Войнатэк мед улоз дуннемы!

Синкылиен, шумпотонэн, осконэн, кайгуэн тырмем сюлэм 79-тӥ вормон тулысэз пумитаз.

Нош ик вуиз тулыс. Шаерысь кӧшкемыт учыръёс выллем инкуазь но шукыръяське, ваменэс сямзэ возьматэ. Но куартолэзь – со котьку кема возьмам дыр. Ваньмыз улӟе, шокан омыр йылэ, мылкыд ӝутске.

Куартолэзьлэн самой валтӥсь но мылкыдэз бугыртӥсь праздникез со – Вормон Нунал. Калык понна та нунал аспӧртэмлыко тодэ ваёнъёсын но историен тырмемын. Котькуд семьялэн татын аслаз Героез, аслаз дано музъем утисез. Миллионлэсь трос ожлудэ кылем геройёсмы, сомында ик ожлудысь бертыса батырлыко быремъёс, ивортэк ышем аспалъёсмы... Соос ваньзы ас улонзэс, тазалыксэс но сяськаяськись егит дырзэс сётӥзы калык понна, шаерлэн тынӥсь но шудбуро азинсконэзлы. 

Тау шуыны кулэ ёрос кивалтэтлы, котькуд гуртын сямен туннэ нимысьтыз Быдӟым Атыкай ожысь солдатъёс понна кылдытэм памятникез адӟыны луэ. Соос арлы одӥг пол чеберско пӧртэм сяськаосын, сяська керттэтъёсын но венокъёсын. Кулэм ожгарчиос, улӟыса, ӵыжы-выжыосынызы одӥг радэ султо кадь.

6-8 куартолэзе котькуд гуртын но гурт поселениын ортчизы Вормон Нуналлы сӥзем трауро митингъёс. Соос тырмемын вал пуштросо кырӟанъёсын, кылбуръёсын но эктонъёсын. Нылпиос но, бадӟымъёс но мылысь-кыдысь пыриськизы бырем ожгарчиосты сӥлы карон ужрадэ. Та туж кылкутымон но кулэ луись вакыт, куке асьмеос огазе луиськом. Вашкалаоссылы музъемозь йыбырттон пумысен синпелетъёс доры люкаськизы гурт калык но бертэм куноос. 

Торжественной митинг бӧрсьы, возёсъёслэн но обществоослэн юрттэменызы арлыдоос понна чай юон радъяськиз. Татын соос ӝӧксьӧр кырӟанъёс быдэстӥзы, ог-огенызы вераськизы но мылкыдъёссэс веразы. 

Куд-ог гуртъёсын валтӥсь торжественной митингъёс сяна, мукет ужрадъёс но ортчытэмын вал. Тӥледыз но соосын тодматӥськом.

Вукогуртын туэ Быдӟым Атыкай ожын быремъёслы выльдэм синпелет усьтӥзы. Торжественной ужрадэ пыриськиз ёросысь центральной больницалэн валтӥсь врачез Газинур Давлиев. Ожгарчиослэн списоксы ожлудын быремъёслэн сяна, бертэм солдатъёслэн нимтулъёсынызы но узырмиз. Жаляса верано, туннэ нуналлы бертэмъёс ваньзы кулэмын ини. Но, шумпотымон, гуртын котькуд солдат аслэсьтыз дано интызэ шедьтӥз. Пиналъёс но историез, дуно кузьымез – улонэз чакласа но дунъяса будозы.

Вуж Турья гуртын нимысьтыз ожгар операцие пыриськисьёслы стенд усьтӥзы. Туннэ нуналлы шаермылэсь эриксэ утисьёслэн радазы та пичи гуртысь Леонид Шапринов, Вадим Антонов, Михаил Алпутин, Александр Антонов но Алексей Копаров султэмын. Оскиськом, ӝоген пиос берытскозы вордскем палъёсазы, та кышкыт но шимес дыръёс сярысь вунэтозы но каньыл улонэн улыны кутскозы.

