Витамин «В» но «Г» уг тырмы — «В»ордскем «Г»уртэ... (ужъюлтошмылэн Наталья Жуковалэн вакчияк статьяосыз)

Огшоры кылын вераса, триггер — со кыӵе ке сыӵе учыр, кудӥз бере адямилэн чутрак мылкыдыз, улонэз воштӥське, ӵемысь со урод луэ. Сыӵе учыре адями уг ни вала, мар вера но мар со ужа, кыӵе уж быдэстэ — умой-а со, урод-а. Кылсярысь, куке но сьӧрады бызьыса ӟазеглэн тӥледыз туж зол куртчылэмез вань но тӥляд солэсь туж зол бызьыса кенер яке писпу йылэ тубемды вань вал ке, та кыл тӥледлы тодмо луоз.

Школаын дышетскон дыръёсам мыным ӵемысь «удмуртка» шуылӥзы, студент дыръёсам — «вотячка». Туж воже потэ вал. Триггер шуонзы вылэм со мон понна. Гуртамы бускель Марий Элысь вуэм пиос сьӧры исаськемзы понна мыжыкме урдыса уйиськылэме но вань. Тышкаськон кылъёслэсь но секытгес, вӧсьгес потылӥзы соку со кылъёс. 

Школаез йылпумъяса бадӟым городэ дышетскыны кошкеме бере, удмурт сямме ватыны тырши. Ӵужанаен яке анаен Балтась базаре мыныкум, Инмарлэсь куриськи, тодмозэс гинэ медаз пумиталэ вал шуыса. Кутскозы ук быдэс Балтась кылымон вераськыны удмурт кылын... Возьдаськыса но вож потыса коть дорысьтызы пегӟы. «Это не моя мама, я не знаю эту женщину», — вань вылтусыным но выросъёсыным возьматыны тырши сыӵе дыръя. 

Али аслым туж серем. Возьыт ачим понна. Анай кылы туж мусо но туж дуно потэ.

Кузпалэ куддыръя вера: «Кӧня ке арскын дышод ми сямен вераськыны, мусое». «Уг, — шуисько, — котькытын мед улом, котькыӵе кылын мед вераськом, пушкам анай-атаелэн вирыз бызе».

Та «триггерской» висёнлэсь йӧнаськемме алигес валай. 
Кыдёкынгес улӥськод — тросгес валаськод, вылэм. Вордскем гуртам вуыса, яратоно газетме пыр-поч лыдӟытозь, нокыӵе уж борды кутскеме но уг луы ни табере. Валам гинэ ӧвӧл, анай кылыным гожъяськыны мылкыды бурдъяськиз газетлы луыса. «Удмурт ӧвӧл-а мар-а мон, быгато», — малпай 2017-тӥ арын, редакцие ужаны интыяськыкум...

Табере монэ ултӥяны малпаса кин ке но «удмуртка» яке «вотячка» шуиз ке, мон шумпотӥсько гинэ. Вань ук асьмелэн, удмуртъёслэн, таӵе веранмы: «солы одӥг дунне», «ас дуннеяз адями со». Мыным но дунне шат, кызьы монэ нималозы. Мынам пушкам — быдэс удмурт дунне.

Наталья Жукова