Витамин «В» но «Г» уг тырмы — «В»ордскем «Г»уртэ... (ужъюлтошмылэн Наталья Жуковалэн вакчияк статьяосыз)

Малы? Валэктӥсько.

Тани, шуом: сюрид тон зор улэ. Котмид. Яратоно пыдкутчанысьтыд суч-сач ву вия. Нимысьтыз куасьтонниед дорад ӧвӧл, батареяосыд — кезьыт. Ма карод? Шонер. Ки улад сюрем газеттэ кияд кутод но пыдкутчанэдлэн пушказ тырод. Озьы-а? Озьы.

Газеттэ куасалляса пыдкутчанэ интыятозяд тодад ваёд, кызьы нылпи дыръяд анай-атайёсыд пачкаосын-пачкаосын пӧртэм печатласькись изданиослы гожтӥськылӥзы. Соос пӧлын вал «Мурзилка», «Школьники», «1000 советов» выллем газетъёс, шонер-а? Дорады лыдӟиськыны яратылӥзы, луоз. Син азяд пуксёз семьяысьтыд кудӥз ке матысь адямиед, кудӥз тужгес лыдӟиськыны яратылӥз. 

Кытын ке ремонт ужъёс мыныку, выжъёстэс, борддоръёстэс, укноостэс но тусьты-пуньыостэс маин-о ватылӥды? Кытчы пегӟытылӥды? Газетэн ӧд-а ӵоксалэ? Школаын дышетскон вакытады, классысьтыды эшъёсты газетлэсь пилоткаос ӧз лэсьтылэ-а?

Толалтэ вуыку, кезьыт куазьёслы ваньмы рос-прос дасяськылӥмы (пластик укноос сярысь тодӥсь ӧй вал на). Укно но ӧс висъёсты маин ӵоксаллямы? 

Анае газет бамъёслэсь сяська рассадаосызлы нимысьтыз «конвертъёс» дасялля вал. Атае Арборкаысь кутэм чорыгъёссэ газет бамъёсы вӧлдыса сузялляз. 

Ӵужанае сӥзьыллы выж улэ бакча емышъёсты октылыкуз, одно ик газет бамъёсын шобыръялля соосты. Котькуд емыш нимысьтыз биняллямын ке, тон тодӥськод: толшорозь ческыт бакча сиёнъёсын кӧттэ тырод. 

Нош пӧзьыосты но изьыосты кей медаз сиы шуыса кызьы утиськоды? Толалтэ кызэз чеберъян шудонъёсты маин шобыръяса возиськоды? 

Кыӵе чебер поделкаос нош лэсьтыны луэ газет бамъёслэсь! Папье-маше техникаез тодады вайиськоды на-а? 

Мар вераме потэ — туннэ но газет туж кулэ. Уг вераськы, газетлэн пайдаез улонын гинэ кутӥське шуыса — пуштросэз сярысь ноку вунэтыны кулэ ӧвӧл. Озьы-а?

Наталья Жукова