортчо солэн пичи но егит дыръёсыз. Котькуд семьялэн кадь ик шуг-секытъёссы но луизы, шумпотонъёссы но ӧжыт ӧй вал. Шоро-куспо семья луыса, ваньзэ ӵошен ортчыны тыршизы. Ужъёсты ноку ӧз люкылэ: секыт ке но, капчи ке но, ог-огзылы юрттыны тыршизы, азьлане учкыса, дэмен ваньзэ ужазы. Гурт калык котьку юртъер, пудо котырын выре, соин ик улонзы азьлань чальгес мынэ. 

— Милям атаймы туж зӥбыт пиосмурт вал. Ураме потыны шер лэзьылӥз. Солэн кылъёсыз али но пель сьӧрам: «Дышетскемед уг ке поты, потод ини». Соин урам шулдыръяськонъёсы пыриськыны чаль уг тупа вал, — тодэ ваёнъёссэ улӟытэ арлыдо кышномурт. 
Озьы нылпиос асьсэлэсь пичи дырзэс дышетсконлы сӥзизы. Соку тодон-валан басьтыны туж юн мылкыдзы луэм, угось тодон-валан улонзэс но капчиятэ, азьланяз но сюресъёс усьтӥсько.

Но, жаляса верано, 5 классэ пумозяз йылпумъяны луонлык кылдымтэ, соин ик пӧртэм ужъёсын тыршоно луэм. 16 аресысен ик Елизавета Гавриловна интыяське колхозэ. Нырысь нюлэс кораны Лаише лэзиллям, отысь бертэм бераз пӧртэм ужъёсын ужам. 
— Мынам ужамтэ уже ӧз кыльы. Котькытчы вуи: фермае но, вукое но, сиён пӧзьтонэ но, котькуд ужын рос-прос ваньзэ лэсьтыны тырши. Ужаны ветлӥськод ке, ужано ини, — шуэ дано песянай.

1956 арын егит нылаш Ципья гуртысь Анатолий Васильевичен улон сюрессэ герӟа. Соослэн вордӥсько 8 нылпизы: Владимир (1956), Татьяна (1958), Маргарита (1959), Алевтина (1962, 25 нунал гинэ улыны кылдэ), Василий (1962), Марина (1964), Игорь (1966), Вячеслав (1971, кулэмын ини). Туннэ нуналлы, жаляса верано, Анатолий Васильевич югыт дуннеысь кошкемын ни, но аслэсьтыз пытьызэ нылпиосаз кельтӥз, соос атайзы кадь ик тыршыса уло.

— Ципьяе лыктыкум, сисьмем корка вал али, пушказ но дэриен, педпаласен но тӧдьы сюен наштамын вал. 4 ар отын улӥм на, собере озьы но тазьы радъяськимы. Асьме кужымен корка ӝутӥмы. Лэсьтӥськон арбериосты утчад ке, шедьтӥськод ини. Каллен-каллен лэсьтӥськимы. Чаль ӝутыны ӧм быгатэ, соиз но таиз кулэ. Али улон коркаез пиос асьсэос лэсьтӥзы ини, — азьланьтэ веранзэ Елизавета Гавриловна.
Егитъёс котькуд дауре огазе люкаськыса шулдыръясько, шутэтско вал. Кумаевъёс но отын ик тодматскиллям, татысен ик семья но кылдытӥллям. Соослэн кусыпъёссы туж юн луэмын, туннэ нуналэ но арлыдоос эшъёсынызы кусыпъёссэс возьыны тыршо на. Егит дыръёсазы шулдыръяськонэ но потыны вутскиллям: кырӟанъёсты, эктонъёсты туж умой тодӥллям. 

Туннэ нуналэ песянайлэн улонэз узыр но шудо: нылпиосыз, внукъёсыз, правнукъёсыз котыраз люкасько, куное бертыло. Сӥлы каремзы адӟиське: чебер дэремъёсын пукись песянайлэн ваньмыз чылкыт но ӝикыт. Юбилей нуналаз матысь адямиосыз рос-прос ӝӧк но дасяллям: пӧртэм салатъёс, пӧраськемъёс, внукезлэн кышноез, Марина, туж чебер торт но пыжем, сюлмысен лэсьтэмез адӟиське. Шумпотэмзэ уг ваты арлыдо песянай, куректон ӧвӧл ук со лушкем возён понна.

— Али егитъёс туж умой улыны быгато ни. Тазалыксы гинэ медло. Инмарлы тау: нылпиос, пичиос берто, утялто, сюдо-вордо, ваньмыз вань, — йылпумъя веранзэ шудо песянай.
Гажано юбилярлы, лякыт сюлэмо анайлы но песянайлы сӥзиськом азьланяз но капчи мылкыдын улыны. Котькуд нуналэз шундыё мед луоз, ветлон сюресэз вольыт но шонер медло. Матысь адямиосыныз тупаса, ог-огзэс валаса но гажаса мед улозы!