Ӟаныын валтӥсь ужрадъёс бӧрсьы калык понна концертной программа но дасямын вал. Та сярысь Ӟаны лулчеберетъя юртысь заведующей Алефтина Иванова аслэсьтыз мылкыдъёссэ вераз:

– Кызьы гинэ ӧз воштӥське берпуметӥ аръёсы туала историысь фактъёс, Вормон Нунал котьку воштонтэм, кайгуо но мӧзмыт, со дыре ик дуно но чылкыт праздникен кыле. Быдӟым даталы сӥзьыса, лулчеберетъя юртамы Ӟаны шоръёзо школаен валче концерт дасямы. Учкисьёс понна асьме кужмо кунмы сярысь ожгар кырӟанъёс чузъяськизы. Милям чебересь нылъёсмы синмаськытӥсь эктонъёс быдэстӥзы, озьы ик сюлмысь кылбуръёс лыдӟиськизы. Туж бадӟым тау шуэме потэ котькуд пыриськисьлы, дышетскисьлы, дышетӥсьёслы но анай-атайёслы, кудъёсыз мыло-кыдо соглаш кариськизы бадӟым уж лэсьтыны. Озьы ик шуныт кылъёсме вуттэме потэ учкисьёслы но, соослэн юрттэтсы но кичабонъёссы мылкыдмес ӝутӥз. Ваньмылы йыр вадьсамы сайкыт инбам, шудбур но тазалык сӥзисько!

Ципья гуртын но валтӥсь Вормон Нуналэз сӥлы карон сяна, 7 куартолэзе нимысьтыз ожгар операциын батырлыко бырем ожгарчиослы, Ципья шоръёзо школаез йылпумъям аспалъёссылы — Рафаэль Галимуллинлы, Дмитрий Степановлы, Павел Матвеевлы, Алишер Булатовлы, Иван Щербаковлы, Сайдар Самигуллинлы но мемориал пул усьтон ужрад ортчиз. Пусйыны кулэ, нырысь Рафаэль Галимуллинлы, Дмитрий Степановлы но Павел Матвеевлы сӥзем мемориал пулъёс Ципья шоръёзо школаын интыямын вал. Табере батырлыко бырем «ӧрӟиосмы» котькинлэн син азяз улозы ни. Матысьёссылэн сюлэмъёсаз мур яра кельтэм ыштон выльысь выль кужымен ӧръяськиз, бадӟым кайгузы вань калыклы матын луиз, куазь но соосын валче бӧрдӥз кадь. Арлыдоос но буре ваён борддор доры лыктыса, асьсэлэсь мур куректэмзэс, кайгузэс веразы. Кезьыт куазь луиз ке но, нылпиос солдатъёс сямен постын сылӥзы.

Матысь дыре школалэн юртаз но нимысьтыз ожгар операцие пыриськисьёслы сӥзем сэрег кылдытыны малпало шуыса вераз Ципья школалэн директорез Раниф Ахатов. Оскиськом, малпанъёссы одно ик быдэсмозы. 

Туннэ нуналэ самой бадӟым но дуно мерттэт со – дыр. Сое уг луы берыктыны, выльысь гожтыны, вылтӥз гожманы, сое луэ дунъяны но данъяны, нуналысь нуналэ ӟеч ужъёсын но капчи мылкыдэн тырмытыны. 
79 ар ортчиз, кызьы батырлыко солдатъёсмы шаерамы вайизы вормон но шумпотон. Тросэз соос туж егитэн быризы, асьсэлэсь яратонзэс, семьязэс куштыса, асьмелы Улон сётӥзы. Табере азямы туж кылкутымон уж сылэ: ас улонзэс сётэм ожгарчиосмылэсь осконзэс зэматоно. Ваньмыз – туннэ чагыр инбам но яркыт пиштӥсь шунды понна. Ноку медаз лу война шаерамы! Украинаын мынӥсь нимысьтыз ожгар операцие пыриськисьёс ӝоген доразы мед бертозы!