Вукогуртысь кизили куинь гуртэз кенжытӥз!

Бускель гуртъёсамы но шулдырен ортче та нунал: кин Бельгые дасяське яке Гурт нуналэ дыртэ, Кызьпулэн но праздникез вань на ай! Мон куке но гожтӥ вал газетамы Вукогуртысь Семык нуналэз пусъён сямъёсмы сярысь, нош та статьяме чылкак калыклэн куремезъя ыстӥсько вордскем палъёсам.

Ципья черкогуртлэн лулчеберет юртаз ужась Евгения Михайловаез Семык ӝытэ куное ӧтиллям, нош со интые Евгения Петровна, вуюись кадь чебер удмурт дэрем дӥсяса, кияз мызган кутыса, Ципья ураме потэм. Эх, юмшазы ке юмшазы Ципья гурт пумын: пересез но пиналэз, егитэз но мӧйыез! Капчи мызган гурен «апай сямен» бергало нылкышноос, «ӟыгытларски» экто воргоронъёс, соин гинэ ӧз на дугдэ, кырӟан курыса, пичи концертлы пӧрмиз шулдыръяськон. Женя апайлэн быдэстэмезъя кырӟанъёсты синъёссэс ӵушылыса кылзӥзы. Бератаз тазьы шуизы: «Ми палан мызган куара трос аръёс ӧз ни чузъяськы вал! Туж шумпотӥмы, капчи мылкыдын дорамы бертӥмы, данъяськиськомы лулчеберет юртамы таӵе задор мылкыдо, чебер кырӟась, эктӥсь, шудӥсь но кивалтыны быгатӥсь Евгения Петровнамы вань шуыса».

Женя апай вордскем гуртсэ туж яратэ, со куспын Вукогуртэ вуиз. Валлян сямен нош ик гуртамы пумысен пумозь юмшан ӝыт луиз, пичиез но бадӟымез огазе шулдыръяськизы, сиён-юонэн гажаса пумитазы. Шулдыръяськыны потэм калыкез нимтулэн ке гожтоно, трос дыр кулэ, нош Артя Огош апай, Маня апай, Катёк Олька апай, тӥледыз одно ик гожтыны косӥзы. Гуртмес юн яратэмды, валлян кылдэм йылосмес утемды, пинал мылкыдо улыны быгатэмды гажамон но вылӥ дунъямон!

Вазиськеммы потэ гуртын улӥсь кенъёслы но воргоронъёслы, асьме гуртын тужгес но капчи Семыкез пусйыны, дасяськонэз но ӧвӧл, капка выжыяд поты но шулдыръяськы! Нош берло аръёсы сыӵе сям шедьтӥзы, гуртын гурласа шулдыръяськон интые, кошко бускель гуртъёсы соослэсь юмшамзэс учкыны. Бен ас гуртмы «ӵын потымтэ» гуртлы пӧрмоз ук!

Туж шумпотӥськом, гуртамы али пичи ке но клубмы вань, нош Семык дыръя со котьку но ворсамын луэ. Азьло дыре гурт пумысен гурт пумозь потӥськом но клубе люкаськыса юмшаськом вал. Тани клуб пала потӥм, эх, тылыз ӧвӧл! Ойдолэ, нылъёс, асьмеос но кытчы ке кошком? Кема малпаськыса ӧм улэ, Кургем гуртэз но шулдыртоно ук, отын но туж капчи мылкыдо калык улэ. Отчы бызем Вукогурт нылъёс ас сямзэс тодо, гуртын кадь капка выжыяз потыса, сиён-юонэн пумитало, милемыз гажало но шудонэ пырисько. Бадӟым тау тӥледлы, Валя но Сергей, азьланяз но  та сямдэс эн куштэ, емышен пӧзьтэм чайдылэн шӧмыз али но ымамы кадь потэ.

Тани одӥг ӝыт куспын Евгения Петровна куинь гуртэ «тыл пыртӥз», котыр югытгес но жингрес луиз, кемалы чебер малпан кельтӥз!

Женя, вань кадь шулдыръяськисьёслэн нимыныз сюлмысь таукареммес вераськом, яратоно газетмы пыр, азьланяз выль азинсконъёс но юн тазалык тыныд!

Ортчиз-кошкиз Семыкед, капчи эктонъёсмы син азьын, чебер кырӟанъёсмы пель сьӧрын:

Эх, дауръёс, улон дауръёс

Сяська сямен толӟо но пурӟо.

Оген медаз ортче та аръёс,

Ӵошен уломы, эшъёс!

Ципья черкогурт, Вукогурт, Кургем гуртысь шулдыръяськисьёслэн нимынызы гожтӥз Нина Андреева.