«Вордскем кыллэн» юбилеез

Тазьы гожтӥз вал анай кылмы сярысь тодмо удмурт кылбурчи Флор Иванович Васильев. Анай кыл, вордскем кыл, удмурт кыл - ваньмыз та кылъёс гожтӥськемзыя пӧртэм ке но, пуштроссыя огкадь дуно луо. Анай кыл - со адямилэн вордскем дырысеныз кылыса будэм, соин вераськыса кусып возем кылыз. Соин ик со анай кадь шуныт, небыт, анай кадь ик дуно но мусо потэ. Малпанэз нокыӵе мукет кылын анай кылын музэн жингрес но чебер вераны уд быгаты.

«Вордскем кыл» - ӵапак таӵе нимын потэ Удмурт Элькунын дышетӥсьёслы но визьнодасьёслы ( воспитательёслы) сӥзем журнал. Тани 25 ар ӵоже ини та журнал удмурт кылъя но литературая дышетӥсьёслэн ужазы матысь эшсы но юрттӥсьсы луэ. Татын ик печатласько ӟучомыны кутскем удмурт пиналъёсты визьнодасьёслы кулэ материалъёс но. Туэ 3 шуркынмонэ журналлы 25 ар тырмиз. Удмуртиысь куноос сяна, та ужрадэ ӧтемын вал элькунлэн палэназ улӥсь удмуртъёс но - Татарстанысь, Башкортостанысь, Пермь улосвылысь делегациос. Милемлы но шуд усиз яратоно журналмылэн юбилеяз пыриськыны. Юбилейлэн программаез туж тунсыко но пайдаё радъямын вал. Ужазы эссе, интервью гожъянъя но мукет быгатонлыкъёсты азинтонлы сизем мастер-классъёс. Праздниклэн пленарной люкетаз вуэмын вал Татарстан Элькунамы потӥсь «Магариф» журналмылэн кивалтӥсез Миргалимов Илдар Флусович но. Илдар Флусович асьме Элькунамы йӧскалык дышетонэз азинтон но журналлэн туннэ нуналыз сярысь вераз. «Вордскем кыл»-эн ӵошатыку, «Магариф» журнал 8 пӧртэм кылын потэ вылэм. Удмуртиысь дышетӥсьёс паймыса юалляськизы, зэм-а солэн верамез шуыса. Солэн верамезлэн зэмлыкез юнматӥськиз алигес журналын потэм ёросысьтымы удмурт кылъя но литературая дышетӥсьёсмылэн Ирина Анатольевна Черновалэн (Ципья шоръёзо школа) но Наталия Львовна Антоновалэн (Покчи Лозя шоръёзо школа) статьяосынызы. Та дышетӥсьёс пыриськизы Россиысь анай кылэз дышетӥсьёслэн мастер-классазы но. Милям, «бигер удмуртъёслэн», Калыкъёслэн Огазеяськонзылы сӥзем праздник азьын милемыз тазьы сӥлы каремзы понна, Татарстан Элькунмылэн кивалтӥсьёсызлы бадӟым тау кареммы потэ. Та пумиськон Элькунамы улӥсь калыкъёслэсь агай-вын кадь ӵошен улэмзылы эшшо огпол юнматон луиз. Огазе: огмес огмы валаса, ог-огмылы юрттыса но тупаса улон - со асьмелэн самой вылӥ узырлыкмы.

Юбилей ноку но ӟечкыланъёстэк уг ортчы. Озьы ик та юбилейын «Покчиёзо но шоръёзо школаын самой устоез этнокультурной пуштросъем внеурочной программа» вожвылъяськонлы йылпумъянъёс лэсьтӥзы. Покчи Лӧзя шоръёзо школаысь удмурт кылъя но литературая дышетӥсь Пчельникова О.М 1-ти степенё Дипломен пусйиськиз. Оскеммы потэ, азьланяз но удмурт кылъя но литературая дышетӥсьёсмы вылӥ радын луозы шуыса. Нош удмурт пиналъёстэк, удмурт анай-атайёстэк сыӵе азинсконъёсы вуыны уз луы. Газет пыр вазиськеме потэ удмурт анай-атайёслы, вордскем кылзэс медаз вунэтэ шуыса, пиналъёссэс анай кылзылы мед дышетозы но «Кизили», «Ӟечбур», « Инвожо», «Кенеш» но «Азьлане» газет-журналъёсмы соослэн матысь эшъёссы мед луозы шуыса. Жаляса верано, туала дыре асьме пиналъёсмы ӟучомыны кутскизы. Нош соосты шонер сюрес вылэ поттон асьме бордысь потэ. Школае мынэм нылпиосмылы удмурт кылмы мултэс кыл медаз луы, шугъяськон (проблема) медаз кылдыты шуыса, пичиысеныз ик пиналэн вордскем кылыныз вераськоно. Анай кыл дышетонын бадӟым пайда вае. Ас кылыныз кадь нокыӵе мукет кылын пинал уз вала дышетон материалэз. Соин ик котькудӥз ассэ но ас калыксэ гажась, вордскем шаерзэ но анай-атайзэ яратӥсь адями ноку но уз сантэма вордскем кылзэ. Оскеме потэ, удмурт кылмы азьланяз но улоз шуыса. Нош кыл ке вань, калык но вань.

Наталия Антонова,
ёросысь удмурт кылъя но литературая дышетӥсьёслэн методической огазеяськонэнынызы кивалтӥсь